Fálase

A Universidade de Vigo celebra este venres a segunda volta das eleccións ao Reitorado. 21.179 integrantes da comunidade universitaria están convocados para elixir a primeira reitora da historia da institución: Carmen García Mateo (Nós Universidade) ou Belén Rubio Armesto (H2040). Na primeira volta, a candidata de Nós Universidade obtivo máis apoios, co 40,3% dos votos ponderados, fronte ao 33,9% de Belén Rubio e o 25,8% de Jacobo Porteiro, que fica polo tanto fóra da segunda volta. As urnas estarán abertas entre as 10 e as 18 horas e os resultados do escrutinio publicaranse en tempo real nesta web.

• A UVigo tamén terá reitora: Carmen García Mateo e Belén Rubio pasan á segunda volta

Nova xornada de folga e manifestación no metal da provincia de Pontevedra, con máis de 2.000 persoas nas rúas de Vigo. A patronal convocou mañá a CIG, CCOO e UGT para tratar de alcanzar un preacordo para un novo convenio colectivo. De non haber avances significativos na xuntanza, os sindicatos anuncian que levarán as mobilizacións a Navalia. O metal da provincia da Coruña convocou tamén folga para o día 19. Foto: CC-BY-NC-SA CIG.

O goberno do PP en Lugo asegura que virar Promoción da Lingua nun servizo compartido entre dúas concellerías suporá "reforzar" esta política e non "reducila". O gabinete de Elena Candia, nun comunicado en resposta ao BNG, asegura que a súa "reorganización non supón nin a eliminación nin a redución das políticas de promoción do galego" senón "reforzar a presenza da lingua dende un enfoque transversal". Promoción da Lingua era parte da concellería de Cultura e Turismo no goberno de Lugo e, co decreto de organización ditado por Candia tras a moción de censura coa  edil tránsfuga, o Servizo de Cultura, Turismo e Promoción da Lingua queda "compartido" entre as áreas de Cultura, Educación, Deportes, Infancia e Xuventude e de Turismo e Museos. Na imaxe, Candia presentando un certame poético canda o secretario xeral da Lingua, o pasado martes [© Concello de Lugo]

• O BNG denuncia que Candia eliminou a área de Promoción da Lingua do Concello de Lugo
• Candia procura blindaxe legal á participación da tránsfuga no goberno de Lugo cun inédito decreto

Un tribunal estadounidense suspende as sancións do goberno de Trump contra Francesca Albanese, a relatora especial da ONU para os territorios palestinos ocupados por Israel. "Como di o xuíz, protexer a liberdade de expresión sempre é de interese público", destaca ao facer público o ditame, ao tempo que agradece ao seu marido e á súa filla os esforzos no litixio. Albanese recibiu a comezos deste mes de maio a Orde do Mérito Civil do Goberno de España de mans de Pedro Sánchez "polo seu extenso traballo documentando e denunciando as violacións do dereito internacional en Gaza". Imaxe: [© ONU]

• HEMEROTECA | "Hai ferramentas para deter violacións de dereitos. Fíxose con Rusia e non vexo por que non se podería facer con Israel"
• HEMEROTECA | "A postura americana é aterradora, a europea incoherente. Ensinarase Gaza como o momento clave do declive moral de Occidente"
• HEMEROTECA | "A sociedade civil organizada é unha arma de construción masiva, podemos cambiar as cousas"
• HEMEROTECA | "A resistencia en Gaza é o único que queda porque non teñen armas, nin exército, nin apoio político ou económico"

A galega Zara supera a Nike e xa é a marca de moda máis valiosa do mundo, segundo a lista anual que elabora Kantar BrandZ. A firma do grupo Inditex alcanza un valor de 37.570 millóns de euros nunha lista que lideran Google, Apple, Microsoft e Amazon.

O Poder Xudicial rexeita suspender o traslado forzoso de maxistrados do TSXG que paralizaron parques eólicos. Xuíces pola Democracia e Luís Villares, un dos afectados, denuncian unha "quebra irreparable" da independencia dos xuíces e dos "principios esenciais do Estado de Dereito". Considera que non hai "prexuízo real" en agardar a que se resolvan os recursos presentados. 

• O xuíz Villares, afastado á forza da sección do TSXG que sentencia sobre eólicos e contratos da Xunta

Boyanka Kostova e LumedoLoop actuarán este domingo ás portas de Riazor pola campaña O Dépor é da Coruña. Aquí Tamén Se Fala organiza un novo concerto gratuíto na previa do encontro entre o Deportivo e o Andorra que se celebrará no Día das Letras Galegas "para reivindicar lingua, cultura e deportivismo". 

• Aquí tamén se fala: de impulsar a lingua nun instituto a gañar o Premio da Cultura Galega
• O Dépor corrixe a anomalía do topónimo e será da Coruña

Masiva manifestación en Vigo pola segunda xornada da folga do metal na provincia de Pontevedra "en demanda de convenios colectivos dignos que melloren as condicións laborais". CIG, CCOO e UGT resaltan que o sector no que traballan unhas 10.000 persoas na provincia "leva ano e medio co convenio caducado e coas negociacións rotas dende xaneiro" despois de que os tres sindicatos "abandonasen as conversas ante a pretensión do empresariado de eliminar a cobertura do 100% dende o primeiro día en caso de baixa por incapacidade temporal". A folga continúa con outras tres xornadas a semana vindeira, os días 19, 20 e 21. [Imaxe: BNG Vigo]

Donostia abre a porta a renunciar a ser sede do Mundial, tal e como fixo xa A Coruña o pasado mes de marzo e Málaga o pasado verán. O alcalde, Jon Insausti, dubida se a cidade pode "responder a todos os requisitos" que impón a FIFA. A renuncia de San Sebastián abriría a porta a Vigo, que segue na carreira malia as dúbidas que amosan outras urbes. Foto: Real Sociedad. 

• A Coruña renuncia ao Mundial: "A cidade acabaría hipotecada"

O Dépor celebrará "antes de rematar a temporada" unha "consulta vinculante" sobre "o topónimo oficial que debe acompañar a denominación da entidade" entre as persoas abonadas ao club. A directiva deportivista anunciouno no transcurso da primeira edición do seu Foro Social, un espazo para "reforzar as canles de escoita activa coa súa masa social" na que, indica, explicou que a corrección do topónimo se encadra nunha "reflexión institucional baseada en criterios de legalidade, coherencia administrativa e escoita activa" e nun contexto no que procura o "fortalecemento do vínculo coa afección e o papel social e identitario que o RC Deportivo desempeña dentro da cidade e de Galicia". A iniciativa chega nun contexto marcado polo intenso apoio á campaña O Dépor é da Coruña, promovido pola iniciativa Aquí tamén se fala dende o IES Rafael Dieste da cidade, así como por unha enquisa na que socias e socios deron o seu visto e prace masivo á mudanza. [Imaxe: ATSF]

• O Dépor corrixe a anomalía do topónimo e será da Coruña