O Consello de Ministros aproba retirar a medalla do mérito ao traballo a Franco e outros oito dirixentes da ditadura, entre eles o ministro Fernández Ladreda, que foi tamén director da fábrica de armas da Coruña tras o golpe de 1936. A retirada próducese ao abeiro da Lei de Memoria Democrática e a vicepresidenta e ministra de Traballo, Yolanda Díaz, subliña que o "único traballo" destas persoas foi "violar os dereitos humanos e pisar a democracia". O PP inclúe no seu programa das eleccións do 23X a promesa de derrogar a lei de memoria democrática, que tamén implica a fin doutras honras coma o condado de Fenosa ou o señorío de Meirás. [Imaxe: © Pool Moncloa / Borja Puig de la Bellacasa]
Fálase
O Banco Central Europeo lanza unha consulta pública para que a cidadanía opine sobre os novos deseños dos billetes de euro, que se acompaña dun vídeo da presidenta da entidade, Christine Lagarde. Entre as sete opcións propostas están unha selección de paxaros, o curso dun río que atravesa distintos lugares do continente ou unha sucesión de imaxes que representan os "valores europeos", segundo o BCE, dende a educación e o coñecemento ata a democracia e a igualdade.
O acto institucional do Concello de Santiago polo Día Nacional titularase Alba de Compostela, evocando o emblemático discurso Alba de Groria de Castelao, e "renderá homenaxe a persoas ou institucións que constrúen cidade todo o ano", avanza a alcaldesa da cidade, Goretti Sanmartín (BNG). Celebrarase no Pazo de Raxoi, sede do consistorio -na imaxe-. Os grupos municipais de PP e PSdeG critican a convocatoria e afean que a rexedora non acuda á misa da ofrenda da Casa Real ao Apóstolo na Catedral.
O Ministerio de Industria acorda con Altri "axustar o proxecto" da fábrica de fibras téxtiles que a compañía portuguesa prevé en Palas de Rei "aos criterios e esixencias da UE" para que "poida obter financiamento". O ministro, Héctor Gómez, revela que a pasada semana se reuniu en Lisboa con "altos representantes" da compañía de celulosa do país veciño, xuntanza que encadra nos encontros que vén celebrando "con compañías interesadas en acudir á futura convocatoria do PERTE da Descarbonización". O delegado do Goberno de España en Galicia, Pedro Blanco, subliña ante as recentes protestas da Xunta ao respecto que "o Goberno galego sabe que o proxecto, tal e como eles o presentaron inicialmente, e como xa dixemos, non se axustaba aos criterios esixidos pola Unión Europea".
A ex-conselleira Teresa Táboas, nova vicepresidenta da Unión Internacional de Arquitectura. Táboas, membro do Goberno de coalición PSdeG-BNG (2005-09) como titular da Consellería de Vivenda e Solo, responsabilidade do Bloque, xa era membro do Consello deste organismo internacional. O pasado 2022 conversamos con ela aproveitando a súa participación na Placemaking Week Europe, que se celebrou en Pontevedra e en 2021, ao fío dos 40 anos da autonomía. Na imaxe, Teresa Táboas nunha conferencia no ciclo Urbtopías [© Lamarela / Urbtopías]
- HEMEROTECA | Das cidades a escala humana a un rural do século XXI: a reflexión europea sobre o urbanismo sostible xúntase en Pontevedra
- HEMEROTECA | "O investimento en infraestruturas mudou as dinámicas económicas pero estragouse o territorio con desfeitas urbanísticas"
- HEMEROTECA | O PP suspendeu ao chegar á Xunta un plan para construír 37.000 vivendas protexidas que lle quedara feito
PP e Vox a un escano da maioría, segundo a enquisa de Sondaxe para as eleccións xerais do 23 de xullo publicada por La Voz de Galicia este domingo. A enquisa outorga en Galicia 13 deputados e deputadas ao PP, 7 para o PSdeG, 2 para BNG e 1 para Sumar Galicia.
Falece aos 88 anos o coruñés Luís Suárez Miramontes, o único xogador de fútbol español que gañou un Balón de Ouro na categoría masculina. Comezou no Dépor con dezaoito anos, pero converteuse en mito do fútbol no Barça e mais no Inter de Milán, onde gañou varias Copas de Europa e Intercontinentais, ademais de varias Ligas. Gañou a Eurocopa en 1964 con España compartindo equipo con Amancio Amaro, que tamén faleceu este ano. Aquí repasaba a súa carreira en primeira persoa desde o Camp Nou aos 84 anos. [Foto © FC Barcelona]
A Xunta Electoral Central responde a RTVE que non ten "competencia" para prohibir a emisión dun anuncio electoral da Falange no que se escoita o Cara el Sol. O medio público do Estado consultou se o anuncio vulnera a Lei de Memoria Democrática.
Veciñanza e colectivos ecoloxistas simulan o enterro dos recursos pesqueiros da ría de Muros e Noia tras o visto bo da Xunta a que a mina de San Finx (no Concello de Lousame) evacúe as súas augas residuais ao río Pesqueiras. Convocadas pola plataforma de afectados pola mina de San Fin este sábado, centos de persoas reclamaron o Goberno galego que retire a súa autorización polo potencial "catastrófico" da operación. [Na imaxe © Ecoloxistas en Acción]
- +INFO | O xulgado de Noia abre dilixencias penais contra a mina de San Fix por suposto delito contra o medio ambiente
- HEMEROTECA | A Confraría de Noia tenta frear o vertido de 800.000 metros cúbicos de auga dunha mina autorizado pola Xunta
- HEMEROTECA | O futuro da mina de San Finx, en mans dunha empresa "opaca" que xera dúbidas sobre a xestión dos seus vertidos
O Consello da Cultura Galega celebra o 40º aniversario da súa creación. "Renovamos o compromiso do CCG coa defensa e promoción dos valores culturais do pobo galego, dos seus dereitos á cultura, do seu dereito e obriga de arrequentar e transmitir a herdanza cultural", salientou a súa presidenta, Rosario Álvarez, nun acto institucional no que participaron o presidente da Xunta, o presidente do Parlamento, autoridades e representantes da cultura galega e da sociedade civil.