O xornalista Abel Tomé (Outes, 1984) gaña o Premio García Barros 2024 con “A noite do Oso”. O premio literario organizado polo Concello da Estrada en colaboración coa Editorial Galaxia está dotado con 9.000 euros. Tomé compaxina na actualidade a comunicación e o deseño cun máster en Dereitos Humanos. En 2018 publicou A noite do corvo, a súa primeira novela e en 2019 gañou con A noite do lobo o Premio Illa Nova de Narrativa.
Grande Amore gaña o Premio da Música Independente ao mellor álbum en galego co seu segundo traballo, II. O pasado xaneiro conversamos con Nuno Pico, líder da banda, en vésperas do lanzamento do disco. Ademais, Baiuca levou os premios á mellor gravación de electrónica, mellor produción musical e canción do ano por Diamante / La Mare, que gravou canda Alba Reche; e Xoel López foi distinguido como autor do mellor álbum pop por Caldo Espírito [Imaxe: Premios da Música Independente]
Está activo un incendio forestal dentro do Parque Natural Baixa Limia-Serra do Xurés, no concello de Entrimo (parroquia de Pereira), na fronteira con Portugal. Iniciouse ás 18.30 e nas últimas horas desta tarde queimara xa 2,5 hectáreas. Polo de agora, mobilizáronse para a súa extinción 1 técnico, 2 axentes, 5 brigadas, 3 motobombas, 2 avións e 2 helicópteros.
O Tribunal da Relação de Lisboa reduce a "meras especulações" as sospeitas de corrupción polas que dimitiu o ex-primeiro ministro socialista António Costa. Na súa resolución sobre os recursos que formularon as partes da coñecida como Operação Influencer, este tribunal de segunda instancia non ve indicios de tráfico de influencias e insta a non "confundir um facto, enquanto acontecimento histórico, com o teor de escutas ou mesmo com notícias de jornais", segundo informa a RTP. Tras a dimisión de Costa, o presidente portugués convocou as eleccións que finalizaron con vitoria da dereita e co conservador Luís Montenegro como primeiro ministro.
Os Consellos da Xunta, a reunión semanal do Goberno galego que tradicionalmente viña celebrándose de xeito ordinario os xoves, pasarán aos luns, segundo vén de avanzar Europa Press. A medida busca que esa reunión "marque o ritmo político" da semana, segundo fontes citadas pola axencia informativa. Así, o Consello pasará a celebrarse un día antes que o Consejo de Ministros dos martes, reunión que antes se celebraba os venres e cuxa mudanza foi criticada polo PP estatal.
Renfe inicia a venda este xoves dos billetes para os novos trens Avril que comezarán a circular entre Galicia e a Meseta o 21 de maio. Os trens, de ancho variable, reducirán novamente os tempos de viaxe da maioría das cidades galegas, pero haberá que agardar uns meses para que aumente notablemente a oferta de horarios e prazas debido ás obras que se están a executar na estación madrileña de Chamartín e que condicionan os servizos con todo o noroeste peninsular. [Imaxe: Talgo]
A compañía TAQA, propiedade estatal dos Emiratos Árabes, lánzase á compra de Naturgy, resultante da adquisición da antiga Unión Fenosa por Gas Natural. A empresa de Abu Dhabi confirmou negociacións coas actuais propietarios da empresa española, que se saíse adiante tería que concretarse mediante unha OPA polo 100% das accións. Polo momento, di, "non houbo ningún achegamento" directo a Naturgy. A CNMV suspendeu cautelarmente este mércores a cotización da enerxética ao fío destes movementos e permitiu retomala contra as 11h30 da mañá.
Belén Regueira, nova decana do Colexio Profesional de Xornalistas de Galicia. A entidade profesional confirma a proclamación da única candidatura para a renovación da súa Xunta de Goberno, na que Sonia Vizoso, Marcos Sanluis e Francisco González Sarria -ata agora, decano- exercerán como vicedecanos. A nova Xunta de Goberno toma posesión o vindeiro maio. O CPXG é entidade de dereito público que representa o sector no noso país dende a súa creación por lei en 1999.
A xa ex-conselleira de Promoción do Emprego, Elena Rivo, renuncia seu escano como deputada do PP vinte e catro horas despois de ser excluída do Goberno, segundo puido confirmar Praza.gal. Rivo foi conselleira menos dun ano; estaba no posto dende xuño de 2023, cando Rueda a elixiu no marco da crise de goberno provocada por Feijóo para compoñer as candidaturas do PP nas eleccións xerais. [Imaxe: CC BY-SA Xunta]
Milleiros de persoas ao son de Baiuca no festival Coachella de California. O escocés Barry Can't Swim incluíu na súa actuación a interpretación de Sunsleeper, tema que toma como base o tema Mangüeiro do artista galego. O pasado 2023, a composición xa acompañara o evento internacional de presentación do novo Apple Watch. Vídeo compartido por Baiuca nas súas redes sociais.