Fálase

Sirat, de Oliver Laxe, acollida entre aplausos na súa estrea no Festival de Cannes. Esta é cuarta película de Laxe e a cuarta vez que participa no certame francés, con O que arde gañou o premio do xurado da sección Un Certain Regard, mais é a primeira ocasión na que o fai dentro da sección oficial e opta á Palma de Ouro. Ao remate da proxección do filme este xoves, Oliver Laxe agradeceu ao Festival de Cannes a súa aposta polo "cinema fráxil e forte ao mesmo tempo" e celebrou que no Estado español, representado tamén na sección oficial por Romería, de Carla Simón, se faga un cine "cada vez con máis alma". [📸 Movistar Plus+]

Rueda di ante o Lehendakari que a relación con Euskadi "convén moito" a Galicia e agradécelle a colaboración para lograr as competencias de xestión do litoral. O presidente mantivo o seu primeiro encontro con Imanol Pradales este xoves en Euskadi.

• Galicia obtén 17 anos despois a primeira competencia dende a fin do Goberno de PSdeG e BNG
• HEMEROTECA (31/8/2023) | O lehendakari pide máis autogoberno para Euskadi, Galicia e Catalunya cun novo "pacto territorial"

Centos de persoas protestan no centro de saúde de Viveiro contra a falta de médicos na Mariña e contra "as mentiras do PP". BNG e PSdeG apoiaron unha mobilización convocada pola Plataforma na Defensa da Sanidade Pública da Mariña. 

• O persoal do Hospital da Mariña estoupa contra a falta de recursos e os prexuízos para os pacientes
• Falta de persoal e "abandono": A Mariña volve erguerse contra as eivas na sanidade pública

Pandeirada no prado. Casa Grande de Xanceda e o Concello de Mesía homenaxean as cantareiras que centran este ano o Día das Letras cunha peza recollida por Baldomero Iglesias, Mero, fillo predilecto do concello, e interpretada polas pandeireteiras e bailadoras da Escola de Música Tradicional da localidade. Con esta Muiñeira de Mesía a pé de prado procuran "facer visible que que a tradición da poesía oral é tan potente que chegou ata un grupo de mozas adolescentes, que cantan con orgullo desde o rural”, o cal "non sería posible en esas mulleres rurais irredutibles que a mantiveron e transmitiron un mundo e unha cultura". Esta muiñeira é parte do cancioneiro recollido no Museo do Pobo Galego na colección de Baldomero Iglesias e que conta con 13.404 coplas recollidas na contorna de Mesía. As pandeiretas para tocala son obra do artesán José Manuel Salvado, Sanín, que as deseñou en exclusiva "con parche de estampado de vaca, madeira negra e ferreñas bicolores" para "integrar a tradición e a modernidade".

• HEMEROTECA | "No rural de Galicia témolo todo, o que faltan son modelos máis cooperativistas, máis colaboración"

Que autor ou autora das Letras Galegas es ti? Noemí García, profesora de Lingua Galega e Literatura, propón un test para saber con cal das homenaxeadas pola Academia estás máis identificado en función da túa personalidade. A partir de versos, frases e petiscos das súas biografías elabora nove preguntas que che levarán a unha das figuras literarias recoñecidas nestes anos. Este quiz é unha das iniciativas que García propón desde o seu proxecto As chaves da Lingua.

RTVE estreará en televisión o filme sobre Castelao Antes de nós, con guión de Pepe Coira, dirixido pola cineasta Ángeles Huerta e producido por Zaza Ceballos, despois do seu paso polas salas. A película, protagonizada por Xoán Fórneas como Castelao e Cris Iglesias como Virxinia Pereira, chega aos cines o vindeiro 23 de maio. 

+INFO | O Castelao "máis íntimo" xa cobra vida no cinema en vésperas da estrea de 'Antes de nós'

Caamaño&Ameixeiras únense ás Tanxugueiras para lanzar unha Ghatiña Mansa que foxe do amor romántico. En vésperas do Día das Letras dedicado ás cantareiras, ambas bandas baséanse en coplas tradicionais nunha letra que reflexiona "sobre a solteiría como forma de resistencia fronte á lóxica do amor romántico e o parellocentrismo". O tema está dispoñible dende este martes en todas as plataformas.

• HEMEROTECA | Caamaño&Ameixeiras: "As letras do disco foron creadas nos bares"
• HEMEROTECA | Tanxugueiras: "A xente que pensa que somos un grupo que fai música 'mainstream' está súper equivocada"

O PKK kurdo anuncia a fin da loita armada tras 40 anos. O líder da organización, Abdullah Öcalan, pediuno en febreiro desde a cadea na que está preso en Turquía. [Foto: Kurdishtruggle CC-BY]

Feijóo convoca congreso do PP estatal para xullo en Madrid. Os estatutos do partido marcan que os congresos ordinarios deben celebrarse cada catro anos, pero non o fai dende 2017, cando Mariano Rajoy foi reelixido no liderado. Dende aquela organizaron dous extraordinarios: un en 2018 para remudar a Rajoy tras perderen o Goberno de España e outro en 2022, para oficializar a destitución de Pablo Casado e a súa substitución por Feijóo, en ambos casos sen relatorios que fixasen a postura da formación sobre a política xeral. Na imaxe, o ex-presidente galego este luns en Madrid no Comité Executivo do PP con dirixentes territoriais do partido entre os que non estivo Alfonso Rueda, ao cadrar o acto co Consello da Xunta  [© PP]

• HEMEROTECA | Feijóo deixa Galicia e toma o mando no PP coa promesa de encarnar o "cambio" pola dereita
• HEMEROTECA | Feijóo executa contra PSOE e Podemos o manual de asedio que estreou fronte á coalición de esquerda na Xunta

Abanca asegura que "non ten interese" nunha eventual fusión co Banco Sabadell. "Ante as recentes informacións publicadas en diversos medios", a entidade "insiste" nun comunicado en que "só participaremos en operacións que garantan a preservación do noso modelo de gobernanza e o noso modelo de negocio", coa culminación da integración do portugués EuroBic como "prioridade actual". Abanca gañou 220 millóns de euros no primeiro trimestre do ano e superou os 1.200 millóns de beneficios en 2024. [Imaxe: © Abanca]

• HEMEROTECA | A OPA do BBVA ao Sabadell en Galicia: superpostos en 43 concellos e disolución dos restos do Gallego
• HEMEROTECA | Da fracasada fusión a Abanca: dez anos da compra dos restos das caixas galegas