Fálase

O papa valora visitar Santiago no Ano Santo 2027, segundo avanza o Correio da Manhã citando fontes diplomáticas da Santa Sé, españolas e portuguesas. O xornal portugués sinala que a Secretaría de Estado do Vaticano traballa na posibilidade dunha visita pastoral na que León XIV acuda á capital galega polo ano xacobeo e a Fátima para conmemorar os 110 anos das que a Igrexa católica considera como probadas aparicións da Virxe. A anterior visita papal ao noso país remóntase a 2010, cando acudiu Bieito XVI. O pasado maio, no inicio do pontificado, o arcebispo de Santiago, Francisco Prieto, reiterou a súa intención de convidalo a Compostela.

• "Habemus papam": o cardeal Prevost é o papa León XIV
• HEMEROTECA | 1982, 1989 e 2010: as visitas de papas a Galicia que Francisco non puido repetir

A Xunta levanta o confinamento da veciñanza afectada polo incendio da Cañiza, no que emprega por primeira vez o sistema Es-Alert de mensaxes a móbiles. Na tardiña deste mércores o lume pasou en pouco tempo de 20 a 200 hectáreas, poñendo en perigo vivendas, e mobilizou a Unidade Militar de Emerxencias (UME).

A Xunta emprega o sistema Es-Alert de mensaxes de emerxencia a móbiles por primeira vez en situación real por un incendio na Cañiza. En pouco máis de dúas horas o Goberno galego pasou de informar de que o lume superaba as 20 hectáreas a situalo en máis de 200, con petición de intervención da Unidade Militar de Emerxencias (UME) e desaloxo de vivendas.

• HEMEROTECA | Da política errada á propiedade da terra: nin rastro de 'terrorismo' no plan oficial contra incendios

Varios incendios activos en Galicia queimaron xa polo menos un cento de hectáreas en  Carballeda de Avia, Meaño, Arbo, Bueu ou A Cañiza. Neste último tivo que ser declarada a situación 2 de emerxencia pola proximidade do lume ás casas na parroquia do Couto. Portugal segue loitando contra grandes incendios, no máis achegado á fronteira con Galicia, en Ponte da Barca, a Câmara Municipal pediu ao Goberno luso a activación do Mecanismo Europeo de Protección Civil. Foto: ATBRIF.  

O Supremo deixa o fiscal xeral do Estado a un paso de ser xulgado por revelación de segredos no caso da presunta fraude fiscal do mozo da presidenta de Madrid. Un dos tres maxistrados da Sala que vén de desestimar o recurso de Álvaro García Ortiz desmárcase e considera formalmente que "non existe un fundamento indiciario suficiente que posibilite racionalmente unha condena" e por iso rexeita xulgalo. A dirección do PP, que manifesta hostilidade contra García Ortiz dende que exercía como fiscal de medio ambiente en Galicia, reitera a súa esixencia de dimisión, que Pedro Sánchez e a Unión Progresista de Fiscais -que dirixiu- rexeitan. Na imaxe, García Ortiz o pasado xuño no Pazo de Mariñán [© Fiscalía Xeral do Estado]

• HEMEROTECA | Raíces galegas no aborrecemento ao fiscal xeral polo PP, que celebra a súa imputación
• HEMEROTECA | Non só o fiscal xeral: o que fan WhatsApp e Google coas mensaxes que borras
• HEMEROTECA | A Unión Progresista de Fiscais lamenta que Rueda pretenda "censurar" a un fiscal por participar nun foro do PSdeG
• HEMEROTECA | "En anos de investigación, nunca atopamos esa famosa trama incendiaria"

Dous incendios en Cerdedo-Cotobade obrigan a desaloxar cinco vivendas e outros en Meaño e Salvaterra queimaron xa unhas 70 hectáreas. En Portugal, os fogos en Arouca, Mangualde, Penamacor, Ponte de Lima, Ponte da Barca, Nisa e Santarém mobilizan milleiros de bombeiros. Foto: @lumesgal.

Unha traballadora do servizo de axuda no fogar do Porriño morre tras ser atacada nun dos domicilios que atendía. Segundo Faro de Vigo, investígase o marido septuaxenario da muller que recibía os seus servizos. [Imaxe: CC-BY-NC-SA Liliana Drew]

• AMPLIAMOS | Matan unha traballadora do servizo de axuda no fogar do Porriño

Un incendio en Salvaterra de Miño queimou xa 30 hectáreas e outro en Meaño, arredor de 40, segundo informa a Consellería do Medio Rural, que dá por estabilizado o primeiro. En Portugal, continúa activo o grave incendio en Ponte da Barca, próximo á fronteira con Galicia, no que traballan case 400 bombeiros. Foto: ATBRIF.

O PSdeG suspende de militancia o seu voceiro en Cospeito, ao que o xulgado de violencia sobre a muller de Vilalba investiga por un delito de lesións á súa parella. O secretario provincial do partido, José Tomé, especifica que a suspensión a Daniel Irimia se manterá "ata que o xulgado ditamine" e "se hai responsabilidades, non pode estar no noso partido, porque rexeitamos a violencia machista". "Imos proceder, non coma outros que sabendo dos temas pasan meses; actuamos de inmediato", enfatiza Tomé.

A Coruña xa é a primeira cidade galega declarada "zona de mercado residencial tensionado" ao abeiro da lei estatal de vivenda. O BOE publica este martes a declaración, que ten unha vixencia de tres anos e permite ao Concello coruñés activar o seu plan de medidas ao respecto. +info, hoxe en Praza.gal [Imaxe: CC BY-NC-SA Praza.gal]

• AMPLIAMOS 👉 A Coruña, primeiro municipio de Galicia en ser declarado zona residencial tensionada
• HEMEROTECA | Zona Tensionada e limitación dos pisos turísticos: A Coruña reacciona ante o problema da vivenda
• HEMEROTECA | Récord de peticións de pisos protexidos en Galicia ante a fin de quince anos de parálise
• HEMEROTECA | A Xunta ratifica o "non" a intervir nos alugueiros coa lei de vivenda da man dos demais gobernos do PP