Fálase

Unha muller recibiu varios disparos este domingo en Verín mentres se atopaba na casa dos seus pais, á que se trasladou tras decidir separarse da súa parella e pai dos seus tres fillos menores e denuncialo por violencia machista. Permanece ingresada no hospital en Vigo, en estado grave, pero non se teme pola súa vida. O home está agora en prisión provisional, comunicada e sen fianza, investigado por tentativa de homicidio, tenencia ilícita de armas e quebrantamento da orde de protección ditada en xullo que lle prohibía achegarse á muller. Despois do sucedido, rexeitado pola veciñanza nunha concentración este martes, o xulgado amplía a orde de protección para que tampouco poida achegarse nin comunicarse cos tres menores. [Na imaxe, o Xulgado de Instrución 1 de Verín, onde delcarou este mércores o acusado © Google Street View]

• Vivir sen nai por culpa da violencia machista: 82 persoas orfas en 2024
• Prisión provisional para o acusado do primeiro feminicidio do ano en Galicia
• 7.602 denuncias por violencia de xénero, novo máximo anual en Galicia, 21 por día

A Xustiza confirma que a TVG deberá rectificar unha información falsa sobre o BNG. A Audiencia da Coruña confirma a sentenza dun xulgado santiagués que dera a razón ao Bloque pero matiza a rectificación que debe emitir emitir. A CRTVG non recorrerá tras as "importantes matizacións" do último ditame.

• A Xustiza condena a CRTVG a rectificar unha información falsa sobre o BNG
• A candidata do PP á CRTVG esgrime as súas "decisións capitais" nos informativos como aval para o posto

O Concello de Pontevedra confirma que o Constitucional admitiu a trámite o seu recurso contra a prórroga de ENCE. O permiso para que a pasteira continúe en Lourizán ata 2073 foi outorgado polo Goberno de Rajoy en funcións en 2016 e en 2021 anulouno a Audiencia Nacional, pero o Tribunal Supremo reverteu a decisión en 2023. O goberno local do BNG celebra a admisión no TC por considerar que é "extremadamente difícil" que recursos coma estes teñan percorrido, recolle Pontevedra Viva.

• HEMEROTECA | A pugna sobre a permanencia de Ence na ría, camiño do Constitucional e da UE tras o aval definitivo do Supremo
• HEMEROTECA | O ex-ministro Caamaño e un ex-presidente da Audiencia Nacional, no equipo co que Pontevedra busca anular a sentenza de Ence
• HEMEROTECA | A ría de Pontevedra, ata 115 anos xunguida a Ence coa blindaxe do PP que agora avala o Supremo

Rueda recibe a Oliver Laxe en Monte Pío tras recibir o premio do xurado no Festival de Cannes por Sirat. Durante o encontro na residencia oficial o presidente sinala o director como "un gran embaixador da nosa terra" e mostra do "bo momento do audiovisual galego". [Imaxe: CC BY-SA David Cabezón]

• Oliver Laxe, de Cannes aos Ancares: "Confío no poder das imaxes"

Antes de nós, o filme sobre Castelao dirixido por Ángeles Huerta, entre as dez películas máis vistas nos cines de todo Estado nos seus primeiros días de proxección, a pesar de estrearse tan só en 17 salas. Foi a 13ª máis vista na fin de semana, pero estivo entre as dez primeiras domingo e luns. Ademais, foi a terceira con máis público por copia, só por detrás de Misión Imposible e Lilo & Stitch. Esta media de asistentes (178 por copia) é a terceira máis alta entre as películas galegas dos últimos anos, só por detrás de O que arde e A esmorga.

• REPORTAXE | 'Antes de nós' participa da conversa aberta que é Castelao

A palabra lubre incorpórase ao Dicionario da Real Academia Galega a proposta de Luar Na Lubre coa definición de "bosque sagrado onde os celtas celebraban os seus rituais relixiosos”. Bieito Romero, que destaca que a decisión dignifica e fai medrar o noso patrimonio como pobo”, atopou a palabra por vez primeira no dicionario que Xosé Luís Franco Grande realizou para Galaxia en 1968. Agora o Seminario de Lexicografía da RAG vén de decidir a súa inclusión

Varios Estados opóñense a aprobar hoxe a oficialidade do galego, o catalán e o vasco na UE. O ministro de Asuntos Europeos de Finlandia, Joakim Strand, espera que non se vote a proposta e advirte das "preocupacións" sobre as "implicacións legais e económicas" de faceren oficiais as tres linguas, ao igual que manifestou a súa homóloga croata, Andreja Metelko-Zgombic, á entrada do Consello de Asuntos Xerais da UE onde se debaterá a medida. 

O Concello de Santiago fai oficial a petición á Xunta para a declaración da cidade como zona de mercado residencial tensionado. O Goberno galego deberá responder no prazo máximo de seis meses. O Goberno local pide ampliar a consideración de gran propietario a todos os que posúan máis de cinco inmobles e que a declaración se aplique tamén ás vivendas que levan máis de cinco anos sen ser alugadas.

• Santiago solicitará a declaración de zona residencial tensionada cun informe da UDC que avala a proposta
• O Concello de Santiago busca elevar ao máximo o IBI ás vivendas baleiras para poñelas no mercado

Pedro Sánchez anuncia un "programa de axudas directas a menores de 16 anos con problemas de visión para que poidan adquirir lentes cara ao próximo curso escolar". O presidente do Goberno de España anunciouno nun acto de presentación do denominado Plan Veo no que a ministra de Sanidade, Mónica García, concretou que a medida para adquirir lentes ou lentes de contacto consistirá nunha achega de 100 euros que beneficiará arredor de "medio millón de nenos e nenas".

• HEMEROTECA | O excesivo uso de pantallas eleva ao 43% a porcentaxe de miopes entre a mocidade galega

O PP admite que contactou con varios Estados da UE para que rexeiten a oficialidade do galego, o catalán e o vasco na UE, que será votada este martes no Consello de Asuntos Xerais da Unión Europea. Vox asegura que os populares pedíronlles axuda para que os seus gobernos afíns veten a oficialidade das tres linguas.

• A UE volverá abordar a oficialidade do galego, que aspira a ser 'legal' axiña na Eurocámara