Fálase

O Congreso convalida o terceiro Real Decreto de medidas contra a crise de prezos do Goberno de España por 175 votos a prol, 7 en contra e 164 abstencións, entre elas as de formacións como PP, ERC ou o BNG. Trátase do paquete do escudo social que inclúe accións como a supresión do IVE da alimentación básica por seis meses ou o cheque de 200 euros para as rendas máis baixas. O pleno da Cámara Baixa acordou tamén tramitar este mesmo Real Decreto como proxecto de lei por vía de urxencia, o que implica que os grupos parlamentarios poden formular emendas para agregar novas medidas ou modificar algunhas das xa vixentes. Na imaxe, comparecencia de Pedro Sánchez no mesmo pleno.

• HEMEROTECA | O Estado suprime seis meses o IVE da alimentación básica e lanza un cheque de 200 euros para as rendas máis baixas

Descarrila un tren de mercadorías que circulaba baleiro na liña Ourense-Santiago -no trazado antigo, non no de alta velocidade- á altura de Lalín e o maquinista resulta ferido. Segundo informa emerxencias, "descarrilou tras atoparse cun derrubamento sobre a vía e acabou por colidir contra o piar dunha ponte" da estrada PO-902. "A locomotora e varios vagóns quedaron envorcados lateralmente", especifica o 112, "mentres que o maquinista puido saír coa axuda dos Bombeiros de Silleda" e sen "feridas de consideración". Na imaxe -tirada de Google Maps-, o lugar do accidente.

Luis Arosa, novo candidato do PSdeG á alcaldía da Illa en substitución do actual rexedor socialista, Carlos Iglesias, que goberna a vila con maioría absoluta dende 2015. O novo candidato, actualmente membro do goberno local, recibiu este martes o apoio do actual alcalde, de Valentín González Formoso, secretario xeral do partido; e de Carmela Silva, presidenta da Deputación de Pontevedra e do PSdeG, entre outros cargos. [Imaxe: PSdeG]

Transportes habilita un carril para a circulación no tramo da N-642 entre Foz e Burela afectado polo derrubamento de parte da calzada. Mentres continúan os traballos na zona, a solución provisional permite o tránsito alternativo, regulado por semáforos, neste punto clave da comunicación viaria na comarca da Mariña. [Imaxe: Delegación do Goberno de España en Galicia]

• A caída da estrada entre Foz e Burela pon o foco nas eivas da mobilidade na Mariña e nas promesas para mellorala

Centos de persoas secundan a manifestación convocada polo BNG en Moraña para reclamar a "cobertura inmediata" dos postos de persoal médico no centro de saúde da vila. A formación soberanista asegura que viu "desbordadas todas as previsións, con máis de 600 persoas" na mobilización. Na véspera, o alcalde da vila, José Cela (PP) atribuíu a mobilización a razóns "electoralistas" xa que, di, o Sergas fai "esforzos" por cubrir esas prazas pero "non hai médicos" dabondo, recolle o Diario de Pontevedra. [Imaxe: BNG]

• A protesta sanitaria recrúa e a Xunta tenta contela en vésperas da primeira proba electoral para Rueda

Entidades de defensa do galego, éuscaro e catalán homenaxean conxuntamente a Rosalía e Castelao no Panteón de Galegos Ilustres e resaltan a "importancia" de ambas figuras "na loita pola pluralidade lingüística e na defensa das linguas minorizadas do Estado". A Mesa pola Normalización Lingüística, representada polo seu presidente, Marcos Maceira, foi anfitrioa dunha homenaxe á que acudiron representantes da catalá Plataforma per la Llengua e da vasca Kontseilua. [Imaxe: A Mesa]

• HEMEROTECA | A Europa multilingüe cítase en Compostela coa Mesa pola Normalización Lingüística como anfitrioa

Tropas romanas e castrexas do Arde Lucus desfilan polo centro de Madrid dentro da aposta da festa lucense de recreación histórica por incrementar a súa difusión e aspirar ao recoñecemento como Festa de Interese Turístico Internacional. O desfile deste sábado, encadrado na programación do Concello lucense en Fitur, estivo encabezado pola alcaldesa da cidade, Lara Méndez. O Arde Lucus 2023 celébrase do 22 ao 25 de xuño. [Imaxe: Concello de Lugo]

• 📺 VÍDEOS | Das festas ao viño, da vangarda ao románico: Galicia, segundo os vídeos en Fitur

Xa está dispoñible para a súa libre consulta en internet a versión dixital do libro que recompila os 50 anos de historia de Fuxan os Ventos. Trátase dunha publicación impulsada polo Consello da Cultura galega canda ao grupo e constitúe tamén o catálogo da exposición sobre a traxectoria da formación que acolleu dende o pasado outono O Vello Cárcere de Lugo. A publicación, na que tamén colaboran a Xunta e a Deputación de Lugo, inclúe abondoso material gráfico xunto a textos de Uxía Senlle, Xoán Manuel Estévez, Sabela Fraga e dos propios membros de Fuxan os Ventos.

• REPORTAXE | Das festas ao casete: Fuxan os Ventos celebra o seu 50 aniversario cunha mostra de "amor ao país"
• Unha ducia de momentos dos 50 anos de historia de Fuxan os Ventos

O PP acusa a BNG e PSdeG de manipular “incidencias puntuais” para “desprestixiar o transporte público en autobús, avalado e apoiado polos usuarios. Os propios populares lembran que o pasado ano a Xunta detectou 390 infraccións nas 1.173 expedicións que controlou, nunha de cada tres.

• HEMEROTECA | A Xunta detecta unha infracción cada tres viaxes de bus que inspecciona e abre un expediente cada dous días
• HEMEROTECA | O PPdeG cifra nunhas 400 as liñas de bus escolar que recibiron queixas no inicio do curso

A Xunta abre perfil en Tik Tok para tentar chegar á mocidade. O Goberno galego di prever compartir nesta rede "publicacións de temática cultural, económica, medioambiental ou científica, así como vídeos de concienciación sobre cuestións como a violencia de xénero ou o fomento do uso da lingua galega". Acompaña a súa primeira entrada con Take Me Out, de Franz Ferdinand