Fálase

"Amor de auga lixeira", do IES Rafael Dieste, gaña o premio Imaxina. O proxecto do alumnado de 3º da ESO do Instituto Rafael Dieste, baixo a coordinación da profesora Mónica Reixía, obtén o galardón da feira científica en recoñecemento ao seu compromiso social. "Amor de auga lixeira" é unha iniciativa que procura a reivindicación e recuperación das fontes tradicionais da cidade mediante: análise da calidade das augas, estudo de potabilidade, creación de contidos dixitais, catalogación patrimonial ou elaboración de roteiros. O premio inclúe material dixital, 500 euros para gasto en material de laboratorio e a viaxe ao País Vasco para participar na feira científica Zientzia Azoka de Bilbao. 

• "O Dépor é da Coruña": 'Aquí tamén se fala' aprema o club a usar o topónimo oficial nunha ambiciosa campaña
• Aquí tamén se canta en galego: a iniciativa do IES Rafael Dieste trae agora un festival gratuíto
• REPORTAXE | Cando a mocidade asume a dinamización da lingua: ‘Aquí tamén se fala’ chega a 150 institutos

Yolanda Díaz asegura que o Goberno comparte o rexeitamento “á aberración ambiental de Altri”. Yolanda Díaz cualifica o proxecto de Altri de aberración ambiental e asegura que o rexeitamento é compartido no seo do Goberno. Durante unha entrevista na Cadena Ser Galicia, Díaz considera unha barbaridade o apoio da Xunta á macrocelulosa proxectada en Palas de Rei. 

No que respecta a Sargadelos, tras os despedimentos comunicados, advirte de que a lei manda, polo que o Goberno non aceptará "chantaxes". Díaz informou que xa enviou unha carta a Segismundo García, a quen pide que recapacite.

Os premios Follas Novas recoñecen a Rosa Aneiros en narrativa, María Landesa en poesía e Paula Carballeira en teatro. Os premios Follas Novas do Libro Galego veñen de entregar os seus galardóns anuais no Teatro Principal de Santiago. O premio á obra de narrativa foi para A noite das cebolas, de Rosa Aneiros (Edicións Xerais de Galicia). O premio ao libro de poesía recoñeceu Os pozos elegantes das clavículas, de María Álvarez Landesa (Alvarellos Editora). E o premio ao libro de teatro foi para Ubasute, de Paula Carballeira (Editorial Galaxia). 

• AMPLIACIÓN | Os Follas Novas premian a Rosa Aneiros en narrativa, María Landesa en poesía e Paula Carballeira en teatro
• Os Premios Follas Novas recoñecen a Susana S. Arins ou Silvia Penas nunha edición dominada polas escritoras
• Berta Dávila, Ledicia Costas, Antía Otero, Eva Mejuto: os Premios Follas Novas do libro galego son das mulleres

Manuel Rivas e Daniel Salgado, gañadores dos Premios da Crítica Española. Os Premios da Asociación Española da Crítica recoñeceron as obras publicadas en 2024 dos escritores galegos Manuel Rivas e Daniel Salgado, xunto coas de Luís Garde, Eduardo Halfon, Tomás Sánchez Santiago, Joan Vigó, Adrià Targa e Karmele Mitxelena.

Sargadelos anuncia tres despedimentos na factoría de Cervo tras o expediente da Inspección de Traballo. Sargadelos comunicou este venres tres despedimentos nas súas instalacións de Cervo, cuxa fábrica se atopa actualmente expedientada pola Inspección de Traballo debido a deficiencias en materia de seguridade laboral, segundo informou o xornal El Progreso, citando a Europa Press. Estes despedimentos laborais prodúcense apenas dúas semanas despois do polémico peche temporal que o propietario, Segismundo García, impuxo a principios de mes como resposta ao expediente sancionador.

• Sargadelos pacta coa Xunta "a maior flexibilidade" nas "posibles melloras" para volver producir en Cervo
• Falan as traballadoras de Sargadelos en Cervo: "Os valores do inicio están desaparecidos"
• O dono de Sargadelos anuncia o peche para non cumprir coa Inspección de Traballo

O BNG reclama ao Goberno manter os caixeiros multitarxeta no rural galego. O Bloque Nacionalista Galego vén de reclamar ao Goberno do Estado que rectifique con urxencia a súa decisión de retirar os caixeiros multitarxeta instalados por Correos no rural galego e garanta a continuidade e ampliación deste servizo esencial. A senadora do BNG, Carme da Silva, rexistra unha batería de iniciativas na cámara alta co obxectivo de frear a supresión destes dispositivos e instar á súa restitución inmediata nas localidades afectadas.

• HEMEROTECA | Na vila xa non hai banco: a exclusión financeira agrávase en Galicia coa nova vaga de peches de oficinas
• HEMEROTECA | Galicia perdeu máis da metade das súas oficinas bancarias dende o 2008 e 45 concellos carecen xa de sucursal

O alcalde de Agolada, condenado a tres anos e medio de cárcere e inhabilitado 13 anos e medio por falsidade documental e prevaricación ao precintar a depuradora dunha empresa dedicada ao sector lácteo. A Audiencia de Pontevedra sentencia que a orde de precinto "foi tomada polo alcalde prescindindo total e absolutamente de todo trámite procedemental". O rexedor, Luís Calvo, goberna en maioría absoluta á fronte do partido Anticorrupción y Justicia. 

O Goberno central aprobará o próximo martes o proxecto de lei de redución da xornada laboral. Iniciará así a súa tramitación parlamentaria coa que se pretende baixar a xornada das 40 horas semanais ás 37,5. 

Ratificada a condena ao editor de La Región por dar unha puñada a Jácome. O Tribunal Superior de Xustiza de Galicia (TSXG) desestima o recurso de Óscar Outeiriño contra a sentenza da Audiencia de Ourense que o condenou o pasado decembro como autor dun delito leve de lesións e o absolveu de atentado á autoridade. No xuízo, Outeiriño desculpouse e atribuíu o golpe a "provocacións" previas do líder de DO. A condena supón unha multa de 600 euros e unha indemnización de 3.180 euros.

• HEMEROTECA | O alcalde de Ourense denuncia o editor de La Región por unha presunta agresión ás portas do auditorio
• HEMEROTECA | Cuarta sentenza xudicial contra os intentos da Deputación de Ourense de pagar ao xornal La Región 2,7 millóns polo seu arquivo

A Xunta propón que o vindeiro curso escolar comece o 8 de setembro e remate o 19 de xuño. Así o recolle o borrador que a Consellería de Educación vén de remitir aos sindicatos da mesa sectorial docente.