Fálase

A conselleira lucense de Ayuso, número dous de Feijóo para as eleccións xerais. Marta Rivera de la Cruz, antiga integrante de Ciudadanos, partido co que foi deputada pola Coruña, e ex-conselleira de Cultura do goberno madrileño, ocupará o segundo posto da candidatura do PP en Madrid por tras do ex-presidente da Xunta. Rivera de la Cruz, que se significou en numerosas ocasións polas súas posturas contrarias ás medidas de normalización da lingua galega, foi escollida pola Xunta en 2013 para protagonizar un acto institucional centrado en Rosalía de Castro. Na imaxe, Marta Rivera (á esquerda), nun mitin de Ciudadanos en Vigo en 2016.

• AMPLIAMOS 👉 Feijóo mete nas listas os seus asesores e leva de 2 por Madrid a lucense Rivera de la Cruz, ex de Ciudadanos
• HEMEROTECA | Ciudadanos e o seu plan estrela para Galicia: Convertela en plató de 'Xogo de tronos'

Portos de Galicia convoca a concesión por 50 anos de espazos públicos para explotar cafetarías en sete peiraos: Baiona, Burela, Cedeira, Ortigueira, San Pedro de Visma, A Pobra do Caramiñal e A Pasaxe. [Foto: Concello de Baiona]

CRISE DE GOBERNO | Diego Calvo ascende a vicepresidente primeiro da Xunta e Ángeles Vázquez será a nova vicepresidenta segunda da Xunta nunha reestruturación obrigada pola confección das listas do PP para as xerais que implica que tamén saia da Xunta a veterana conselleira do Mar, Rosa Quintana, que será substituída polo ata agora alcalde de Cervo, Alfonso Villares. Máis información decontado en Praza.gal.

• AMPLIAMOS 👉 A crise de goberno provocada por Feijóo fai ascender a Diego Calvo e Ángeles Vázquez na Xunta de Rueda

Marta Lois e Verónica Martínez Barbero, cabezas de lista de Sumar Galicia pola Coruña e Pontevedra, segundo publica Europa Press e adiantou Radio Galicia-Cadena Ser. A presidenta de Sumar e ex-concelleira de Compostela Aberta Marta Lois liderará a lista da coalición na provincia da Coruña e a ata hoxe directora xeral de Traballo no Goberno de España e anterior presidenta do Consello Galego de Relacións Laborais, Verónica Martínez Barbero, será a número un na de Pontevedra. 

Unha fuga radioactiva en Megasa obriga a deter a produción, aínda que non se percibe impacto medioambiental. A empresa siderúrxica de Narón sufriu a fuga o pasado 8 de xuño, da cal informou o Consello de Seguridade Nuclear (CSN) nun comunicado. A produción de aceiro segue paralizada e os materiais contaminados e o sistema de extracción de fume mantéñense illados. 

O PP pacta na Comunitat Valenciana o seu primeiro bipartito autonómico coa extrema dereita de Vox tras o 28M . As negociacións entre ambas forzas implican que o candidato de Vox nas eleccións autonómicas, condenado por violencia machista, pase a optar ao Congreso nas xerais do 23X. [Imaxe: PPCV]

• HEMEROTECA | Feijóo culpa o PSOE do bipartito de PP e Vox en Castela e León
• HEMEROTECA | Feijóo ve o pacto con Vox en Andalucía "homologable a calquera goberno europeo"

BNG e PSdeG afean ao PP a ausencia case total de deputados nas súas bancadas no reinicio do pleno do Parlamento ás 16:30 desta tarde tras tres horas de pausa -na imaxe-. Nese reinicio da sesión debatíase unha moción "sobre a política da Xunta de Galicia en materia de protección de menores en situación de risco e desamparo" formulada pola socialista Marina Ortega, que reprobou esa ausencia dos conservadores. No mesmo sentido expresouse na súa quenda a nacionalista Olalla Rodil, mentres que Raquel Arias (PP) retrucou reprochando ausencias pasadas de representantes da esquerda.

Jesús Vázquez, ex-conselleiro de Educación e ex-alcalde de Ourense polo PP, avoga pola retirada de José Manuel Baltar por ser "unha traba enorme para o partido" ou do contrario "vai chegar un momento no que vai haber que refundalo". Nunha entrevista con Ouké, Vázquez afirma sobre o barón ourensán que "non hai ninguén indispensable" a escasos días da constitución da nova corporación municipal coa Democracia Ourensana de Gonzalo Pérez Jácome como primeira forza e un xogo de maiorías que pode acabar sendo clave tamén para a Deputación.

• Todas as opcións de Ourense: de Jácome no Concello á posible fin do baltarismo
• EN VINTE | OU ké! A política ourensá para a «abandonada» mocidade
• HEMEROTECA (2021) | O ex-conselleiro Jesús Vázquez dimite como edil en Ourense e senador tras o retorno do PP ao bipartito con Jácome

Principia o traspaso de poderes do PSdeG ao BNG no Concello de Santiago. A capital galega é unha das dúas cidades galegas que mudará de signo político no goberno municipal o vindeiro sábado, cando se constitúan as novas corporacións municipais. A nacionalista Goretti Sanmartín será a alcaldesa á fronte dun goberno do Bloque (6 edís) no que previsiblemente participará tamén Compostela Aberta (2 edís), mentres que os 6 edís socialistas votarán a súa investidura, pero non gobernarán, cando menos neste inicio do mandato. Sanmartín subliña a "cordialidade e a posta á disposición" de diversos informes por parte do goberno saínte e o alcalde en funcións, Xosé Sánchez Bugallo, asegura desexarlle á vindeira rexedora "a máxima sorte e o máximo acerto". [Imaxe: © Concello de Santiago]

• A esquerda volve ter o groso do poder nas principais institucións locais galegas malia ao pulo do PP
• O BNG adianta o PSdeG en Santiago e Goretti Sanmartín pode ser a primeira alcaldesa da cidade

Rueda di que aínda non pensou quen substituirá o seu vicepresidente primeiro, Francisco Conde, que deixará a Xunta de xeito inminente tras designalo Feijóo candidato ao Congreso por Lugo. O presidente da Xunta considerábao "imprescindible" e "peza fundamental".

• Francisco Conde, a sombra económica de Feijóo de Pemex aos fondos europeos
• Feijóo abre outra crise de goberno na Xunta e deixa a Rueda sen Francisco Conde, o seu vicepresidente "imprescindible"