Fálase

Xosé Manuel Beiras recibe o premio Luis Porteiro Garea da Universidade de Santiago, que recoñece o seu labor a prol da lingua galega como profesor e catedrático da propia USC. Se o galego é tratado como terceiro idioma por tras do castelán e o inglés, advertiu no seu discurso, "así non se constrúen sociedades democráticas, nin se consegue que os cidadáns non sexan súbditos". O encargado de trazar o perfil e loa do premiado foi o profesor Xavier Vence, quen como Beiras tamén fora portavoz nacional do BNG; posteriormente, o histórico nacionalista encabezou o Encontro Irmandiño e mais Anova e foi deputado no Parlamento por AGE. [Imaxe: © Santi Alvite / USC]

Putin mobiliza 300.000 reservistas no marco da invasión da Ucraína entre mencións ao uso de armas nucleares. Político traduce ao inglés o decreto íntegro de mobilización [nesta ligazón, tradución automática ao galego] e analiza as implicacións deste movemento tras sete meses de guerra.

• "Ucraína xa non abre portadas e non chega tanta axuda, pero hai moita xente que segue sufrindo"

Dirixentes do PSOE instan a Feijóo a facer públicos os seus ingresos como líder do PP tras negarse o partido a revelar se lle paga un soldo adicional ao que ten como senador por designación do Parlamento de Galicia e mais a aclarar se lle abona os gastos de vivenda en Madrid, a preguntas de infoLibre. Os conservadores remítense a cando o ex-presidente teña que actualizar a súa declaración de bens ante o Senado.

• En infoLibre 👉O PP oculta o soldo de partido de Feijóo e se lle paga a vivenda que ocupa en Madrid
• HEMEROTECA | Pedro Sánchez non espera as dúas semanas de Touriño
• HEMEROTECA | A primeira declaración de bens de Feijóo en Madrid reflicte que é accionista de Inditex e investidor con Abanca

Pontón reclama a aprobación dunha lei do viño que avale medidas como "contratos homologados con prezos mínimos para a uva"  que dean "estabilidade ao sector" e un sistema de financiamento a través do Igape que permita "o pago ao contado" da materia prima. A portavoz nacional do BNG lanzou esta e outras propostas durante unha visita á vendima na adega do Pazo Baión, da cooperativa Condes de Albarei, integrada por unhas 400 familias do Salnés.

• MANS DA GALICIA QUE VÉN | "Se as administracións non se poñen xa mans á obra, o rural acabará sendo un parque temático"
• HEMEROTECA | Dos puntos Parker ás recomendacións dos medios internacionais: O viño galego ponse de moda
• HEMEROTECA | Dunha ducia a máis de 200 viños etiquetados en galego nunha década

O Consello de Ministros aproba a baixada do IVE do gas, que pasa do 21% ao 5% dende outubro. Confirma, ademais, que Galicia recibirá 11,28 millóns de euros do total de 172 distribuídos para o Plan de Acción de Atención Primaria que, ten, entre outros obxectivos o de "fomentar a calidade asistencial e a práctica baseada na evidencia científica" con, por exemplo, maior integración entre a atención dos centros de saúde e os hospitais. [Imaxe: © Pool Moncloa/Diego del Monte]

• A UE chama ao aforro enerxético e recortará os beneficios das eléctricas: "O mercado xa non funciona"
• HEMEROTECA | O gas que dispara o prezo da luz é a quinta parte da enerxía da que dispón Galicia e xera o 14% da electricidade

Falece a académica da Real Academia Galega de Belas Artes Ana Goy Diz. Catedrática de Historia da Arte da Universidade de Santiago, onde exercía desde a Facultade de Humanidades do Campus de Lugo, Goy Diz accedeu á Real Academia Galega de Belas Artes como académica numeraria o pasado mes de maio cun discurso de ingreso arredor da “Ribeira Sacra: a construción dunha paisaxe cultural”. Nos últimos anos, a historiadora lucense formou parte activa dos traballos para a promoción da Ribeira Sacra como Patrimonio da Humanidade. 

O Estado autoriza a Endesa a pechar dous dos catro grupos da central térmica das Pontes e condiciona a autorización ao peche dos outros dous "ao reforzo da dispoñibilidade de potencia no sistema eléctrico". Faino tras pedir novos informes a Red Eléctrica "á vista das tensións provocadas nos mercados enerxéticos pola guerra na Ucraína e a elevada exportación de electricidade provocada pola seca e a indispoñibilidade de boa parte do parque nuclear francés". [Imaxe: © Endesa]

• AMPLIAMOS 👉 O Estado autoriza o peche de media central de Endesa nas Pontes
• HEMEROTECA | A demora do peche definitivo planea sobre a térmica das Pontes e o persoal da central pide acelerar os proxectos de renovables
• HEMEROTECA | Endesa insiste en pechar nas Pontes e "acelerar o cumprimento dos compromisos de descarbonización"

A derradeira fin de semana do verán finaliza en Galicia con temperaturas de ata 35 graos en comarcas do interior e co termómetro entre 25 e 30 graos de máxima na maior parte do país, segundo datos de Meteogalicia. Así e todo, resalta que no terzo norte houbo localidades que non pasaron dos 20.

Rueda anuncia a súa primeira viaxe internacional como presidente, que terá Arxentina e Uruguai como destino do 13 ao 17 de outubro, entre a primeira e a segunda xeira de xuntanzas con alcaldes e alcaldesas. "Terá unha axenda marcada por encontros con representantes diplomáticos españois e con autoridades do máis alto nivel de ambos os dous países", indica a Xunta nun comunicado. Na imaxe, o presidente da Xunta co secretario xeral de Emigración.

• HEMEROTECA | Volve o 'voto emigrante': papeletas por internet, depuración de censo e medio millón de sufraxios en xogo en Galicia
• HEMEROTECA | O 73% da poboación considerada legalmente galega no estranxeiro non naceu en Galicia

O Breogán gaña a Copa Galicia de baloncesto masculino tras vencer por 79-82 ao Obradoiro nunha igualada final que se decidiu nos instantes finais do partido. Nas semifinais do torneo, disputado no Paco Paz de Ourense, os dous equipos galegos da ACB eliminaran aos dous da LEB Ouro: o conxunto compostelán impúxose ao Básquet Coruña por 99-78 e o lucense, ao Club Ourense Baloncesto por 59-97. [Imaxe: © Federación Galega de Baloncesto]