Fálase

Stellantis Vigo cesa este martes a produción en toda a fábrica de Balaídos. A maior empresa do automóbil en Galicia volve sinalar a falta de materiais como causa, como se vén producindo no último ano e contamos en Praza.gal, falando cos traballadores. Este peche de 24 horas anunciado agora prodúcese dous días despois de que se coñecesen os resultados das eleccións sindicais na antiga PSA Citroën, que devolveron a maioría ao SIT-FSI, o sindicato corporativo, que acadou 21 representantes. UGT ten agora catro delegados, a CUT e CCOO teñen tres cada un e a CIG ficou sen representación. 

• REPORTAXE | "O dobre de coches coa metade de xente": a incerteza instálase na gran factoría galega do automóbil 
• PODCAST | Fálase: Os papeis de Meirás e a incerteza da Citroën

O TSXG paraliza cautelarmente outro parque eólico de Greenalia en Coristanco e Carballo. O mesmo tribunal vén de tomar a mesma decisión con outra instalación da mesma empresa e o Supremo anulou definitivamente o permiso para o parque do Oribio, noutra sentenza contra a xestión eólica da Xunta. 

• O ‘annus horribilis’ da Xunta nos tribunais pola súa xestión eólica: a xustiza tomba tres parques nos que gobernos de Feijóo xogaron cos prazos

A Coruña será a sede da edición 2023 da Womex, o mercado profesional máis importante das músicas do mundo. O anuncio oficial, adiantado este luns pola alcaldesa Inés Rey e polo director do evento Alex Walter, realizarase a vindeira semana na clausura da presente edición, que comeza este mércores en Lisboa. Entre o 25 e o 29 de outubro do vindeiro ano pasarán pola cidade herculina máis de 3.000 profesionais entre programadores, promotores, artistas e xornalistas chegados de todo o planeta.

A Xunta propón limitar a 100 persoas ao día o acceso ao illote do Areoso, na Illa de Arousa, a partir de Semana Santa. A medida busca mellorar a conservación dos hábitats e da flora a e fauna existentes neste espazo, en grave risco pola presión turística que sofre nos últimos anos. A limitación é inferior á esixida por colectivos ambientais, que veñen alertando da degradación da zona

200 persoas homenaxearon este sábado a Manuel María e a Saleta Goi no barrio coruñés de Monte Alto, onde residiron dende hai 25 anos e ata o falecemento de ambos. No acto organizado pola asociación de veciños e veciñas interviron Camilo Pardo, Alberto Ansede, Felipe Senén, Malena Tenreiro, Xes Senén, Maca Silva e María Xosé Bravo.

• Morre aos 90 anos Saleta Goy, moito máis que a viúva de Manuel María

Máis 136.000 persoas maiores de 60 anos xa recibiron a cuarta dose da vacina contra a COVID en Galicia. Este luns rematará a vacinación do colectivo entre 80 e 84 anos e este venres comezou xa a vacinación da poboación entre 70 a 79 anos.

O Sindicato Independiente de Trabajadores (SIT-FSI) gaña as eleccións sindicais en Stellantis Vigo (a antiga Citroën), ampliando a súa maioría con 21 delegados (un máis). UGT obtivo catro representantes (os mesmos que en 2018), a CUT tres (un menos), CCOO tres (un menos) e a CIG ficou sen representación, perdendo os seus dous delegados anteriores

Un xulgado da Coruña require ao Estado que identifique que bens do inventario do pazo de Meirás reclama na demanda presentada en Madrid. Pide que “de forma detallada e separada” indique que obxectos do inventario realizado o 11 de novembro de 2020 son obxecto da demanda que presentou a administración pola propiedade de máis de 500 bens do pazo de Meirás

A Confederación Hidrográfica do Miño-Sil declara o Pedregal de Irimia, no Concello de Meira, nova Reserva Natural Fluvial co obxectivo de "protexer esta zona de alto valor ecolóxico". A protección abranguerá 140 hectáreas deste espazo, que é un dos posibles lugares de nacemento do río Miño, unha condición que comparte coa lagoa de Fonmiñá, na Pastoriza. Nos últimos anos varias entidades denunciaron a "eucaliptización" do pedregal e a construción de parques eólicos na contorna.

• O Pedregal de Irimia, primeira reserva hidrolóxica subterránea de Galicia

CRISE DE PREZOS | A inflación moderouse en setembro ata situarse en Galicia no 9,2% interanual, case dous puntos menos que en agosto. O dato galego segue por riba da media estatal, que tamén frea máis dun punto e medio e queda no 8,9%. A diminución dos custos do transporte (coa entrada en vigor dos abonos gratuítos da Renfe e dos descontos nos autobuses) e da electricidade é clave neste descenso, mentres o groso dos prezos dos alimentos segue á alza. 

• AMPLIAMOS 👉 A inflación modérase polo abaratamento de luz, transporte e combustibles, pero os alimentos seguen en prezos máximos