Fálase

O BOE fai oficial o índice de prezos de alugueiro de vivenda, que permite aplicar límites aos prezos do arrendamento en "zonas tensionadas" se as comunidades autónomas así o dispoñen. Polo momento, só Catalunya tramitou esa solicitude, mentres que a Xunta se nega a aplicala "de oficio" e responsabiliza os concellos de xustificar esas peticións para valorar se as tramita ou non. A Coruña e Santiago xa avanzaron que o pedirán, pero a decisión final depende do Goberno galego

• O Estado publica o índice de prezos de alugueiro de vivenda, aplicable en 'zonas tensionadas' se a Xunta o decidise
• Rueda rexeita "aplicar de oficio" a lei para limitar os alugueiros e responsabiliza os concellos
• As peticións de vivenda protexida á Xunta caen en 1.500 nun mes sen un só piso novo por caducidade das solicitudes

Besteiro, único candidato á secretaría xeral do PSdeG. Ás 15h deste xoves pechou o prazo de precandidaturas sen que se rexistrase ningunha máis. Dende mañá e ata o día 22, o actual deputado por Lugo terá que xuntar avais dun mínimo do 6% da militancia do partido con dereito a voto -son en torno a 10.000- para ser proclamado novo líder cara ao Congreso Nacional do 27 de abril, do que sairá escollida a nova Executiva. Ao ser o único candidato, non se celebrará a votación en primarias que estaba prevista para o día 7 do mesmo mes.

• O PSdeG aspira con Besteiro á ollada a medio prazo que logrou o BNG con Pontón

Rueda adía a "algún tipo de consenso" futuro a renovación do director da CRTVG. O presidente di que Alfonso Sánchez Izquierdo, de 75 anos e con 15 no cargo, non lle trasladou nada sobre o seu futuro e sobre a súa posible remuda engade que sería "respectando a proporcionalidade do resultado electoral". Sánchez Izquierdo pode permanecer indefinidamente no posto grazas a unha reforma legal inserida polo PP en solitario en 2015.

• 15 anos no cargo e 75 de idade: máis olladas sobre a posible remuda do blindado director da CRTVG

O Congreso aproba a lei de amnistía por maioría absoluta: 178 votos a prol (PSOE, SUmar, Junts, ERC, EH-Bildu, PNV, Podemos, BNG e o ex-ministro Ábalos) e 172 en contra (PP, Vox, UPN, CC). O texto segue agora o seu trámite no Senado, onde será rexeitado, e volverá ao Congreso. [Imaxe: © Congreso]

• A amnistía en Catalunya deixa fóra os delitos considerados terrorismo polo dereito europeo

O Goberno de España saca a concurso a primeira fase da restauración dunar da praia de Samil, en Vigo. Recuperamos imaxes do que era o gran areal da ría de Vigo.

• Unha ducia de imaxes do vello Samil que agora inicia a súa recuperación

Pedro Sánchez renuncia a aprobar os Orzamentos de 2024 e prorrogará os de 2023, despois de coñecerse o adianto electoral en Catalunya. O presidente do Goberno central ordena comezar a traballar nos Orzamentos Xerais do Estado de 2025

Corina Porro abandonará a primeira liña política á vez que deixa de ser deputada no Parlamento co inicio da nova lexislatura. Porro envía unha carta á militancia do PP de Vigo na que afirma que marcha "despois de 30 anos de servizo público". Conselleira de Servizos Sociais con Fraga, alcaldesa de Vigo, delegada da Xunta en Vigo, presidenta do Porto de Vigo e presidenta do Consello Económico e Social son algúns dos cargos de responsabilidade que ocupou na súa traxectoria, á que pón fin agora tras non formar parte da candidatura do PP ás pasadas eleccións galegas. [Imaxe de arquivo CC-BY-SA Xunta] 

• PERFIL | Corina Porro, a muller que o foi todo en Vigo, engade agora o cargo de ex-política

Catalunya adianta as eleccións ao 12 de maio para "conseguir un goberno máis forte". O presidente da Generalitat, Pere Aragonès, anunciou este mércores a convocatoria electoral tras unha reunión extraordinaria do seu Consell de Govern despois de que o Parlament rexeitara o proxecto de Orzamentos para 2024, no que ERC contaba co apoio do PSC. O voto en contra dos Comúns na Cámara catalá provocou a crise de goberno que desta vez rematou en eleccións.

• HEMEROTECA | O independentismo alarga a maioría en Catalunya co PSC como forza máis votada 

O Álbum de Galicia do Consello da Cultura incorpora a biografía de Pencha Santasmarinas, alma da loita contra a instalación dunha central nuclear en Xove e activa defensora das melloras profesionais para as mulleres no agro e no mar. O seu perfil na colección dixital de biografías do CCG foi elaborado por Encarna Otero. [Imaxe: Revista Andaina]

• HEMEROTECA (2019) | Adeus a 'Pencha' Santasmarinas, alma da loita contra a nuclear de Xove

Rafa Benítez deixa de ser o adestrador do Celta. Nun comunicado, o club sinala que o técnico "desvincúlase do RC Celta tras oito meses de entrega absoluta e plena dedicación, pero nos que o equipo non obtivo os resultados esperados polo club". Os celestes ocupan a 17ª praza da Liga a só dous puntos do descenso. Será substituído por Claudio Giráldez, ata agora adestrador do Celta Fortuna.