Os interventores xudiciais propoñen o cesamento dos xestores de Alu Ibérica na Coruña ante o risco de insolvencia, segundo informa Radio Coruña. Reclaman unha análise a fondo das finanzas da empresa e o concurso de acredores de confirmarse a insolvencia da antiga planta de Alcoa.
Jácome anuncia un acordo co PP para reconstituír o bipartito no Concello de Ourense. "O Goberno municipal de Democracia Ourensana chegou a un acordo co grupo municipal do PP para que os concelleiros populares se integren e asuman dirección de áreas no Concello de Ourense", di o rexedor. Os populares romperan o bipartito con Jácome en setembro de 2020.
Celta, Obradoiro e Breogán poderán xogar con público dende o comezo da temporada 21-22. A ministra de Sanidade, Carolina Darias, vén de ratificar a supresión do artigo que limitaba a asistencia a partidos da Liga de fútbol e da ACB por mor da COVID. Os límites de capacidade dos respectivos recintos deportivos dependerá da Xunta. (Imaxe: Obradoiro CAB)
O PP recorre a Lei de Eutanasia ante o Tribunal Constitucional. Faino na véspera da xornada en que remata o prazo para que as comunidades autónomas teñan creadas as comisións de garantías e avaliación que fixa a lei para comezar a aplicala. A Xunta comezou a tramitala, pero polo momento non a aprobou. Na imaxe (© Congreso), Pablo Casado, onte no Congreso.
Feijóo ratifica a intención de que a vacinación da poboación de 30 a 39 anos contra a COVID-19 comece "na primeira semana de xullo". Xa nesa semana, asegura o presidente da Xunta, estará en marcha o sistema de autocita de forma paralela á cita ordinaria. Máis información, hoxe en Praza.gal
A Xunta confirma que apoiará a retirada da obriga xeral de levar máscaras ao aire libre agás "cando non sexa posible gardar a distancia dun metro e medio". Tamén proporá impoñela en concellos en nivel máximo de alerta (actualmente, ningún). O Goberno de España, ao que Feijóo critica no anuncio da decisión e pide "pactala", aprobará mañá a reforma legal para que esa retirada se poida producir dende o sábado. O presidente da Xunta avanza ademais, tamén dende o sábado, unha ampliación xeral do 50% ao 75% nas capacidades de locais e diversos eventos culturais, sociais e de lecer, que poderá chegar ao 100% nas terrazas hostaleiras.
A Xunta di que "condonará total ou parcialmente" a "débeda" ás persoas sen recursos ás que lles reclama miles de euros por cobraren a Risga mentres agardaban pola concesión do Ingreso Mínimo Vital. "Trátase daquelas persoas que teñen fillos ao seu cargo", especificou no Parlamento a conselleira de Política Social, Fabiola García, en resposta a unha interpelación do BNG. As reclamacións dos cartos débense a que o Goberno galego mantén como incompatibles ambas prestacións na lei de inclusión social de Galicia. (Imaxe: CC BY-SA Conchi Paz / Xunta)
O Boletín Oficial do Estado publica este mércores os nove indultos aos presos do 'procés' catalán que seguen encarcerados, aprobados onte polo Consello de Ministros. Prevese que hoxe mesmo poidan saír da cadea.
Castroverde, Cambre e Poio soben ata o nivel medio de restricións pola COVID-19 a partir do sábado, no que se manterán Camariñas e Malpica de Bergantiños. É a última actualización das medidas pola pandemia que vén de comunicar a Xunta. O comité clínico reuniuse este martes para analizar a situación epidemiolóxica de Galicia e decidiu que o resto dos concellos van permanecer no nivel baixo de restricións unha semana máis. [Foto: Ana Varela/Xunta]
O Goberno de España indulta os líderes independentistas cataláns condenados no xuízo do Procès. O presidente Pedro Sánchez realiza unha declaración institucional que se pode seguir nesta ligazón. [Imaxe: © Borja Puig de la Bellacasa / Pool Moncloa]
