Fálase

A Xustiza reparte culpas sobre a frustrada creación en 2016 da Área Metropolitana de Vigo. Un xulgado de Vigo sentenza que a Asemblea da nova administración constituíse correctamente, en contra do que defendía o PP, pero que non podía comezar a funcionar inmediatamente, como quería Abel Caballero, porque non se cumpría o requisito legal de que a cidade estivese xa integrada no Transporte Metropolitano. O xulgado salienta que non lle compete a el dicir por que a día de hoxe aínda non se produciu esa integración, proceso no que Xunta e Concello de Vigo se culpan mutuamente.

12 anos despois de adxudicar as obras, o Ministerio de Transportes abre o primeiro treito da Autovía A-56 Ourense-Lugo na Barrela. O treito, único que estaba en obras desde Guntín, terá máis utilidade para o tráfico que se dirixe de Lugo cara ao Ribeiro que para comunicar coa cidade de Ourense.

• HEMEROTECA | Estas obras levan unha década nos orzamentos do Estado e aínda nin empezaron

O ministro de Xustiza confirma que "a vindeira semana comezarán a tramitarse" as peticións de indulto presentadas para as líderes independentistas catalás Carme Forcadell e Dolors Bassa, que cumpren condena de 11 e 12 anos de cárcere.

Feijóo asegura que Galicia foi "xerme da unidade española" e "prólogo da europea" grazas aos "valores de liberdade, tolerancia e entendemento que representa o Camiño de Santiago". Afirmouno na presentación dun libro da xornalista Isabel San Sebastián, na que o presidente da Xunta participou por videoconferencia dende a sede da Presidencia, en San Caetano. (Imaxe: Xunta)

Este mércores é o día fixado pola Xunta para o adiado comezo do curso en Secundaria. Os sindicatos do ensino desenvolven a segunda xornada de folga para reivindicaren maiores medidas de seguridade nas aulas fronte á COVID-19

O Parlamento celebra hoxe o seu primeiro pleno ordinario tras máis de sete meses. Entre os asuntos a debate, a petición de crear unha comisión de investigación sobre a COVID-19 nas residencias de maiores, tramitada polo BNG e apoiada tamén polo PSdeG, pero que o PP prevé desbotar. A sesión pódese seguir ao vivo na web do Parlamento.

• O PP frea a investigación da COVID-19 nas residencias e o BNG ofrece reformulala porque "o importante é dar a resposta aos maiores"

Morre o segundo piloto do hidroavión portugués que caeu a comezos de agosto en Lobios durante a extinción dun incendio, segundo informa La Gaceta de Salamanca, de onde era orixinario. O outro piloto falecera poucos minutos despois do accidente, mentres era atendido no lugar polos servizos de emerxencias.

• HEMEROTECA | “Realizaba un ascenso por riba dunha ladeira moi pronunciada e precipitouse”: Comeza a investigación do accidente do hidroavión en Lobios

A Xunta publica no DOG a creación do Comité Educativo de Persoas Expertas para afrontar a emerxencia sanitaria derivada da pandemia. Este organismo, que bota a andar unha vez iniciado o curso escolar en Infantil e Primaria, no día de inicio das clases na universidade e ás portas do adiado curso escolar en Secundaria, estará composto por unha trintena de persoas, entre cargos da Xunta e representantes dos diversos niveis do ensino. 

• A primeira semana de clase en Infantil e Primaria deixa 96 positivos e un colexio e 27 aulas pechadas

A Xunta decidiu intervir o fogar residencial El Pinar (Culleredo) tralo incremento no número de positivos por coronavirus rexistrado este sábado: 21 infeccións entre os usuarios e 7 entre o persoal

As e os 9 activistas da Casa Cornide serán xulgados o vindeiro 14 de outubro na Coruña. O 26 de setembro do ano 2017 un grupo de militantes do BNG despregou unha faixa no balcón do inmoble, ocupado polos herdeiros do ditador Francisco Franco, que na actualidade están tentando vendelo.