Fálase

Unha avioneta antiincendios, desaparecida desde a tarde do pasado mércores tras despegar da base de Doade en Sober e ser localizado por última vez cando sobrevoaba a provincia de Ourense en dirección á súa base de Córdoba. O dispositivo de busca céntrase agora na fronteira entre Zamora e Ourense. A empresa propietaria do aparello, Plysa, indica que o último contacto foi no mediodía do mércores e que "se activou o dispositivo de busca" de "forma inmediata". "A preocupación máxima é localizar o piloto e atender os seus familiares", agrega nun comunicado.

A Xunta ordena sacrificar máis de 50.000 visóns dunha granxa tras detectar un foco de gripe aviaria. Segundo informa o Goberno galego nun comunicado, na explotación foron tomadas "mostras para o diagnóstico de varias enfermidades, entre elas a provocada polo virus Sars-Cov-2" e a gripe aviaria", tras aparecer "un número anormalmente elevado de visóns enfermos e mortos". Tras confirmar o foco de gripe aviaria A (H5N1), activou un protocolo que implica matar todos os animais da granxa, "que conta con 8.369 femias reprodutoras e 43.617 crías destetadas", isto é, 51.986 en total. O Goberno non especifica a localización da granxa, da que só indica que se atopa "na provincia da Coruña". Na imaxe, un visón nunha destas granxas [CC-BY-SA TheAnimalDay.org], concibidas para fornecer a industria peleteira.

• HEMEROTECA | O Goberno de España quere pechar antes de 2030 todas as granxas de visón, a gran maioría en Galicia
• HEMEROTECA | Un gromo en Carral eleva a 15 os focos do coronavirus detectados en granxas de visóns en Galicia
• HEMEROTECA | Os riscos asociados á COVID reabren o debate sobre o peche das granxas de visóns en Galicia despois de anos de denuncias

Noite treboenta en múltiples puntos do país, con máis de 4.000 raios detectados por Meteogalicia dende a pasada medianoite, case 1.200 estritamente sobre territorio galego. As estacións meteorolóxicas acreditan copiosas precipitacións en numerosas localidades encabezadas por Santa Comba (66 litros por metro cadrado no que vai transcorrido de día 19), Entrimo (47,4) e Zas, Vilanova e Ribeira (os tres por riba dos 30 litros por metro cadrado). [Imaxe: © Meteogalicia]

Desconvocada a folga do metal en Ourense logo de aceptar o persoal a proposta salarial da patronal e tras 13 días de paro. A asemblea de traballadores ratificou o preacordo asinado entre as asociacións empresariais e CIG, UGT e CCOO que supón unha suba salarial do 15% entre 2022 e 2024, co 5% este ano, retroactivo desde xaneiro, a subida do 5,5% para 2023 e outro aumento do 4,5% para 2024.

• O metal en Ourense, en folga por un "convenio digno" e unha suba salarial acorde ao IPC

Stellantis Vigo cesa este martes a produción en toda a fábrica de Balaídos. A maior empresa do automóbil en Galicia volve sinalar a falta de materiais como causa, como se vén producindo no último ano e contamos en Praza.gal, falando cos traballadores. Este peche de 24 horas anunciado agora prodúcese dous días despois de que se coñecesen os resultados das eleccións sindicais na antiga PSA Citroën, que devolveron a maioría ao SIT-FSI, o sindicato corporativo, que acadou 21 representantes. UGT ten agora catro delegados, a CUT e CCOO teñen tres cada un e a CIG ficou sen representación. 

• REPORTAXE | "O dobre de coches coa metade de xente": a incerteza instálase na gran factoría galega do automóbil 
• PODCAST | Fálase: Os papeis de Meirás e a incerteza da Citroën

O TSXG paraliza cautelarmente outro parque eólico de Greenalia en Coristanco e Carballo. O mesmo tribunal vén de tomar a mesma decisión con outra instalación da mesma empresa e o Supremo anulou definitivamente o permiso para o parque do Oribio, noutra sentenza contra a xestión eólica da Xunta. 

• O ‘annus horribilis’ da Xunta nos tribunais pola súa xestión eólica: a xustiza tomba tres parques nos que gobernos de Feijóo xogaron cos prazos

A Coruña será a sede da edición 2023 da Womex, o mercado profesional máis importante das músicas do mundo. O anuncio oficial, adiantado este luns pola alcaldesa Inés Rey e polo director do evento Alex Walter, realizarase a vindeira semana na clausura da presente edición, que comeza este mércores en Lisboa. Entre o 25 e o 29 de outubro do vindeiro ano pasarán pola cidade herculina máis de 3.000 profesionais entre programadores, promotores, artistas e xornalistas chegados de todo o planeta.

A Xunta propón limitar a 100 persoas ao día o acceso ao illote do Areoso, na Illa de Arousa, a partir de Semana Santa. A medida busca mellorar a conservación dos hábitats e da flora a e fauna existentes neste espazo, en grave risco pola presión turística que sofre nos últimos anos. A limitación é inferior á esixida por colectivos ambientais, que veñen alertando da degradación da zona

200 persoas homenaxearon este sábado a Manuel María e a Saleta Goi no barrio coruñés de Monte Alto, onde residiron dende hai 25 anos e ata o falecemento de ambos. No acto organizado pola asociación de veciños e veciñas interviron Camilo Pardo, Alberto Ansede, Felipe Senén, Malena Tenreiro, Xes Senén, Maca Silva e María Xosé Bravo.

• Morre aos 90 anos Saleta Goy, moito máis que a viúva de Manuel María

Máis 136.000 persoas maiores de 60 anos xa recibiron a cuarta dose da vacina contra a COVID en Galicia. Este luns rematará a vacinación do colectivo entre 80 e 84 anos e este venres comezou xa a vacinación da poboación entre 70 a 79 anos.