Fálase

28M - ENQUISAS | Abel Caballero revalidará a súa ampla maioría absoluta en Vigo e Inés Rey continuará na alcaldía da Coruña tras o 28M, segundo senllas enquisas publicadas este domingo por Atlántico Diario e El Ideal Gallego, respectivamente. Estes inquéritos prognostican o mantemento da representación e dos gobernos do PSdeG nas dúas principais cidades de Galicia, con lixeiros ascensos do número de edís para o PP e tamén para o BNG, ademais de descensos das mareas e, no caso coruñés, a desaparición de Ciudadanos e a entrada de Podemos.

• O PSdeG contrasta o seu "equipo para gobernar a maioría social" de Galicia nas municipais cun PP de Rueda "fóra de xogo"

A Xunta declárase "inquieta" coa nova lei estatal de Vivenda, a piques de ser aprobada, e reclama unha reunión "coa maior urxencia posible" ao Goberno de España ante a "preocupación dos diferentes colectivos profesionais do sector da vivenda en Galicia", di nun comunicado. Ese encontro, reclama o gabinete de Alfonso Rueda, debera ser unha Conferencia Sectorial, que xunta o Executivo estatal coas comunidades autónomas. Nos últimos anos a Xunta vén mantendo que a súa "principal demanda" ao Estado en materia de vivenda son as ocupacións.

• Límite do 3% ás subas do alugueiro e máis zonas tensionadas: así será a nova lei de vivenda
• HEMEROTECA | As ocupacións, "principal demanda" da Xunta ao Estado en vivenda malia admitir que non manexa "cifras exactas"
• 2022 rematou con quince desafiuzamentos por cada novo caso de ocupación en Galicia
• O número de demandantes de vivendas de alugueiro no rexistro da Xunta triplica os inmobles ofertados en Galicia

Nova folga de autobuses: CIG, CC.OO. e UGT convocan paros para os días 27 e 28 de abril e advirten de que "será indefinida a partir do 8 de maio se non se atenden ás súas demandas". Os sindicatos convocantes denuncian "a paralización na negociación dos catro convenios provinciais, a situación precaria do sector tanto no relativo ás condicións laborais como á propia prestación do servizo e os reiterados problemas de seguridade que presentan os vehículos". A folga do pasado 31 de marzo xa logrou un amplo seguimento, paralizando estacións e atrancando o transporte escolar.

• 🔊PODCAST | Fálase - O que pasa cos autobuses en Galicia e a despedida de Leilía
• Un xulgado abre dilixencias por prevaricación contra o director de Mobilidade da Xunta pola súa xestión dos autobuses
• O seguimento "masivo" da folga de autobuses paraliza estacións e atranca o transporte escolar en Galicia
• A xestión dos autobuses pola Xunta, a remolque da xustiza e contra a libre competencia

O Consello Constitucional avala o atraso da idade de xubilación aos 64 anos en Francia, unha das claves da reforma constitucional impulsada polo Goberno e que provocou protestas e folgas en todo o país. Foto: CC-BY Jeanne Menjoulet.

O BNG de Crecente impugna o censo da vila cara ás eleccións municipais do 28 de maio ante a delegación provincial da Oficina do Censo Electoral tras comprobar que o concello figura na "lista de municipios cun incremento anormal do padrón" elaborada por este organismo. 

A fronte nacionalista asegura que no mes de xaneiro xa solicitou que o Instituto Nacional de Estadística investigase "o elevado índice de altas producidas dende o ano 2020, en concreto 270 altas nos últimos tres anos, que tendo en conta as circunstancias demográficas e económicas do noso municipio (Crecente, como se pode observar nas estatísticas, non para de perder poboación) non teñen sentido nin explicación lóxica". [Na imaxe, a casa consistorial © Concello de Crecente]

• INTERACTIVO | O electorado mozo cae a outro mínimo para o 28M en Galicia e o maior de 65 anos xa supera as 700.000 persoas

O Goberno de España acorda con ERC e Bildu a lei de vivenda que limita a suba dos alugueiros, cuxo tope será do 3% en 2024, e amplía as zonas tensionadas. Foto: EH Bildu. 

• AMPLIAMOS 👉 Límite do 3% ás subas do alugueiro e máis zonas tensionadas: así será a nova lei de vivenda

Rueda pon a primeira pedra do monumento aos 12.000 galegos que hai un século construíron o Canal de Panamá. Dentro da súa xira por Panamá, Venezuela e México o presidente da Xunta lembrou a contribución galega a “unha das principais obras da enxeñaría mundial”.

CRISE DE PREZOS | A suba dos prezos situouse nun 3,4% interanual en Galicia o pasado marzo, unha décima por riba da media estatal. A inflación segue sendo moito maior nos alimentos, cun IPC do 16,5% interanual, mesmo dato que o mes previo e que na media estatal. O dato da inflación subxacente -que non ten en en conta alimentos frescos nin prezos da enerxía- sitúase no 7,5% na media estatal, cunha caída dunha décima. Cómpre ter en conta que a forte caída a respecto de meses previos é que a comparación interanual xa é realizada cos meses da forte escalada de prezos do pasado 2022. 

• AMPLIAMOS 👉 A suba xeral dos prezos retrocede a niveis de hai dous anos en Galicia, pero cos alimentos disparados por riba do 16%

Un incendio calcina por completo a nave da empresa Ambigal 360, dedicada á reciclaxe, no polígono industrial Sete Pontes de Vilalba. O lume quedou controlado a pasada madrugada, informa o 112, despois de que fose preciso activar o Plan Territorial de Emerxencias de Galicia para coordinar os medios de emerxencia que actuaron na zona, procedentes de numerosos puntos da provincia de Lugo. Emerxencias confirma que non se produciron danos persoais nun sinistro do que se investigan as causas.

Un incendio nun transformador na rúa nas proximidades da estación Vialia de Vigo deixa sen luz toda a contorna. Adif desmente que tamén haxa outro incendio no interior do túnel de 8 quilómetros do Eixo Atlántico que comunica con Redondela, como por erro informou Renfe, que tamén advirte de hai varios trens afectados e os viaxeiros deberán empregar a estación de Guixar. 

• AMPLIAMOS 👉 Interrompido o Eixo Atlántico ferroviario ao sur de Pontevedra por un incendio a carón da estación Vialia de Vigo