Fálase

O Consello da UE debate este martes a oficialidade do galego, o catalán e o vasco nas institucións comunitarias. España responderá no Consello de Asuntos Xerais a todas as dúbidas dos países sobre a petición para tornar oficial as tres linguas. Na anterior xuntanza, ningún Estado vetou esa posibilidade. Foto: EU Council Press. O ministro de Exteriores, José Manuel Albares, ofrece a que o Goberno español asuma "de maneira completa e total" os custos da oficialidade e aclara que a ampliación de idiomas oficias abranguería só o caso español.

• España prioriza a oficialidade do catalán sobre o galego ante as reticencias da UE a recoñecer "tres linguas de vez"
• A oficialidade do galego na UE: unha "oportunidade única" nin doada, nin tan inmediata

PSOE e Sumar acadan un acordo de goberno que incluirá a redución da xornada laboral sen redución salarial. O acordo, segundo Sumar para unha "lexislatura de catro anos", será presentado este martes por Pedro Sánchez e Yolanda Díaz. [Foto: CC-BY-NC-ND Eva Ercolanese / PSOE]

• HEMEROTECA (3/10/2023) | Sánchez nega o referendo pero apela á "xenerosidade" para alcanzar un acordo para toda a lexislatura

Feridos e numerosos estragos durante unha protesta dos bombeiros comarcais ante a Deputación de Ourense na que houbo enfrontamentos coa policía. Máis de 200 traballadores concentráronse para reclamar mellores condicións laborais e logo de cumpriren máis de catro meses en folga. Imaxe: CC-BY-NC-ND CIG. 

A Xunta anuncia unha "cota cero" para autónomos durante o primeiro ano de actividade. A partida inclúese nos orzamentos para 2024, cuns 960 euros para cota e uns 7.500 para o inicio da actividade. 

O peronista Sergio Massa gaña a primeira volta das eleccións presidenciais en Arxentina e enfrontarase na segunda volta ao anarcoliberal Javier Milei, que aspira a recoller o voto que agora foi á conservadora Patricia Bullrich. Mass obtivo un 36,6%, Milei un 30% e Bullrich, herdeira política do ex-presidente Mauricio Macri, o 23,8%. A segunda volta será o 19 de novembro. [Foto: @SergioMassa]

Galicia, en solidariedade co pobo palestino. Un total de 17 cidades e vilas galegas rexistraron mobilizacións este domingo para esixir a fin do masacre israelí en Gaza. Estas accións foron convocadas pola Asociación Galaico Árabe Jenin, BDS Galiza, Mar de Lumes e Galiza por Palestina.

[Foto: BNG, en Vigo] 

• Hamás ou o búmerang da historia: como Israel contribuíu á súa fundación
• OPINIÓN | Gaza
• OPINIÓN | Gaza, ou a compaixón con botón de apagado

De por que ao raposo se lle chama Pedro aos significados de 'María' no cancioneiro. A VIII Xornada de  Onomástica Galega explora este sábado dende Pontevedra a relación entre a cultura popular e os nomes propios con relatorios arredor dos cancioneiros ou os contos de tradición oral e os nomes das casas que designan as familias no rural. Pódese seguir a xornada en directo desde este enlace da Real Academia Galega.

• A RAG engade 400 novas palabras ao dicionario: 'aeroxerador', 'trans' ou 'alfábega'
• HEMEROTECA | A Xornada de Onomástica reclama a recuperación da toponimia tradicional nos nomes das rúas
• HEMEROTECA | Do 'Resío' a 'Nuestra Señora del Rocío': como deturpar un topónimo en tres pasos

Xosé Manuel Soutullo, novo director xeral da Editorial Galaxia. O Consello de Administración nomea o actual director da Fundación Penzol como sucesor de Francisco Castro. Soutullo xa era conselleiro de Galaxia, onde "desenvolveu unha dilatada vida profesional no ámbito da edición e da produción cultural", segundo traslada a editorial nun comunicado.

Suspendida a circulación de trens na liña A Coruña-Ferrol. Renfe informa de que prestará os seus servizos de longa distancia por estrada neste tramo durante toda a fin de semana. As persoas que tiñan billetes para trens de media distancia neste treito tamén serán desprazadas en vehículos por estrada ao longo deste venres e a compañía avaliará se retoma a circulación destes trens o sábado. A primeira hora desta mañá a caída dunha árbore sobre as vías impediu o paso dos trens entre Betanzos e Oza dos Ríos, solucionouse o incidente pero outras árbores volveron interroper a circulación a causa do temporal. [Imaxe de arquivo CC-BY-SA Jon T2008]

Seguimento "masivo" da primeira xornada de folga das traballadoras e traballadores das escolas infantís privadas ou de xestión indirecta –na etapa de 0 a 3 anos– para reclamar un convenio "digno" e uns salarios "xustos". A CIG confirma que de non producirse avances significativos a folga continuará o día 25 e os días 8 e 15 de novembro. A Coruña e Vigo acolleron concentracións de traballadoras para denunciar o "bloqueo patronal á negociación" dun convenio no que as táboas xa quedaron por debaixo do Salario Mínimo Interprofesional. [Fotografía deste xoves en Vigo CC-BY-SA CIG]

• Convocan catro días de folga no ensino infantil de 0 a 3 anos pola mellora dos salarios e do convenio colectivo