Fálase de En marcha as pri...

Ir ao máis recente

sábado 3, outubro 2026 ás 13:06 David Lombao @davidlombao
En marcha as primeiras mobilizacións da xornada pola vivenda en Galicia, as de Santiago, Ourense e Ferrol. Esta tarde (19:00) continúan as protestas en Vigo, A Coruña e Lugo e o luns, en Pontevedra. Nesta ligazón, todos os detalles das convocatorias e o máis destacado das manifestacións, este serán en Praza.gal. Na imaxe, inicio da concentración na compostelá Praza do Obradoiro, este mediodía, á que tamén acudiron a portavoz nacional do BNG, Ana Pontón, e o secretario xeral do PSdeG, José Ramón Gómez Besteiro. [CC BY-NC-SA CA]
venres 2, outubro 2026 ás 14:49 Praza Pública @prazapublica

Varias persoas feridas de gravidade tras a explosión nunha canteira no Porriño. O suceso tivo lugar durante unha voadura na parroquia de Atios e, segundo o 112, hai catro traballadores feridos e "accesibles".
venres 2, outubro 2026 ás 14:41 Praza Pública @prazapublica

Segundo ataque fascista á Cruz Vermella en Ferrol en dúas semanas. Unha furgoneta da entidade sofre a rotura dun vidro e aparece pintada cunha esvástica tras as pintadas sufridas o pasado 22 de setembro na súa sede, que tamén fora atacada en abril.
venres 2, outubro 2026 ás 13:17 David Lombao @davidlombao
PP, PSdeG e BNG abandonan o pleno do Concello de Ourense despois de que Jácome "insultase reiteradamente os integrantes dos grupos da oposición" descualificando como "etarras" aos membros do Bloque. Nun comunicado conxunto, populares, socialistas e nacionalistas censuran "faltas de respecto, insultos, interrupcións e ameazas" do alcalde: "Non pode seguir tolerándose". Jácome esgrime que "levan toda a vida chamándome a min fascista".
- HEMEROTECA | A censura non baixa o Miño coma os sumarios xudiciais
- HEMEROTECA | O acordo PP-PSdeG e a promesa de Rueda que romperon os populares para volver pactar con Jácome
- 🔊 HEMEROTECA - PODCAST | Anatomía do de Ourense
xoves 1, outubro 2026 ás 16:06 David Lombao @davidlombao
Jácome logra aprobar o Orzamento de Ourense para 2026 co seu voto de calidade. A marcha do grupo do PSdeG (5 edís), que renunciou a participar na votación, engadida á ausencia dun edil do PP e á inesperada presenza dun concelleiro de Democracia Ourensana, enfermo dende hai meses, deu lugar a un empate a 10 votos (os de DO fronte aos 6 do PP e os 4 do BNG) que pemitiu ao alcalde desempatar e afrontar o ano electoral coas contas deste exercicio aprobadas. O rexedor constata que "a ausencia no pleno dun concelleiro do PP cambiou a aritmética" e celebra a aprobación como "moi boa" para a cidade. Na fotografía, Pérez Jácome nunha comparecencia pública.
- HEMEROTECA | A censura non baixa o Miño coma os sumarios xudiciais
- HEMEROTECA | O acordo PP-PSdeG e a promesa de Rueda que romperon os populares para volver pactar con Jácome
- 🔊 HEMEROTECA - PODCAST | Anatomía do de Ourense
xoves 1, outubro 2026 ás 15:13 David Lombao @davidlombao
O PNV votará a prol do Real Decreto-Lei que contén o groso das medidas de vivenda aprobadas polo Goberno de España e confirma o seu "non" ao que contempla os alugueiros indefinidos. Isto implica que o segundo decreto será derrogado e que a vixencia do primeiro segue nas mans de Junts per Catalunya, que decide nunha xuntanza interna este serán o sentido do seu voto. Na imaxe, Maribel Vaquero, voceira do PNV no Congreso.
- O Estado autoriza subir o IBI aos pisos turísticos ata un 150% na Coruña e Santiago
- Prórroga de alugueiros e freo a desafiuzamentos de persoas pobres: claves dos decretos de vivenda
xoves 1, outubro 2026 ás 8:25 David Lombao @davidlombao
Chega ao BOE o segundo dos Reais Decretos-Lei sobre vivenda, que regula prórrogas automáticas e renovacións de contratos de alugueiro para "reforzar a súa estabilidade". Entre os seus preceptos, unha indemnización equivalente a doce meses de renda para as persoas inquilinas ás que a propiedade non lles renove o contrato sen causa xustificada.
- O Estado autoriza subir o IBI aos pisos turísticos ata un 150% na Coruña e Santiago
- Prórroga de alugueiros e freo a desafiuzamentos de persoas pobres: claves dos decretos de vivenda
mércores 30, setembro 2026 ás 8:31 David Lombao @davidlombao
O Boletín Oficial do Estado publica o Real Decreto-Lei co groso das medidas en materias de vivenda aprobadas este martes polo Consello de Ministros. Polo momento non foi publicado o segundo, o relativo a renovacións automáticas de contratos de alugueiro e medidas a prol da duración indefinida destes.
- Prórroga de alugueiros e freo a desafiuzamentos de persoas pobres: claves dos decretos de vivenda
- O Estado autoriza subir o IBI aos pisos turísticos ata un 150% na Coruña e Santiago
martes 29, setembro 2026 ás 13:21 David Lombao @davidlombao
Feijóo promete que "as mutuas poidan dar altas" a persoal de baixa médica con "determinadas patoloxías" se logra chegar ao Goberno de España. O ex-presidente e actual líder estatal do PP asegurouno nun acto con empresarios en Catalunya -na imaxe-, onde incidiu na ofensiva política a respecto do persoal de baixa laboral que os populares xa están a aplicar dende a Xunta. [© PP]
martes 29, setembro 2026 ás 12:29 David Lombao @davidlombao
O Goberno de España aproba dous decretos de vivenda con medidas como suspensión de desafiuzamentos para poboación vulnerable, freos á compra de pisos por fondos voitre ou prórrogas na vixencia de arrendamentos, segundo transcendeu. Tras a reunión do Consello de Ministros o Executivo detallará as medidas, que pide votar no Congreso este mesmo venres: se logran a maioría precisa seguirán en vigor e se non, quedarán derrogados. Máis información, hoxe en Praza.gal. Na imaxe, Pedro Sánchez visitando unha promoción de vivendas de alugueiro accesible este pasado luns en Barcelona [© Pool Moncloa / Sandra Armada]