Fálase

O Congreso aproba definitivamente a lei trans, que recoñece a autodeterminación de xénero, e a lei de saúde sexual, que inclúe a nova regulamentación do dereito ao aborto. A lei de saúde sexual saíu adiante por ampla maioría absoluta (185 votos a prol, fronte  154 en contra e 3 abstencións) e o trámite final da lei trans saldouse coa aprobación de tres bloques de emendas procedentes do Senado por maioría absoluta (189, 281 e 279 votos a prol) e o rexeitamento doutra con 286. Na imaxe, a ministra de Igualdade, Irene Montero, no transcurso do debate final destas normas.

• Saúde menstrual, interrupción do embarazo e violencias reprodutivas: as claves da nova lei de saúde sexual
• HEMEROTECA | A lei trans sae adiante no Congreso: "Repara unha débeda histórica do Estado"

Rueda súmase á tese de Feijóo sobre o “dereito legal” e non “fundamental” das mulleres ao aborto e pide agora respectar a lei que o PP criticaba tras avalala o Constitucional. Preguntado pola súa opinión persoal o presidente di que non é relevante, remítese á do presidente do PP e di que o debate quedou rematado unha vez que se pronunciou o Constitucional que “dixo que a lei era válida e por tanto o que contén a lei convértese en dereito”.

• Feijóo di ver "correcta" a lei do aborto agora avalada polo Constitucional, cuxa derrogación apoiou dende a Xunta
• Feijóo foi pioneiro en protexer por lei as teses antiabortistas: 13 anos de abeiro da Xunta á 'Red Madre'
• HEMEROTECA (2014) | A ambigüidade de Feijóo sobre o aborto exaspera a oposición

A Cidade da Xustiza de Vigo require novas obras menos dun ano despois da inauguración tras gastar a Xunta nela 43 millóns de euros. O TSXG sinalou este mércores que é necesaria “a realización de certas melloras, entre elas a ampliación dalgunhas salas de vistas”. 

• HEMEROTECA (16/2/2022) | Feijóo anuncia o remate da Cidade da Xustiza de Vigo, cuxas obras pasaron de 27 a 43 millóns e tardaron o dobre do previsto

Feijóo di agora que o aborto "é o dereito que ten unha muller de acordo coa lei do seu país" pero que non o "considera un dereito fundamental" por non figurar "na Convención de Dereitos Humanos". O ex-presidente e actual líder do PP agrega que "raia o cómico" que a prensa lle pregunte ao respecto tras fracasar o recurso do PP contra a lei do 2010 no Constitucional e acusa os medios de pretender "desviar a atención" sobre o que denomina "implosión histórica" do Goberno do PSOE e UP. A pasada semana, tras o rexeitamento do recurso no TC, dixo ver "correcta" a lei de 2010, cuxa derrogación apoiou dende a Xunta.

• Feijóo di ver "correcta" a lei do aborto agora avalada polo Constitucional, cuxa derrogación apoiou dende a Xunta
• Feijóo foi pioneiro en protexer por lei as teses antiabortistas: 13 anos de abeiro da Xunta á 'Red Madre'
• HEMEROTECA (2014) | A ambigüidade de Feijóo sobre o aborto exaspera a oposición

Salvamento Marítimo confirma o falecemento dun mariñeiro do pesqueiro vigués Novo Alborada, que faenaba no caladoiro do Gran Sol, a uhas 165 millas das illas Sorlingas (Reino Unido). O buque arrastreiro xa está camiño do Porto de Vigo co corpo do mariñeiro a bordo. O delegado do Goberno de España en Galicia, José Miñones, trasladou o seu pesar á familia e achegados do traballador e informou de que permanece "en contacto permanente coa armadora".

• DATOS | 67 persoas morreron en accidente laboral en Galicia en 2022, a cifra máis alta dende o 2009 

A Xunta envía catro foodtrucks por todo o Estado para "animar a consumir peixes e mariscos galegos" baixo lemas lemas como Mejillón busca amante para relación abierta, Merluza busca huevos para amar en tiempos revueltos, Sardiña busca cachelo que estea para mollar pan ou Bonito busca pareja para relación sana. A iniciativa foi presentada este mércores en Santiago polo presidente da Xunta, Alfonso Rueda, e a conselleira do Mar, Rosa Quintana. "Percorrerán preto de 260 municipios de toda España vencellados co Camiño de Santiago para promocionar a calidade e versatilidade dos produtos galegos do mar ao abeiro da campaña Galicia sabe aMar", sinala o Goberno galego.

O Supremo condena a Manuel Fernández de Sousa-Faro, ex-presidente de Pescanova, a 6 anos de cadea. Son dous menos dos que lle impuxera a Audiencia Nacional. 

• AMPLIAMOS 👉 O Supremo reduce de 8 a 6 os anos de cadea para Fernández de Sousa-Faro, ex-presidente de Pescanova

IPC | O incremento anual dos prezos comezou 2023 en Galicia no 6,4%. O dato de xaneiro é o mesmo que o de decembro de 2022 e está cinco décimas por riba da media estatal, que comezou o ano no 5,9%, dúas décimas máis que no mes anterior, sobre todo pola fin do desconto xeral de 20 céntimos para os combustibles. Mentres, a variación do IPC interanual dos alimentos situouse en xaneiro en Galicia no 15,7% (nove décimas menos que en decembro), mentres que o dato medio estatal está no 15,5% (dúas décimas menos). 

• AMPLIAMOS 👉 A inflación estáncase en xaneiro, cun descenso dos alimentos pola rebaixa do IVE e un encarecemento dos combustibles
• HEMEROTECA | A inflación xeral segue a moderarse mentres continúa disparada nos alimentos cunha alza interanual de prezos do 16%

O Consello de Ministros aproba a suba do Salario Mínimo Interprofesional un 8%, ata 1.080 euros mensuais en 14 pagas, con efecto retroactivo dende o 1 de xaneiro. A vicepresidenta segunda e ministra de Traballo, Yolanda Díaz, subliña que o incremento beneficia directamente uns 2,5 millóns de persoas traballadoras. O SMI, subliña o Goberno de España, aumentou un 47% nos últimos catro anos, o que implica "cumprir co compromiso" do PSOE e Unidas Podemos de "acadar cando menos o 60% do salario medio antes da fin da lexislatura".

• HEMEROTECA | Menos impostos aos soldos baixos fronte a rebaixas con extra para ricos: colisión tributaria entre Estado e Xunta

Máis dun cento de centros educativos de Galicia e do norte de Portugal celebran o Día da Radio con Ponte nas Ondas. Arredor de 2.000 estudantes realizaron unhas 15 horas de radio dende diferentes centros de ensino e emisoras; estudios das universidades de Santiago, Vigo e do Minho (Braga) e varios colexios ou instalacións das radios locais de Caminha, Tui, A Estrada, Fene, Burela ou As Nogais acolleron as emisións dos traballos, que se recompilan no portal de Escolas nas Ondas. Na imaxe, escolares na actividade de Ponte nas Ondas na Facultade de Ciencias da Comunicación da USC, este 13 de febreiro.

• Artistas da lusofonía celebran nun videoclip o recoñecemento de Ponte nas Ondas pola UNESCO
• A UNESCO recoñece a irmandade galego-portuguesa de Ponte nas Ondas! como exemplo de boas prácticas