Fálase

O BNG reclama á CRTVG unha "rectificación inmediata" ao sinalar no Telexornal que "non estivo" no acto da Fundación Castelao que abriu o ano dedicado ao político e artista malia non ser certo, xa que a formación soberanista estivo representada pola súa vicevoceira parlamentaria, Olalla Rodil, alén de cargos institucionais como a alcaldesa de Santiago, Goretti Sanmartín -na imaxe, no Panteón de Galegas e Galegos Ilustres tras o acto-. Esa mención deu paso ás declaracións nas que o conselleiro de Cultura, José López Campos, reprochou ao Bloque que o mesmo día organizase unha homenaxe de seu a Castelao en Pontevedra. Horas despois, a canle pública atribuíuno a través das redes sociais a "un erro".

• "Castelao convócanos sempre e únenos a todos": o Ano Castelao comeza ao pé do Panteón no seu 75 cabodano
• O BNG levará ao Parlamento o recoñecemento legal de Castelao como primeiro presidente galego

A Xunta inaugura unha "área de estacionamento segura e protexida con perspectiva de xénero" no polígono industrial de San Cibrao das Viñas. Rueda di que un dos motivos polos que hai poucas mulleres transportistas "é a necesidade de infraestruturas que garantan a seguridade mentres pernoctan".

Pontón fixa a vivenda como prioridade do BNG en 2025. A líder do Bloque subliña que no período de sesións a piques de comezar no Parlamento a formación soberanista defenderá "un novo modelo" de vivenda pública "baseado en tres eixos": "acadar as 16.000 vivendas públicas en dúas lexislaturas" mediante novas construcións e adquisicións de inmobles baleiros, "intervención do mercado para limitar o prezo do alugueiro e unha rede de protección social que garanta que ninguén pase polo drama de quedar na rúa" a causa dos impagamentos, para o que promoverán, avanza, "unha prestación de prevención de perda da vivenda" ou "un programa reforzado de axudas ao alugueiro".

• Unha de cada catro familias nas cidades galegas vive de alugueiro e paga un 28% máis que hai cinco anos
• As vivendas protexidas previstas pola Xunta ata 2028 só cobren un 20% da demanda
• HEMEROTECA | Pontón revalida liderado e albo estratéxico no BNG: "Non hai nada máis revolucionario que gobernar"
• HEMEROTECA | Pontón reprocha a escaseza de vivenda protexida a Rueda, que retruca co congreso da UPG

O adestrador de fútbol sala e deputado do PP Pablo Prieto, único candidato para remudar a Rafael Louzán como presidente da Federación Galega de Fútbol tras a súa marcha á Federación Española. Prieto, O ata agora vicepresidente da entidade federativa será proclamado novo presidente unha vez ratificado o vindeiro día 16 que non existen recursos contra a súa candidatura. Prieto, que xa fora concelleiro en Narón entre 2011 e 2014, foi o candidato número 17 na lista do PP pola Coruña nas eleccións galegas de 2024 e incorporouse ao Parlamento en xuño dese ano, tras as saídas doutros deputados para ocupar cargos na Xunta. No eido futbolístico adestrou equipos coma O Parrulo de Ferrol, o Ázkar Lugo ou o Sevilla, así como a selección de Libia e dous equipos nos Emiratos Árabes, o Al Wahda e mais o Al Nasr. Unha vez proclamado como presidente da Federación deberá abandonar o seu escano, dado o réxime de incompatibilidades existente na Cámara galega.

• HEMEROTECA | Louzán, o xogador que desequilibrou de vez a final de Feijóo polo ascenso
• HEMEROTECA | Louzán, favorito para presidir a RFEF malia a súa sentenza de inhabilitación, que o podería apartar do cargo

A alcaldesa da Coruña, Inés Rey, someterase a unha cuestión de confianza se, como todo apunta, o Goberno local do PSdeG non chega a un acordo co BNG para aprobar os Orzamentos de 2025. Condicionar as contas municipais a unha cuestión de confianza implica que, se no prazo dun mes dende o eventual resultado negativo da votación a oposición non formula unha moción de censura cunha alcaldía alternativa, o orzamento fica aprobado. O Bloque coruñés vén sinalando incumprimentos do pacto orzamentario de 2024 como a razón de non asinar un novo.

• HEMEROTECA | Unha mudanza, un concello sen contas e estabilidade: as cidades galegas, un ano tras as municipais

Refachos de vento superiores aos 130 quilómetros por hora en puntos da Mariña e da Costa da Morte nas primeiras horas deste mércores, marcadas tamén polas fortes chuvias. MeteoGalicia ten activa a alerta amarela por vento en toda Galicia e por precipitacións nas provincias da Coruña e Pontevedra, así como en puntos do interior ourensán. A alerta é laranxa por ondas de ata 7 metros en toda a costa agás na Mariña, onde é amarela. O paso desta fronte polo país prodúcese na xornada na que se reinicia a actividade escolar.

Trump volve ameazar con accións imperialistas contra Panamá e Groenlandia. Ás portas de regresar á presidencia dos EUA, o magnate republicano asegura non desbotar accións militares contra ambos territorios se os gobernos panameño e dinamarqués non acceden ás súas pretensións de incorporar o canal e a illa a territorio estadounidense. [Imaxe: CC-BY-SA Gage Skidmore]

A ourensá Textil Lonia merca a histórica marca francesa Christian Lacroix. A través dun comunicado, a compañía con sede no Pereiro de Aguiar anuncia a compra do 100% da empresa, que suma ás súas marcas Carolina Herrera e Purificación García. Na imaxe, de arquivo, unha antiga tenda de Christian Lacroix en Francia.  [Imaxe: CC BY-SA Arnaud 25]

• HEMEROTECA | Radiografía do sector industrial galego: unha oportunidade de país en crecemento
• HEMEROTECA | Viriato ou Caramelo: a crise en parte dun téxtil galego que é moito máis que Inditex

Meta prescinde dos equipos de verificación da veracidade dos contidos en Facebook, Instagram e Threads. No marco dun achegamento ao novo Goberno de Donald Trump nos EUA, Mark Zuckerberg, máximo responsable da compañía, anuncia que substituirá esta moderación por notas da comunidade ao estilo da rede X -antigo Twitter- no que presenta como un movemento a prol da liberdade de expresión e contra a "censura" que atribúe a, entre outras, as autoridades europeas.

• HEMEROTECA | Marchar ou ficar no que foi Twitter? "X non está libre de ideoloxía, ten unha propiedade e uns intereses"
• HEMEROTECA | As redes sociais néganse a retirar o 70% dos contidos racistas reportados polo Ministerio de Inclusión
• HEMEROTECA | Facebook non quere que desconectes
• HEMEROTECA | Unha década de 'campaña sucia': dos carteis sen siglas contra o bipartito á desmobilización vía Facebook

Falece o político francés Jean Marie Le Pen, fundador do partido de ultradereita Frente Nacional, aos 96 anos de idade, segundo comunicou a súa familia a AFP.  [📸 Le Pen en 2019 presentando as súas memorias CC-BY-SA Cheep/Wikipedia]