Fálase

O PP confirma a súa ausencia na homenaxe no Congreso aos derradeiros fusilados polo franquismo, entre eles os galegos Xosé Humberto Baena e José Luis Sánchez Bravo. "Eran terroristas", resolve a voceira dos populares na Cámara Baixa, Ester Muñoz, quen di non "discutir" que "poidan ser consideradas vítimas do réxime" pero "discuto que sexan heroes que merezan un recoñecemento". O pasado agosto o Goberno de España fixo oficial a reparación oficial de Baena declarando "ilegal e ilexítimo" o tribunal que o xulgou e como "ilexítíma e nula" a condena ditada contra el nun proceso inzado de irregularidades.

• 50 anos sen Humberto Baena, o mozo vigués que o franquismo asasinou co seu disparo final
• ENTREVISTA | Roger Mateos: "Baena era inocente, non cometeu o delito do que o acusou a ditadura"

Rueda anuncia a creación en 2026 "dunha fundación de colaboración público-privada para desenvolver un novo modelo de investigación forestal". O presidente da Xunta anunciouno no encontro Piñeiros 25 -na imaxe- que está a desenvolver en Santiago a Fundación Arume, a entidade na que participan varias das principais empresas do sector forestal, xunto con organizacións de propietarios, a Universidade de Vigo ou Abanca, entre outras.

• HEMEROTECA | Fundación Arume: "Se damos vía libre ao eucalipto, a industria do piñeiro desaparece; non hai recursos para todos"

Caixa Rural Galega abre en Viveiro a súa oficina número 48. A entidade cooperativa sinala esta nova apertura pretende "reafirmar o compromiso con Galicia, co desenvolvemento rural e co apoio a familias, empresas e emprendedores que fan medrar esta taerra". "Abre co mesmo espírito que se fundou a entidade, axuda mutua e desenvolvemento de Galicia", engade o seu presidente, Manuel Varela -na imaxe, intervindo durante o acto de inauguración, este luns-.

• HEMEROTECA | Caixa Rural Galega supera os 30 millóns de beneficios nun ano por primeira vez
• 🟪🟧🟦EN VINTE | Vinte na vila, coa colaboración de Caixa Rural Galega

O TSXG rexeita suspender de forma cautelar a ampliación da balsa de lodos vermellos de Alcoa autorizada pola Xunta. Desbota así a pretensión dunha asociación ecoloxista de suspender cautelarmente a resolución do Goberno galego que deu o visto e prace ao plan de restauración e o proxecto de construción do recrecemento do depósito, situado no termo municipal de Xove

• A Xunta autoriza ampliar a balsa de Alcoa e remite ao futuro as medidas para o seu mantemento "indefinido"

A dirección de Junts per Catalunya decide romper o acordo de investidura asinado co PSOE en 2023. Carles Puigdemont detallará nunha conferencia de prensa as razóns da ruptura dun pacto que implicou, entre outros aspectos, a aprobación da amnistía e cuxa quebra definitiva o partido valorou nos últimos días sometela a unha consulta entre a súa militancia. Na imaxe [©JxCat], a executiva da formación reunida este luns en Perpinyà.

• AMPLIAMOS 👉🏻 Puigdemont rompe con Sánchez: "O PSOE terá o poder, pero non poderá exercelo"
• HEMEROTECA | PSOE e Junts pactan a investidura e a amnistía nun acordo que Feijóo equipara co terrorismo de ETA e co 23-F

O partido de Milei vence nas lexislativas da Arxentina con algo máis do 40% dos votos, case seis puntos por riba do peronismo, o que amplía a súa marxe para aplicar a axenda de extrema dereita que impulsa dende a presidencia do país. 

• HEMEROTECA | Milei responde con represión ás protestas contra os seus recortes: "Busca disciplinar o pobo que se mobilizou"
• HEMEROTECA | Emigración relativiza o impacto dos recortes de Milei nos galegos da Arxentina: "Levan décadas sufrindo populistas"
• HEMEROTECA | Honras da (extrema) dereita española a Milei

O Goberno municipal de Arzúa rexeita o "ataque fascista" cometido nas útimas horas contra a escultura de Juan Vidal, alcalde da localidade fusilado polos golpistas en 1936. O Executivo formado por BNG, A.A. e PSdeG traslada a súa "profunda preocupación" por este acto vandálico, "que pretende sementar o odio e borrar a nosa historia", contra o "patrimonio colectivo" e "a memoria democrática". "Desde o goberno municipal expresamos o noso apoio e solidariedade coa familia de Juan Vidal e coa de todas as persoas represaliadas en Arzúa, así como con todas as persoas que manteñen viva a memoria das vítimas da represión franquista", aseguran. O Concello avanza que restaurará a escultura e pedirá que as autoridades competentes investiguen os feitos. [📷 CC-BY-SA BNG Arzúa]

Medio Rural suspende durante 21 días todas as feiras, certames, poxas, mercados e concentración de gando en Galicia a partir deste luns 27 como medida preventiva ante o avance da dermatose nodular contaxiosa entre os animais. Segue vixente o período de vixilancia veterinaria oficial para todos os bovinos procedentes de explotacións localizadas fóra do noso país e prohibirase a entrada de animais procedentes de explotacións situadas nas zonas declaradas como restrinxidas á dermatose nodular contaxiosa. O gando vacún que cheguen a Galicia con destino a sacrificio poderá acceder sempre que sexa trasladado directamente aos matadoiros.

O Goberno de Uruguai denuncia o estaleiro vigués Cardama ante a Fiscalía do seu país, acúsao dunha "fraude" e dun "engano" en relación ás garantías presentadas para a construción de dúas patrulleiras que xa están en marcha nas instalacións da empresa en Bouzas [📷 © Cardama].

O conselleiro de Sanidade abandona o Consello Interterritorial de Saúde canda o resto de autonomías de gobernos do PP. Antonio Gómez Caamaño acusa a ministra Mónica García de "utilizar" este órgano para "o capricho político" e "atacar" as autonomías do PP ao fío da crise dos cribados de cancro en Andalucía. Os gobernos dos conservadores "estamos dispostos a dar eses datos", agrega o conselleiro tras a súa negativa a remitilos ao Ministerio, "e os primeiros en coñecelos van ser os pacientes", di nun contexto no que volve culpar o Goberno de España dos "problemas que persisten" coma o "déficit de médicos". 

O Ministerio, pola súa banda, reprocha a "deslealdade institucional" dos conselleiros do PP e mantén que a súa ausencia impediu votar o reparto de "dous millóns de euros para atención e vixilancia do cancro". "Onte estiveron na cea, pero hoxe no de traballar xa non tocaba", agrega o secretario de Estado de Sanidade, Javier Padilla.

• O Sergas non envía os datos de cribados de cancro ao Estado en liña do fixado no PP
• HEMEROTECA | O 66% dos tumores de mama detéctanse en estadios iniciais grazas ao cribado do Sergas