Fálase

Centos de persoas secundan a manifestación convocada polo BNG en Moraña para reclamar a "cobertura inmediata" dos postos de persoal médico no centro de saúde da vila. A formación soberanista asegura que viu "desbordadas todas as previsións, con máis de 600 persoas" na mobilización. Na véspera, o alcalde da vila, José Cela (PP) atribuíu a mobilización a razóns "electoralistas" xa que, di, o Sergas fai "esforzos" por cubrir esas prazas pero "non hai médicos" dabondo, recolle o Diario de Pontevedra. [Imaxe: BNG]

• A protesta sanitaria recrúa e a Xunta tenta contela en vésperas da primeira proba electoral para Rueda

Entidades de defensa do galego, éuscaro e catalán homenaxean conxuntamente a Rosalía e Castelao no Panteón de Galegos Ilustres e resaltan a "importancia" de ambas figuras "na loita pola pluralidade lingüística e na defensa das linguas minorizadas do Estado". A Mesa pola Normalización Lingüística, representada polo seu presidente, Marcos Maceira, foi anfitrioa dunha homenaxe á que acudiron representantes da catalá Plataforma per la Llengua e da vasca Kontseilua. [Imaxe: A Mesa]

• HEMEROTECA | A Europa multilingüe cítase en Compostela coa Mesa pola Normalización Lingüística como anfitrioa

Tropas romanas e castrexas do Arde Lucus desfilan polo centro de Madrid dentro da aposta da festa lucense de recreación histórica por incrementar a súa difusión e aspirar ao recoñecemento como Festa de Interese Turístico Internacional. O desfile deste sábado, encadrado na programación do Concello lucense en Fitur, estivo encabezado pola alcaldesa da cidade, Lara Méndez. O Arde Lucus 2023 celébrase do 22 ao 25 de xuño. [Imaxe: Concello de Lugo]

• 📺 VÍDEOS | Das festas ao viño, da vangarda ao románico: Galicia, segundo os vídeos en Fitur

Xa está dispoñible para a súa libre consulta en internet a versión dixital do libro que recompila os 50 anos de historia de Fuxan os Ventos. Trátase dunha publicación impulsada polo Consello da Cultura galega canda ao grupo e constitúe tamén o catálogo da exposición sobre a traxectoria da formación que acolleu dende o pasado outono O Vello Cárcere de Lugo. A publicación, na que tamén colaboran a Xunta e a Deputación de Lugo, inclúe abondoso material gráfico xunto a textos de Uxía Senlle, Xoán Manuel Estévez, Sabela Fraga e dos propios membros de Fuxan os Ventos.

• REPORTAXE | Das festas ao casete: Fuxan os Ventos celebra o seu 50 aniversario cunha mostra de "amor ao país"
• Unha ducia de momentos dos 50 anos de historia de Fuxan os Ventos

O PP acusa a BNG e PSdeG de manipular “incidencias puntuais” para “desprestixiar o transporte público en autobús, avalado e apoiado polos usuarios. Os propios populares lembran que o pasado ano a Xunta detectou 390 infraccións nas 1.173 expedicións que controlou, nunha de cada tres.

• HEMEROTECA | A Xunta detecta unha infracción cada tres viaxes de bus que inspecciona e abre un expediente cada dous días
• HEMEROTECA | O PPdeG cifra nunhas 400 as liñas de bus escolar que recibiron queixas no inicio do curso

A Xunta abre perfil en Tik Tok para tentar chegar á mocidade. O Goberno galego di prever compartir nesta rede "publicacións de temática cultural, económica, medioambiental ou científica, así como vídeos de concienciación sobre cuestións como a violencia de xénero ou o fomento do uso da lingua galega". Acompaña a súa primeira entrada con Take Me Out, de Franz Ferdinand

A banca española concentra tres dos seis directivos do sector en Europa que ingresaron máis de 10 millóns de euros durante 2021. Os datos divulgados pola Autoridade Bancaria Europea, debullados en infoLibre

• Dez anos da quebra definitiva do relato de "solvencia e galeguidade" dos restos das grandes caixas
• Os falcóns do BCE impoñen unha suba histórica de tipos de xuro

Presente en internet desde 1994, o Instituto Galego de Análise e Documentación Internacional (Igadi) vén de renovar este mércores a súa web, un espazo senlleiro de análise internacional desde Galicia e en galego.

• HEMEROTECA | Unha ducia de fitos do Igadi no seu 30 aniversario

Ortiga e Pili Pampín vólvense xuntar no seu "xénero musical sen precedentes" para lanzar O galo (Remix) e seguir a senda do Eu chorar chorei co que conquistaron o público en 2022. O tema chega cun videoclip de estética anime, obra de Xaime Miranda e Antón Miranda. O Galo (Remix), advirten, " é só o principio" porque ambos artistas "levan un ano traballando no seu novo proxecto conxunto"

• 📺EN VINTE | "Eu chorar chorei". Ortiga e Pili Pampín gastan pista na mítica discoteca La Luna
• 🔊PODCAST | Pili Pampín, no Retrocorenta: saímos á noite

Os Bolechas explican a nenas e nenos en que consiste a Educación Social. O colexio profesional de Galicia presentou este mércores un libro para facilitar a explicación da profesión aos máis pequenos.