O Bloque Nacionalista Galego celebra os seus 40 anos no lugar da súa fundación, o frontón de Riazor. Están presentes a dirección nacional do partido, responsables políticos e militancia, xunto a moitas das persoas que protagonizaron aquela histórica xornada do 25 de setembro de 1982. O portavoz municipal do BNG no Concello da Coruña, Francisco Jorquera, deu a benvida a un acto no que intervirán militantes ao longo destes anos e que concluirá coa intervención da portavoz nacional, Ana Pontón.
Fálase
O arquitecto pontevedrés César Portela ingresa na Real Academia Galega de Belas Artes como académico de honra. No seu discurso de ingreso, pronunciado este sábado nun acto celebrado no Pazo de Baión [rehabilitado por el], o Premio Nacional de Arquitectura no ano 2000 salientou que “a arquitectura é arte e técnica a un tempo, pero arte e técnica ao servizo da sociedade. A función social é, xustamente, o que converte a arquitectura en algo de necesaria utilidade, imprescindible, nunca gratuíto”.
Martiño Noriega, novo portavoz nacional de Anova. A formación nacionalista “reactívase” coa escolla por parte da Coordinadora Nacional dunha Comisión Permanente. Na nova directiva, Noriega estará acompañado por Oriana Méndez, concelleira da Marea de Vigo, que asumirá as relacións políticas. Tamén estarán Xosé Manuel Beiras, Antonio Negreira (municipalismo), Miguel Anxo Fernán-Vello (comunicación), Iria Otero (finanzas), Iván Rodríguez (servizos públicos e movementos sociais) e Antía Comesaña (organización).
"O arroupe ás candidaturas municipais onde Anova está a participar en solitario ou xunto a outras sensibilidades políticas da esquerda do país e o acompañamento aos movementos sociais en defensa do territorio e dos servizos públicos, conformarán as prioridades de actuación nos vindeiros meses", sinalan desde o partido.
A Oficina Técnica da Seca da Xunta declara a alerta por escaseza de auga nos encoros de Zamáns e Baíña, que abastecen aos concellos de Nigrán, Baiona e a unha parte do concello de Vigo. Ademais, amplíase a prealerta pola pouca presenza de auga ao sistema de explotación do río Verdugo, ás rías de Vigo e Baiona; e ao sistema da costa de Pontevedra. Na xuntanza deste venres [na imaxe], presidida pola directora de Augas de Galicia, "constatouse que os caudais circulantes continúan en valores inferiores habituais para esta época do ano, un 30% por debaixo da media dos últimos dez anos".
Endesa anuncia que cederá 26 hectáreas nas Pontes para unha fábrica de rodas da chinesa Sentury, coa que a Xunta ten un compromiso de confidencialidade. A enerxética vincula con ese proxecto a instalación de parques eólicos con 191 megavatios. Na superficie que Endesa deixa de precisar nas Pontes polo peche da súa central tamén quere instalarse un novo proxecto de Ence.
Pedro Sánchez anuncia que presentará a súa candidatura para presidir a Internacional Socialista e faino desde Nova York, onde está a participar na asemblea xeral da ONU e noutros encontros. "Somos os socialdemócratas quen apostamos sempre por avanzar, por conquistar novos dereitos e liberdades e o seguiremos facendo", asegurou o presidente do Goberno de España e líder do PSOE. [Imaxe: Sánchez nun acto nos Estados Unidos © Pool Moncloa/Borja Puig de la Bellacasa]
A asemblea local do BNG de Pontevedra ratifica que Miguel Anxo Fernández Lores volverá ser o candidato nacionalista na cidade e optará á revalidación da alcaldía –na que leva desde 1999– nas eleccións de 2023. En Lugo, o actual tenente da Alcaldía e voceiro municipal do BNG, Rubén Arroxo, rexistrou a súa candidatura para volver ser cabeza de lista de cara ás vindeiras municipais, "unhas eleccións nas que o BNG vai optar a todo".
A ministra de Facenda anuncia un imposto ás grandes fortunas temporal e aplicable desde 2023. María Jesús Montero asegura que "as circunstancias dirán se é necesario ou non prorrogalo" e cualifica de "irresponsabilidade" que comunidades presididas polo PP aposten por suprimir o Imposto sobre Patrimonio.
O Senado aproba definitivamente por unanimidade a reforma do voto exterior, que entre outros aspecto suprime o sufraxio rogado para participar nas eleccións dende o estranxeiro. Con esta votación recibe o seu visto e prace definitivo a lei, que entre outros aspectos establece un novo modelo de votación en urna e por correo ou que o censo exterior se revise cada cinco anos para suprimir inscricións de persoas falecidas e corrixir posibles erros. Xa estará en vigor, daquela, para as vindeiras eleccións xerais e galegas (nas municipais non participan as persoas inscritas no Censo de Residentes Ausentes)
Xosé Manuel Beiras recibe o premio Luis Porteiro Garea da Universidade de Santiago, que recoñece o seu labor a prol da lingua galega como profesor e catedrático da propia USC. Se o galego é tratado como terceiro idioma por tras do castelán e o inglés, advertiu no seu discurso, "así non se constrúen sociedades democráticas, nin se consegue que os cidadáns non sexan súbditos". O encargado de trazar o perfil e loa do premiado foi o profesor Xavier Vence, quen como Beiras tamén fora portavoz nacional do BNG; posteriormente, o histórico nacionalista encabezou o Encontro Irmandiño e mais Anova e foi deputado no Parlamento por AGE. [Imaxe: © Santi Alvite / USC]