Feijóo destitúe o responsable desde hai dúas décadas da loita contra os incendios forestais, Tomás Fernández-Couto. Ao longo da súa traxectoria o alto cargo máis veterano da Xunta defendeu o eucalipto e gastar máis no lume que en ordenar o monte, e viu como a xustiza e o Consello de Contas censuraron actuacións súas. AMPLIAMOS aquí a información.
Coincidindo co 25N Uxía Senlle difunde o vídeo da canción "As que rubimos montañas", con letra de María Reimóndez, un tema publicado orixinalmente en 2012 coa colaboración de Guadi Galego no CD "Activ_arte" (2012) da ONG Implicadas no Desenvolvemento
Medios arxentinos informan da morte de Diego Armando Maradona. O mítico ex-futbolista e adestrador sufriu un paro cardiorrespiratorio logo da operación á que foi sometido na cabeza hai uns días.
A Audiencia Nacional condena agora á trama Gürtel pola visita do Papa a València en 2006 e dita outros 15 anos de cadea para Pablo Crespo, ex-secretario de Organización do PP galego. Hai un mes o Tribunal Supremo ratificou a primeira sentenza da Audiencia Nacional sobre a trama na que condenou o PP por beneficiarse da súa corrupción e deixou en 36 anos a condena por ese caso a Crespo, que xa tiña outra anterior do Tribunal Superior de Xustiza da Comunitat Valenciana doutros 13 anos tamén confirmada polo Supremo.
A Consellería de Sanidade relaxa as restricións nos concellos de Verín, Amoeiro, Coles, Trazo, Boqueixón, Val do Dubra, Monforte e Campo Lameiro, que pasan a ter restricións de nivel 2. Entre outras medidas, elimínase o confinamento perimetral e a prohibición de reunión de persoas non convivintes; ademais, a hostalaría pode reabrir con limitación de capacidade. En cambio, as restricións endurécense en Moaña, que pasa ao grupo de localidades con medidas especiais (nivel 3). Os cambios entrarán en vigor na medianoite do mércores ao xoves.
O plan de restricións da COVID-19 para o Nadal no que traballan o Goberno de España e as comunidades autónomas prevé manter o límite de reunións de ata seis persoas non conviventes e desprazar á unha da madrugada o toque de queda en Noiteboa e Noitevella. O documento será abordado mañá no Consello Interterritorial de Saúde.
Donald Trump accede a iniciar o traspaso de poderes ao demócrata Joe Biden como vindeiro presidente dos EUA, comezando a aceptar de facto a súa derrota electoral malia teimar sen probas nas acusacións de fraude.
Os 20 do XX, de Antón Varela, publicada nos últimos meses por Vinte, foi a gañadora do Premio á Mellor serie en versión orixinal en galego no Carballo Interplay, que rematou este sábado. Válidas, de Victoria Martín e Carolina Iglesias, obtivo tanto o Premio de Mellor webserie estatal como o Premio do Público. A produción portuguesa Subsolo conquistou o de Mellor serie internacional e David Fidalgo conseguiu o premio ao Mellor proxecto de webserie en galego coa serie de animación 2D dixital Cacola, que estreará na edición 2021 do festival
Coincidindo co 18 aniversario do desastre do Prestige, a asociación Unha Gran Burla Negra levou a cabo unha xornada sobre 'Arquivos cidadáns e memoria democrática'. O seminario, que ía celebrarse no Museo do Pobo Galego, realizouse finalmente a través da rede.
Sanidade incorpora Vilalba e A Laracha aos concellos con peche perimetral e restricións máis severas pola COVID-19 e "suaviza" as medidas no Carballiño. Así o vén de aprobar o subcomité clínico que vixía a pandemia. As novas medidas publicaranse nunha edición extraordinaria do DOG. Ampliamos a información neste espazo
