Fálase

A Xunta avanza a programación dos Concertos do Xacobeo, con bandas e artistas como Rosalía, Tanxugueiras, C. Tangana, Xoel López, Rozalén, Luis Fonsi ou Rufus Wainwright, entre outros. Nalgúns casos, trátase de actuacións organizadas especificamente para o Xacobeo e noutros, de concertos en festivais xa existentes, coma o Resurrection Fest, O Son do Camiño, o Festival de Ortigueira, Portamérica ou o Caudal Fest. O Goberno galego especifica que hai aínda datas por confirmar, como un concerto de Muse nun "lugar por determinar". A programación irá actualizándose no sitio web dos Concertos do Xacobeo

O PPdeG proclama a Rueda candidato único á sucesión de Feijóo como presidente do partido no congreso que celebrará o vindeiro maio. O acordo entre as baronías provinciais propiciou que non teña rivais.

• Rueda anuncia que percorrerá Galicia para “merecer o apoio de todos” como candidato á presidencia do PPdeG
• O PPdeG aclamará a Rueda como sucesor de Feijóo nun congreso sen teses políticas o 21 e 22 de maio en Pontevedra

Xa se pode ver na rede a conversa entre Margarita Ledo e Xabier Fortes, que protagonizan o primeiro programa da segunda tempada de 'Referentes', o proxecto da Deputación da Coruña que reúne a persoeiros da cultura galega nun espazo de reflexión e conversa demorada. Ledo e Fortes narran como a resistencia antifranquista conformou as súas respectivas personalidades e explican as súas posicións ante o ascenso da ultradereita ou a guerra de Ucraína.

Feijóo anuncia no seu derradeiro Consello ordinario diversos investimentos para Santiago, entre eles a ampliación da sede central da Xunta en San Caetano e do hospital. Como fixo nas semanas previas no resto de cidades, o aínda presidente fixo balance das súas actuacións tamén na capital galega e volveu publicitar a ampliación de San Caetano, onde o seu Goberno executou ou planificou obras por máis de cen millóns de euros.

Os Premios da Música Independente distinguen a Baiuca como autor da mellor gravación de música electrónica e mellor álbum en galego por Embruxo e ás Tanxugueiras como mellores artistas emerxentes. O palmarés enteiro pódese consultar nesta ligazón.

• ENTREVISTA | Baiuca: "Cada viaxe que fago axúdame a traballar con máis ganas para seguir cara a adiante coa miña música"
• ENTREVISTA | Tanxugueiras: "Queremos demostrar que a nosa música tradicional pode ter a mesma proxección que calquera outra"

EPA | O emprego mantívose practicamente plano en Galicia durante o primeiro trimestre do ano, cunha caída de apenas 100 persoas ocupadas, segundo os datos da Enquisa de Poboación Activa, que deixa o total en 1,09 millóns de persoas ocupadas, un 2,98% máis que hai un ano. A caída trimestral foi do -0,50% no total estatal. Cómpre ter en conta, non obstante, que as cifras inferiores a 5.000 poden conter erros de mostraxe. No mesmo trimestre, a poboación parada aumentou nunhas seis mil persoas (+4,43%, fronte á media estatal do 6,69%), ata as 141.000, un -10,91% a respecto de hai un ano (-13,12% na media). 

• AMPLIAMOS 👉 O traballo temporal cae ao 22,5% en Galicia, mentres construción e servizos compensan a perda de emprego industrial
• HEMEROTECA | O mercado laboral que deixa Feijóo: menos paro e moita menos xente a traballar

ERC, BNG e CUP esixen a dimisión da ministra de Defensa, Margarita Robles, por xustificar a espionaxe a líderes independentistas mediante o sistema Pegasus. Na imaxe, Robles este mércores na sesión de control do Congreso [© Congreso]

• O Estado non aclara se o CNI espiou a líderes cataláns e Aragonès advirte de "graves consecuencias políticas"

Feijóo dimitirá "esta semana" como presidente da Xunta. Así o vén de avanzar no transcurso da súa derradeira sesión de control no Parlamento. 

• 👉 AMPLIAMOS | “Seguirei servindo á terra nai” di Feijóo na súa despedida do Parlamento, na que a oposición ve unha Galicia “peor da que encontrou”
• O que pasa cando dimite o presidente da Xunta: cesamento do Goberno en pleno e remuda nun mes como máximo

A empresa portuguesa Altri sinala Palas de Rei como a "localización ideal" para a instalación da súa fábrica de fibra téxtil sostible a partir da transformación da madeira dos montes galegos, ademais da reciclaxe de téxtiles. A compañía lusa foi a escollida pola Xunta e Abanca para liderar este proxecto, que conta co apoio de fondos europeos Next Generation.

• AMPLIAMOS  A fábrica de fibras téxtiles instalarase en Palas de Rei tras pedir a Xunta que fose á Mariña
• HEMEROTECA | A empresa da Xunta e Abanca elixe un competidor de Ence para a fábrica téxtil que quere financiar con fondos da UE

Os Gobernos de España e Portugal logran un acordo coa Comisión Europea para desligar o gas do prezo da luz durante un ano. Os Executivos de Pedro Sánchez e António Costa principiaron as negociacións coa proposta de limitalo en 30 euros o megavatio/hora e o pacto final parte de 40 euros atendendo a unha media duns 50 durante a vixencia do acordo para a excepción ibérica. A ministra Teresa Ribera e o seu homólogo portugués, José Duarte, anunciaron este xoves o acordo político tras unha xuntanza en Bruxelas coa comisaria da Competencia, Margrethe Vestager. Máis información, hoxe en Praza.gal [Imaxe: © Ministerio para a Transición Ecolóxica]

• AMPLIAMOS 👉 Bruxelas dá o visto e prace ao pacto ibérico para pór tope ao prezo do gas e baixar a factura da luz