Fálase

A ministra de Traballo, Yolanda Díaz, anuncia un acordo cos sindicatos para subir o salario mínimo a 1.080 euros este ano 2023, o que supón un incremento dun 8% a respecto do actual. Díaz salienta que se trata dun día "moi importante" e que co acordado o Goberno de España cumpre "un dos grandes compromisos da lexislatura: alcanzar polo menos o 60% do salario medio". O presidente do Goberno estatal, Pedro Sánchez, tamén vén de referirse a este aumento no Salario Mínimo Interprofesional (SMI) na súa comparecencia no pleno do Senado para detallar as medidas que está a levar a cabo o seu Executivo.

• HEMEROTECA | O Goberno central propón subir o salario mínimo entre 12 e 19 euros de forma inmediata e 31 euros o vindeiro ano

O PSOE lanza unha modificación da lei de liberdade sexual tras as reducións de condenas previas derivadas da súa aplicación. Segundo informa infoLibre, socialistas e Unidas Podemos procuran un acordo rápido con "retoques" á alza das penas mínimas que evite un desgaste profundo da coalición de Goberno no inicio do ciclo electoral

• O TSXG conclúe que "cabe a revisión de condenas" coa lei de liberdade sexual caso a caso e só se "favorece o reo"
• "A lei de liberdade sexual nunca pretendeu castigar máis como obxectivo principal, pretende protexer mellor"

O ex-delegado da Xunta na Coruña e ex-director xeral de Xuventude Ovidio Rodeiro volverá ser candidato do PP en Boqueixón, onde xa foi alcalde. Actualmente é deputado no Parlamento de Galicia.

Dimite como deputado do PSOE Odón Elorza, ex-alcalde de Donostia, figura clave para que os socialistas mudasen de postura e aceptasen unha investigación política do accidente de Angrois. Elorza di constatar que as súas iniciativas parlamentarias “xa non resultan útiles desde hai un tempo ao Grupo Socialista”.

• HEMEROTECA (Maio 2018) | Odón Elorza: “Polo seu coñecemento e actitude ética, as vítimas de Angrois non son manipulables por ninguén”

O Panteón de Galegos Ilustres acolleu este domingo un acto polo 137 aniversario do nacemento de Castelao. Ao acto, organizado polo Partido Galeguista, asistiron representantes de diversas institucións e formacións políticas. Nel, o presidente do Parlamento anunciou o acordo de todas as forzas parlamentarias para organizar proximamente unha homenaxe a Castelao na súa condición de presidente do Consello de Galiza, tal e como solicitaran o propio PG e outras entidades [Imaxe: Parlamento de Galicia]

• HEMEROTECA | "Castelao é unha liña recta. Eticamente non hai nada que reprocharlle"
• HEMEROTECA | “Se Castelao se rendese, Galicia aínda estaría hoxe sen Estatuto”

O Burela gaña a súa quinta Supercopa de fútbol sala feminino, cuarta consecutiva, tras gañar ao Melilla 4-1.

• HEMEROTECA (Marzo 2022) | A Mariña e Burela seguen presumindo de equipo feminino: once títulos consecutivos

Audasa saca a concurso por 3 millóns de euros obras de reposición pendentes desde a ampliación de Rande en 2017. Así o anuncia no BOE deste sábado. Xa antes de inaugurar Rajoy a ampliación da ponte en decembro daquel ano o Ministerio de Fomento admitía que quedaban actuacións pendentes.

• HEMEROTECA (Decembro de 2017) | Fomento certifica que a inauguración de Rande deixa obras pendentes en Chapela por máis de 11 millóns

Galicia aumentou un 35% o número de explotacións apícolas na última década, ata achegarse ás 5.000. É a terceira comunidade autónoma en número de explotacións e a quinta en mel producido, cunhas 3.000 toneladas, segundo salientou a Xunta no marco da II Feira do Mel Alvariza en Lalín.

Rueda di que “non hai nada que facer” na CRTVG coa proposta de Feijóo de levar a “independencia” aos medios públicos. O presidente di que “é bo que os medios públicos non estean politizados, e como creo que os medios públicos de Galicia non están politizados, creo que non hai nada que facer, e se estivesen politizados por suposto que o faría”.

• O PP esixe a fin da "colocación de afíns" e a "independencia de RTVE" tras unha década a incumprir a lei da CRTVG
• HEMEROTECA | Rueda ve "axeitada" a "política" da CRTVG sobre os 'venres negros' tras a súa condena por represaliar un traballador

Rueda confirma que “non vai haber apoio económico a centros que segreguen por sexo” nos novos concertos coa escola privada. O presidente, preguntado sobre a posibilidade denunciada pola CIG de que se manteñan eses concertos, ratifica que “a lei establece que non e polo tanto non se van renovar”. [Imaxe: Xunta]

• A Xunta destina 1.900 millóns a concertos coa escola privada ata 2029 e asume que é ilegal subvencionar os que segregan