Fálase

Pontevedra botou a andar o Consello das Crianzas, formado por 18 nenos e nenas entre os 10 e 11 anos seleccionados entre os centros escolares da cidade. Durante os vindeiros meses participarán en dúas sesións mensuais co obxectivo de achegar ao Concello as súas demandas e suxestións para mellorar a cidade. O alcalde Miguel Anxo Fernández Lores destacou que Pontevedra "é e debe ser amiga dos nenos e das nenas, un lugar no que poder xogar con liberdade, sentirse seguras e seguros e estar nas rúas sen precisar da vixianza das persoas adultas"

• HEMEROTECA | Francesco Tonucci: "A rúa é perigosa porque non hai nenos nela, está abandonada"

Rematan no Porriño as obras de recuperación do templete de Antonio Palacios, que foi acceso á primeira liña da rede de Metro de Madrid e que se trasladou ao concello natal do arquitecto no ano 1970. O monumento, en cuxa restauración se investiron 260.000 euros, está situado na entrada do Camiño Portugués ao seu paso pola localidade

A Diocese Tui-Vigo permitiu e publicitou unha homenaxe a un cura acusado de pederastia, segundo revela El País. A homenaxe a Manuel Rodríguez Hermelo tivo lugar o 19 de decembro na parroquia de Santa Marta, en Pontevedra, da que foi sacerdote entre 1994 e 2021, e a diocese deu conta dos actos na súa web e redes sociais, publicacións que foron borradas despois da consulta do xornal. O crego está acusado por abuso de menores por un exalumno do Seminario Menor de Tui entre 1969 e 1971, un caso que estaría prescrito para a xustiza.

Dous anciáns morren nunha residencia en Covelo tras un gromo de sarna. Segundo publica Faro de Vigo, hai cando menos trinta persoas infectadas entre usuarias e traballadoras do centro de atención á terceira idade da Fundación San Rosendo. Leváronse a cabo xa traballos de desinfección das instalacións e a Dirección Xeral de Saúde Pública administrou o primeiro ciclo do trataramento ás persoas afectadas.

O BNG reclama á CRTVG unha "rectificación inmediata" ao sinalar no Telexornal que "non estivo" no acto da Fundación Castelao que abriu o ano dedicado ao político e artista malia non ser certo, xa que a formación soberanista estivo representada pola súa vicevoceira parlamentaria, Olalla Rodil, alén de cargos institucionais como a alcaldesa de Santiago, Goretti Sanmartín -na imaxe, no Panteón de Galegas e Galegos Ilustres tras o acto-. Esa mención deu paso ás declaracións nas que o conselleiro de Cultura, José López Campos, reprochou ao Bloque que o mesmo día organizase unha homenaxe de seu a Castelao en Pontevedra. Horas despois, a canle pública atribuíuno a través das redes sociais a "un erro".

• "Castelao convócanos sempre e únenos a todos": o Ano Castelao comeza ao pé do Panteón no seu 75 cabodano
• O BNG levará ao Parlamento o recoñecemento legal de Castelao como primeiro presidente galego

A Xunta inaugura unha "área de estacionamento segura e protexida con perspectiva de xénero" no polígono industrial de San Cibrao das Viñas. Rueda di que un dos motivos polos que hai poucas mulleres transportistas "é a necesidade de infraestruturas que garantan a seguridade mentres pernoctan".

Pontón fixa a vivenda como prioridade do BNG en 2025. A líder do Bloque subliña que no período de sesións a piques de comezar no Parlamento a formación soberanista defenderá "un novo modelo" de vivenda pública "baseado en tres eixos": "acadar as 16.000 vivendas públicas en dúas lexislaturas" mediante novas construcións e adquisicións de inmobles baleiros, "intervención do mercado para limitar o prezo do alugueiro e unha rede de protección social que garanta que ninguén pase polo drama de quedar na rúa" a causa dos impagamentos, para o que promoverán, avanza, "unha prestación de prevención de perda da vivenda" ou "un programa reforzado de axudas ao alugueiro".

• Unha de cada catro familias nas cidades galegas vive de alugueiro e paga un 28% máis que hai cinco anos
• As vivendas protexidas previstas pola Xunta ata 2028 só cobren un 20% da demanda
• HEMEROTECA | Pontón revalida liderado e albo estratéxico no BNG: "Non hai nada máis revolucionario que gobernar"
• HEMEROTECA | Pontón reprocha a escaseza de vivenda protexida a Rueda, que retruca co congreso da UPG

O adestrador de fútbol sala e deputado do PP Pablo Prieto, único candidato para remudar a Rafael Louzán como presidente da Federación Galega de Fútbol tras a súa marcha á Federación Española. Prieto, O ata agora vicepresidente da entidade federativa será proclamado novo presidente unha vez ratificado o vindeiro día 16 que non existen recursos contra a súa candidatura. Prieto, que xa fora concelleiro en Narón entre 2011 e 2014, foi o candidato número 17 na lista do PP pola Coruña nas eleccións galegas de 2024 e incorporouse ao Parlamento en xuño dese ano, tras as saídas doutros deputados para ocupar cargos na Xunta. No eido futbolístico adestrou equipos coma O Parrulo de Ferrol, o Ázkar Lugo ou o Sevilla, así como a selección de Libia e dous equipos nos Emiratos Árabes, o Al Wahda e mais o Al Nasr. Unha vez proclamado como presidente da Federación deberá abandonar o seu escano, dado o réxime de incompatibilidades existente na Cámara galega.

• HEMEROTECA | Louzán, o xogador que desequilibrou de vez a final de Feijóo polo ascenso
• HEMEROTECA | Louzán, favorito para presidir a RFEF malia a súa sentenza de inhabilitación, que o podería apartar do cargo

A alcaldesa da Coruña, Inés Rey, someterase a unha cuestión de confianza se, como todo apunta, o Goberno local do PSdeG non chega a un acordo co BNG para aprobar os Orzamentos de 2025. Condicionar as contas municipais a unha cuestión de confianza implica que, se no prazo dun mes dende o eventual resultado negativo da votación a oposición non formula unha moción de censura cunha alcaldía alternativa, o orzamento fica aprobado. O Bloque coruñés vén sinalando incumprimentos do pacto orzamentario de 2024 como a razón de non asinar un novo.

• HEMEROTECA | Unha mudanza, un concello sen contas e estabilidade: as cidades galegas, un ano tras as municipais

Refachos de vento superiores aos 130 quilómetros por hora en puntos da Mariña e da Costa da Morte nas primeiras horas deste mércores, marcadas tamén polas fortes chuvias. MeteoGalicia ten activa a alerta amarela por vento en toda Galicia e por precipitacións nas provincias da Coruña e Pontevedra, así como en puntos do interior ourensán. A alerta é laranxa por ondas de ata 7 metros en toda a costa agás na Mariña, onde é amarela. O paso desta fronte polo país prodúcese na xornada na que se reinicia a actividade escolar.