Feijóo recupera a petición de que Junts e PNV o voten como presidente do Goberno de España nunha moción de censura na que tamén sería imprescindible Vox. Ofrece "decencia e eleccións", afirma o ex-titular da Xunta, que tras a celebración deses eventuais comicios que, promete, serían "inmediatos", continuaría como presidente en funcións ata a consecución dunha investidura. Afirmouno nunha entrevista en TeleCinco.
Milleiros de persoas ateigan as rúas da Coruña para celebrar o ascenso do Dépor á Primeira División. Dende a mañá houbo concertos nos arredores de Riazor (The Rapants, 9Louro, Lg1do...) e unha marea de afeccionados percorreu unida o traxecto entre o Campo da Leña e o estadio para finalmente recibir o autobús do equipo. Ás 18.30 o Depor recibe ao Las Palmas e ao remate a celebración trasladarase á fonte de Catro Camiños, onde os xogadores chegarán nun autobús. Imaxes: @RCDeportivo
Unha gran manifestación percorreu as rúas de Vigo coincidindo co Desfile das Forzas Armadas presidido polo rei Felipe VI. Convocada pola Plataforma Galiza pola Paz, a marcha denunciou o incremento do gasto militar e participación directa ou indirecta en conflitos bélicos.
Detido en Portugal o ex-deputado autonómico e ex-secretario de Organización do PSOE coruñés, Emilio Vázquez, nunha trama de corrupción do PS. Segundo o medio luso Observador, o ex-parlamentario é un dos catro detidos, acusado de presuntamente ser cómplice dun ex-asesor do ex-primeiro ministro António Costa na suposta manipulación de contratos públicos. Foto: CC-BY-SA PSOE A Coruña.
A folga no comercio de alimentación na provincia da Coruña obriga ao peche de numerosos supermercados. Centos de traballadoras e traballadores reclaman en varias mobilizacións un convenio digno e a mellora das condicións laborais e salariais. CIG, UGT, CCOO e USO, convocantes do paro, cifran o seguimento no 85% e denuncian "manobras de coacción" por parte dalgunha cadea de supermercados.
O Tribunal Supremo avala a legalidade do parque eólico Bustelo, no que o TSXG vía fragmentación ilegal co parque Campelo. O alto tribunal xa se pronunciara hai un ano avalando o outro parque e agora ratifica a súa doutrina sobre esa cuestión así como sobre os tamén cuestionados prazos de tramitación por parte da Xunta, ratificados tamén pola xustiza europea.
A Xunta destina 140.000 euros para un parque canino en Lugo. A conselleira de Medio Ambiente, Ángeles Vázquez, desprazouse á cidade para asinar un convenio coa alcaldesa Elena Candia. Salientaron que Lugo é a terceira cidade galega con máis cans rexistrados, 22.158.
A Aemet lanza un novo índice de perigo de incendios forestais. O IPIF mellora o sistema empregado até agora e incorpora variables como o estado da vexetación, a humidade do chan ou os tipos de superficie para identificar con maior precisión as situacións de risco alto e extremo de lume. Segundo este índice, A Mariña e a zona oriental da provincia de Lugo serían as máis ameazadas hoxe.
O Congreso ratifica o novo copagamento farmacéutico, con menos gasto para as rendas baixas. O Real Decreto-Lei agora convalidado reformula o sistema instaurado na etapa de Rajoy e sae adiante con con 164 votos a prol (PSOE, Sumar, Bildu, PNV, Podemos, BNG, Coalición Canaria, UPN), 149 abstencións (PP, Junts se ERC) e o "non" de Vox.
Pontón reclama á Xunta "a protección permanente de toda a vivenda protexida" e que "exerza o seu dereito" de mercar as que vaian saíndo a venda ante a perda de ata 35.000 destes pisos ata 2030. A portavoz nacional do BNG subliña que, coa normativa actual, " un promotor privado pode recibir até 40.000 euros por construír unha vivenda protexida que en 15 anos pode estar no mercado libre a prezos imposibles para a maioría da cidadanía". Reclamouno dende o barrio compostelán de Salgueiriños -na imaxe-, ante as que, destaca, foron "as últimas vivendas de protección pública entregadas hai xa 16 anos" pola Xunta na cidade, "54 pisos que, ademais, foron impulsados polo BNG cando tivo a responsabilidade de goberno na Consellería de Vivenda".
