A neve caeu este domingo nunha parte significativa de Galicia. Boa parte da provincia de Ourense, a montaña lucense ou o interior de Pontevedra tinguiuse de branco nunha xornada moi fría, na que os termómetros chegaron a marcar 6 graos baixo cero en Cabeza de Manzaneda. Viana do Bolo ou Calvos de Randín tamén marcaron valores negativos. Este luns continuará o tempo frío e as precipitacións xeneralizadas, pero subirán as temperaturas e a cota de neve subirá e esta será menos frecuente.
Ampla maioría absoluta das dereitas nas eleccións de Estremadura. Con máis do 80% escrutado, o xa gobernante PP vira en primeira forza desa autonomía malia medrar apenas un escano (ata 29 neste punto do reconto) por mor do devalo do PSOE, que perde o primeiro posto ao minguar unha decena de escanos e máis de 13 puntos. A actual presidenta, María Guardiola, seguirá a depender da extrema dereita de Vox, que sobe nove puntos e media ducia de escanos (11). Pola esquerda, Unidas por Extremadura ascende catro puntos e logra 7 escanos (+3).
O BNG exixe pór fin ás peaxes da AP-9 e transferir á Galiza a infraestrutura. Durante un acto simbólico de protesta realizado na Área de San Simón e na portaxe de Vilaboa, o deputado Néstor Rego cualificou de “inxustificábel” que a sociedade galega continúe a pagar portaxes por unha infraestrutura “máis que amortizada” e cuxa concesión foi declarada ilegal pola Unión Europea.
As esculturas do Pórtico da Gloria, tal e como as concibiu o Mestre Mateo. O proxecto KosmoTech_1200, participado pola USC, o CISPAC e a Fundación Catedral de Santiago, presenta a reconstrución dixital que permite contemplar as oito pezas coa súa policromía orixinal. O traballo foi elaborado baixo a dirección científica de Francisco Prado-Vilar, con Alexandre González Rivas a cargo da virtualización e restauración dixital co apoio do Consello da Cultura Galega. O vídeo e todo o material co contexto histórico está dispoñible no sitio web do CCG e tamén é parte da exposición na que o Museo do Pobo Galego amosa as dúas esculturas recuperadas definitivamente polo Concello de Santiago tras 70 anos de espolio franquista.
A USC proclama definitivamente as catro candidaturas á Reitoría. Rosa Crujeiras, Maite Flores, María José López e Alba Nogueira. A Comisión Electoral deixara fóra da proclamación provisional a candidatura de Nogueira alegando falta de documentación e incumprimentos de requisitos, resolución que a xa candidata oficial recorreu con éxito. Os comicios celébranse o 12 de febreiro, cunha campaña electoral previa do 27 de xaneiro ao 10 de febreiro de 2026. Se fose precisa, a segunda volta da votación desenvolveríase o 11 de marzo.
Cuarta xornada de folga este venres nos buses da provincia da Coruña. Os paros, convocados por CIG, UXT e CCOO, súmanse aos dos días 5, 12 e 15 e poderían virar en indefinidos en xaneiro se non hai avances na negociación para renovar o convenio provincial do sector. [Imaxe: CIG]
A nova estación intermodal da Coruña levará o nome de María Casares, segundo anunciou a alcaldesa, Inés Rey, durante o seu discurso de Nadal, no que fixo balance do 2025 e marcou os obxectivos para 2026.
A Xunta convoca 73.600 persoas maiores de 60 anos para vacinarse fronte á gripe nos hospitais públicos esta fin de semana. Estas novas xornadas extraordinarias de vacinación, ante o avance da doenza, desenvolveranse o sábado de 10 a 14 horas e de 16 a 20 horas nos hospitais comarcais e principais das sete áreas sanitarias e tamén o domingo nos grandes complexos hospitalarios.
Sirat, de Oliver Laxe, precandidata en cinco categorías dos Oscar. A coñecida como shortlist dos premios da Academia de Hollywood inclúea como aspirante a mellor filme internacional e tamén nas categorías de mellor son, mellor cásting, fotografía e canción orixinal. [Imaxe: © Quim Vives]
Luís Tosar recibe a Medalla de Ouro ao Mérito nas Belas Artes xunto a 34 persoeiros e entidades máis. O Consello de Ministros aprobou este martes a concesión destes galardóns a proposta do ministro de Cultura, Ernest Urtasun. O Goberno de España cualifica o actor lucense como un dos "máis sólidos e versátiles do cinema español, capaz de transitar con naturalidade entre o drama, o thriller, a comedia ou o cine de autor". Foto: RTVA.
