A CIG denuncia un novo accidente laboral nas obras do AVE en Ourense que deixa un traballador ferido. O envorcado do camión feriu o seu condutor, que foi trasladado en ambulancia ao hospital de Ourense. A CIG denuncia "falta de seguridade e exceso de xornada" e lembra que neste tramo do AVE houbo tres accidentados en quince días, un deles falecido.
SOS Sanidade Pública convoca unha nova manifestación o vindeiro xoves en Vigo para exixir a "reconstrución" da área sanitaria. Varias plataformas anunciaron a súa adhesión a unha marcha que pretenden denunciar a "deterioración" constante da sanidade pública galega.
A Xunta convoca 803 prazas de acceso libre na administración xeral na oferta pública de emprego deste ano. A OPE 2025 do Goberno galego na administración xeral é dun total de 1.103 prazas, con 300 de promoción interna e 803 de libre acceso. Destas 160 serán para persoal de limpeza e cociña, 138 de loita contra incendios, 130 para corpos administrativos, 108 para persoal coidador de escolares con necesidades especiais, 60 para persoal subalterno ou 50 para técnicos de xestión ambiental.
"Como redactar boas normas con claridade", novo curso da Xunta para o seu funcionariado. A Escola Galega de Administración Pública (EGAP) convoca un curso "para que este labor normativo se desenvolva de forma óptima".
Feijóo volve esixir a dimisión de Pedro Sánchez e a convocatoria de eleccións xerais na sétima manifestación contra o Goberno de España organizada pola dirección estatal do PP nos últimos dous anos, desta volta baixo o lema Efectivamente, mafia o democracia. Tras o encarceramento do ex-ministro Ábalos, o anterior presidente da Xunta concluíu que "o sanchismo está no cárcere e ten que saír do Goberno" despois de que a presidenta da Comunidad de Madrid e líder do PP nesa autonomía, Isabel Díaz Ayuso, augurase un "asalto" da desaparecida banda terrorista ETA en Euskadi e Navarra. A comitiva do PPdeG na protesta estivo encabezada por Alfonso Rueda, que se amosou convencido de que Feijóo "tomará sempre as decisións máis convenientes para España". [Nas imaxes, -©PP e PPdeG-, Feijóo e Rueda en dous intres da mobilización]
Anova analiza o panorama político cara ás municipais nunha xornada con edís, alcaldes e ex-alcaldes de formacións municipalistas. O local como chave transformadora e Artellar para transformar: do local ao nacional foron os dous eixes de encontro, no que a organización que encabeza Martiño Noriega procurou a "revitalización organizativa e política" e "reivindicar o municipalismo como o espazo desde o que se pode reactivar unha política útil, próxima e transformadora" fronte ao que consideran como "xestión da monotonía que se instalou en boa parte das alternativas progresistas do país". Na imaxe, intervencións de Noriega e do ex-alcalde coruñés Xulio Ferreiro, canda a edil ferrolá Nerea Carballeira e a ex-concelleira compostelá Concha Fernández.
Alfonso Rueda e Paula Prado confirman a súa asistencia á manifestación convocada por Feijóo contra Pedro Sánchez, este domingo en Madrid, xunto a "outros representantes" do PP galego. Os conservadores vólvense manifestar baixo o lema Mafia o democracia tras o encarceramento provisional do ex-ministro Ábalos con reivindicacións como a dimisión do presidente do Goberno de España ou a convocatoria de eleccións xerais anticipadas. Na imaxe, Rueda e Prado o pasado xuño, na anterior manifestación promovida pola dirección estatal do PP contra Sánchez. [© PPdeG]
Feijóo pide á patronal catalá Foment del Treball Nacional que convenza a Junts per Catalunya para apoialo nunha moción de censura contra Pedro Sánchez, operación que necesariamente implicaría os votos de Vox. Esgrimindo razóns coma o encarceramento do ex-ministro Ábalos, o ex-presidente da Xunta e actual líder estatal do PP que o "compromiso" que asumiría nese hipotético escenario sería convocar eleccións xerais. [Imaxe: © PP]
As pensións contributivas de xubilación subirán arredor do 2,7% en 2026. É a estimación do Ministerio de Seguridade Social a partir do Índice de Prezos ao Consumo (IPC) medio interanual calculado ao ter xa en conta o dato adiantado de novembro. Suporá un incremento medio duns 572 euros anuais. [Imaxe: CC BY-SA Ana Varela / Xunta]
O xuíz envía a prisión provisional sen fianza o ex-ministro Ábalos e o seu antigo asesor Koldo García. Decídeo, atendendo a petición da Fiscalía e das acusacións que coordina o PP, por risco de fuga a causa das elevadas peticións de cadea ás que se enfrontan no caso no que están procesados por múltiplos delitos en contratos de máscaras durante a pandemia da COVID. Feijóo convoca outra concentración contra Sánchez e di que é "a mazá podre". Na imaxe, José Luis Ábalos no Senado durante a súa etapa como ministro de Transportes.
