Ferrol presenta unha web da súa candidatura a Patrimonio da Humanidade, coa nova marca “Cidade de Ferrol: Porto da Ilustración”. A candidatura ferrolá forma parte desde 2007 da trintena de aspirantes actuais en todo o Estado a ser recoñecidas pola Unesco.
O Ministerio de Transportes aproba o proxecto para diversas melloras viarias que quedaron pendentes tras a ampliación da ponte de Rande hai agora catro anos.
Un artigo de The Economist aborda o enorme impacto da participación das Tanxugueiras no Benidorm Fest, a importancia dos idiomas oficiais do Estado diferentes do castelán e a controversia causada pola broma a respecto das linguas inventadas durante a retransmisión do evento. O texto aborda tamén a cuestión das ligazóns entre o galego e o portugués e o debate de seren ou non o mesmo idioma. [Foto: © Rocío Cibes]
O TSXG autoriza a Xunta a seguir esixindo a presentación do certificado COVID (de vacinación, test negativo ou recuperación) ata o 26 de febreiro onde xa era obrigatorio, isto é, en negocios hostaleiros, pubs e discotecas e mais en visitas a hospitais e outros centros sanitarios e residenciais, albergues, instalacións deportivas pechadas e "eventos multitudinarios". O Tribunal baséase na doutrina do Supremo que, lembra, considerou a medida "adecuada e acorde coas esixencias derivadas da protección da saúde" e subliña que se aplica nun contexto no que "a COVID-19 continúa tendo unha elevada circulación" en Galicia, segundo os datos do Sergas.
Berto lanza O teu mandil, o primeiro sinxelo de adianto do seu novo E.P. en solitario, Bailar Chikito. Defíneo como "un tema Electro-Gypsy pensado para o baile e o desfrute" que lanza en colaboración con Marinha. Pódese escoitar xa en Spotify, en Tidal e no resto de principais plataformas musicais.
O DOG publica o decreto que regula a matrícula escolar para o curso 2022-23, con novos criterios para a admisión do alumnado. Máis puntos por domicilio, por parto múltiple ou para infancia afectada pola violencia machista no seu fogar, entre as principais novidades.
A Xunta elimina dende as 00:00 do sábado as restricións horarias á hostalería pola COVID e os límites quedan nos que "marque a licenza de cada local", confirma Feijóo na rolda de prensa posterior ao Consello da Xunta. O Goberno galego solicitou ao TSXG que o certificado COVID siga sendo preciso nestes negocios (e nos demais ámbitos onde se esixe actualmente) ata o día 26.
O Ministerio de Traballo confirma o acordo cos sindicatos CC.OO. e UGT para subir 35 euros o salario mínimo interprofesional, ata os 1.000 euros mensuais con efecto retroactivo dende o 1 de xaneiro. A patronal CEOE desmarcouse do pacto. As centrais sindicais viñan reclamando concretar o incremento do SMI para paliar os efectos das fortes subas de prezos.
O Consello de Ministros aproba a supresión da máscara obrigatoria no exterior. A nova norma entra en vigor o xoves "recomenda o seu uso en aglomeracións" e mantena "excepcionalmente, en eventos multitudinarios ao aire libre onde non se poida manter unha distancia mínima de 1,5 metros". A decisión do Goberno centra contempla tamén a retirada da obriga nos patios escolares, se ben isto depende en última instancia da Xunta. [Foto: CC BY-SA Ana Varela / Xunta]
Xa está dispoñible o trailer do documental 'Nada que ver', que repasa os 25 anos de historia de CUAC FM e que se estreará este xoves no Teatro Colón da Coruña. O filme destaca a función da radio como "altofalante" da cidade e afonda da reivindicación de que os medios comunitarios vexa recoñecido o seu dereito a contar con licenzas de emisión