Fálase

O propietario de Sargadelos, Segismundo García, increpa a José Ramón Gómez Besteiro por realizar declaracións aos medios no "terreo da propiedade" da empresa en Cervo, onde o secretario xeral do PSdeG acudiu canda outros cargos do partido para apoiar o persoal. "Poña un marco que diga propiedade privada", ironizou o líder socialista en resposta a García. O empresario, sinala o partido, "tentou interromper a gravación". [Imaxe: PSdeG]

• 📺 AMPLIAMOS - CON VÍDEO 👉 O dono de Sargadelos increpa a Besteiro mentres esixe coñecer "que tipo de acordo" ten coa Xunta
• HEMEROTECA | Sargadelos pacta coa Xunta "a maior flexibilidade" nas "posibles melloras" para volver producir en Cervo
• HEMEROTECA | Falan as traballadoras de Sargadelos en Cervo: "Os valores do inicio están desaparecidos" 

Este mércores é unha xornada de alerta amarela por treboadas en gran parte de Galicia. MeteoGalicia sinala que a "chegada dunha fronte desde o sur mesturará o aire cálido destes días co aire máis frío da borrasca producindo inestabilidade e tormentas". Nesta ligazón, o detalle dos avisos meteorolóxicos para hoxe. Nas imaxes, de MeteoGalicia, os concellos en alerta amarela e as chuvias previstas.

Rueda confirma que este mércores, 30 de abril, "todos os centros educativos e escolas infantís funcionarán con normalidade". O presidente ratifica, ademais, que a xestión da emerxencia volve pasar á Xunta tras considerar o Goberno de España que xa non se dan as circunstancias para seguir retendo o control nas autonomías que solicitaron o denominado nivel 3, entre elas Galicia. O titular do Executivo galego informa, asemade, de que "todas as tramitacións administrativas de procedementos que rematasen onte ou hoxe" serán ampliadas en dous días para compensar o posible impacto do apagamento. Na imaxe, Rueda no serán deste martes en San Caetano. [CC BY-SA David Cabezón / Xunta]

• Medio día de apagamento para varias xornadas de consecuencias
• As mensaxes "contraditorias" da Xunta provocan "caos" e "confusión" nos centros educativos

A Xunta eleva a seis as mortes durante o apagamento. O vicepresidente Diego Calvo suma tres falecementos máis "por distintas circunstacias" aos dos tres membros dunha familia veciña de Taboadela no período de tempo no que Galicia permaneceu sen electricidade. Desde a central de emerxencias do 112 Calvo informou de que os falecidos foron un home de 59 anos que padecía varias patoloxías e foi localizado sen vida no seu fogar en Ferrol, un home de 80 anos que faleceu durante a noite en Betanzos e outro de 86 que morreu esta mañá en Dumbría. [📸 David Cabezón / Xunta]

• Medio día de apagamento para varias xornadas de consecuencias

Morren tres persoas en Taboadela (Ourense) debido a unha posible intoxicación por monóxido de carbono causada pola mala combustión dun xerador eléctrico durante o apagamento. A familia acendera o aparello para poder manter en funcionamento unha máquina de respiración asitida que necesitaba un dos tres falecidos.

Red Eléctrica descarta que o apagamento se producira por un “incidente de ciberseguridade”, indicando que non se produciu "ningún tipo de intrusión no sistema de control de Red Eléctrica". Tamén desbota "completamente" a posibilidade de que o problema tivera a súa orixe nalgún tipo de fenómeno meteorolóxico, como unha alteración súbita das temperaturas, como foi apuntado por algunhas persoas. Eduardo Prieto, responsable da empresa, explicou nunha comparecencia ante os medios de comunicación que aínda non finalizou a investigación sobre o que puido suceder e sinalou que “pode levar tempo" coñecer con exactitude o acontecido.

Este martes hai 3 anos da dimisión de Alberto Núñez Feijóo como presidente da Xunta. Foi o primeiro presidente que deixou voluntariamente o cargo, para pasar a liderar o PP a nivel estatal logo da dimisión forzada de Pablo Casado por querer investigar presuntas irregularidades da presidenta da Comunidad de Madrid, Isabel Díaz Ayuso.

• HEMEROTECA (29/4/2022) | Dimite Alberto Núñez Feijóo, quinto presidente da Xunta de Galicia

APAGAMENTO | A Xunta garante os servizos sanitarios "grazas aos grupos electróxenos". O presidente Rueda activa o Plan de Emerxencias de Galicia.

• AMPLIAMOS | Un apagamento masivo na Península afecta ás comunicacións mentres os servizos críticos mantéñense con xeradores

Interrompido o subministro eléctrico en amplas zonas da Península Ibérica sen que polo momento se coñezan as razóns. En Galicia, o apagamento atinxe cando menos ás principais cidades e afecta tamén, segundo puido confirmar Praza, a equipamentos públicos coma hospitais.

Red Eléctrica confirma un "cero ocorrido no sistema peninsular" e asegura ter activos "plans de reposición do subministro en colaboración coas empresas do sector". "Estanse analizando as causas e dedicando todos os recursos para solventalo", agrega.

• AMPLIAMOS | Un apagamento masivo na Península afecta ás comunicacións mentres os servizos críticos mantéñense con xeradores

"Amor de auga lixeira", do IES Rafael Dieste, gaña o premio Imaxina. O proxecto do alumnado de 3º da ESO do Instituto Rafael Dieste, baixo a coordinación da profesora Mónica Reixía, obtén o galardón da feira científica en recoñecemento ao seu compromiso social. "Amor de auga lixeira" é unha iniciativa que procura a reivindicación e recuperación das fontes tradicionais da cidade mediante: análise da calidade das augas, estudo de potabilidade, creación de contidos dixitais, catalogación patrimonial ou elaboración de roteiros. O premio inclúe material dixital, 500 euros para gasto en material de laboratorio e a viaxe ao País Vasco para participar na feira científica Zientzia Azoka de Bilbao. 

• "O Dépor é da Coruña": 'Aquí tamén se fala' aprema o club a usar o topónimo oficial nunha ambiciosa campaña
• Aquí tamén se canta en galego: a iniciativa do IES Rafael Dieste trae agora un festival gratuíto
• REPORTAXE | Cando a mocidade asume a dinamización da lingua: ‘Aquí tamén se fala’ chega a 150 institutos