Irán responde con lanzamentos de mísiles sobre Tel Aviv e Xerusalén tras matar Israel os líderes de Hamás e Hezbolá mentres, ao tempo, o exército israelí invade o Líbano. A escalada bélica prodúcese mentres Israel reitera os seus ataques contra territorios palestinos; segundo un estudo de Oxfam, xa matou en Gaza máis mulleres e crianzas que calquera outra guerra nos últimos vinte anos.
O Parlamento admite a trámite a iniciativa lexislativa popular Liberemos a Galega!, por unha CRTVG ao servizo do pobo. A plataforma en defensa dos medios públicos de comunicación, promotora da proposición de lei, que agrupa 40 colectivos e organizacións do ámbito audiovisual, social, cultural, político e sindical galego, despregará unha campaña para recoller, nun prazo de catro meses, as dez mil sinaturas que precisa para defender a ILP e que se vote na Cámara. [📸Representantes das promotoras da ILP no Parlamento CC-BY-NC-SA CIG]
Unha empresa de alarmas condecora á Xunta. O director xeral de Emerxencias do Goberno galego, Santiago Villanueva recibiu este martes a "placa de ouro de seguridade de Securitas Direct" que, di, "acredita a Galicia como unha das comunidades máis seguras de España" segundo un estudo da compañía baseados, entre outras variables, nas súas propias alarmas. A filial española desta compañía sueca, representada no acto polo seu director territorial, Javier Iglesias, vén centrando gran parte da súa expansión nos últimos anos en alertar dun suposto risco de ocupacións ilegais de vivenda.
MeteoGalicia advirte dun "río atmosférico apuntando cara a Galicia" que xa este mércores deixará "ceos cubertos e chuvias persistentes" e que na xornada do mércores "intensificará a chegada de humidade", con chuvias que xa serán "localmente fortes" e "poden deixar acumulacións importantes". Máis info nesta ligazón. [Imaxe: MeteoGalicia]
A débeda da Xunta ascende ao 16,3% do PIB e supera por primeira vez os 13.000 millóns de euros, segundo os datos que vén de divulgar o Banco de España. O máximo en termos absolutos non se corresponde cun máximo en peso sobre o total da economía, o cal sucedeu a principios de 2021, ao equivaler a máis do 20% do produto interior bruto.
O Tribunal Superior de Madrid anula a sanción á ex-comisaria de Pontevedra destituída por afirmar que a "algunhas lles gustaría que as violase" un antidisturbios. O ditame foi adiantado por La Voz de Galicia e, segundo informa elDiario.es, baséase en que o acto en que pronunciou estas afirmacións non era oficial e que se difundiron ao transcender nos medios, non pola súa vontade.
Concentración diante do Hotel Pazo de Sober durante o retiro do goberno da Xunta para manifestar que "as medidas adoptadas pola Consellería de Medio Rural non son suficientes para garantir a continuidade das persoas traballando as viñas". "A destilación de crise chega tarde e non solucionou o problema dos depósitos cheos das adegas; e as axudas para o mantemento da paisaxe son moi necesarias, pero non van servir para as persoas que malvenderon as uvas ou para aquelas que as van deixar sen vendimar", aseguran desde o Sindicato Labrego Galego-Comisións Labregas.
O presidente da Xunta anuncia que a sociedade Recursos de Galicia (RDG) "xa iniciou os trámites para poñer en marcha, a principios do ano que vén, unha comercializadora propia para abaratar e descarbonizar o consumo de enerxía". A empresa denominarase RDG Comercializadora galega de enerxía e "terá como clientes obxectivos a sectores estratéxicos da economía galega e aos veciños dos proxectos de xeración de enerxía que a compañía comercialice". Ofertará, segundo avanzou Alfonso Rueda, unha "enerxía 100% renovable, por un prezo estable e substancialmente por debaixo de mercado".
👉🏻HEMEROTECA | A disolución do Parlamento deixa sen regular a sociedade de explotación de recursos naturais creada pola Xunta e varias empresas
👉🏻HEMEROTECA | A Xunta reduce ao 30% a participación na empresa coa que quere explotar recursos naturais, na que están Abanca ou Ence
👉🏻HEMEROTECA | "Temos o apoio das empresas", di Rueda ante as críticas do PSdeG ao modelo de explotación de recursos naturais do PP
A vicepresidenta do Parlamento, Elena Candia, reúnese co alcalde de Badalona, o 'popular' Xavier García Albiol, para interesarse polas "políticas antiocupación" da cidade catalá. A presidenta do PP na provincia de Lugo e portavoz do grupo municipal do PP no concello lugués reuniuse co equipo de goberno de Albiol e cualificou como "moi interesantes" as súas "solucións" nesta materia. [📸Ajuntament de Badalona]
Localizan o corpo sen vida dun menor que desaparecera en Ares (A Coruña). O rapaz, de 14 anos, saíra da casa coa bicicleta o venres e apareceu este sábado en Punta Segaño. Na súa busca interviron equipos do 061, Salvamento Marítimo, Gardacostas, Bombeiros do Eume, Garda Civil, a Unidade de Policía Nacional adscrita á Xunta e mais do Grupo de intervención psicolóxica en catástrofes e emerxencias do Colexio Oficial de Psicoloxía de Galicia.
