A Xunta concede as Medallas Castelao de 2022 a Camilo Nogueira, ao cociñeiro Javier Olleros, ao xornalista Javier Sánchez de Dios, á coral coruñesa El Eco e ao equipo feminino do Burela Fútbol Sala. Son as primeiras Medallas Castelao que o Goberno galego concede con Rueda como presidente. Os recoñecementos entréganse o 28 de xuño, no aniversario da traída dos restos de Castelao a Galicia en 1984.
Fálase
O alcalde de Pontevedra ratifica que recuncará como candidato do BNG en 2023. Miguel Anxo Fernández Lores asegura sentirse "no mellor momento" para continuar encabezando o goberno local cun "proxecto a medio prazo". Afirmouno nun acto coa portavoz nacional do Bloque, Ana Pontón, que expresa unha "alegría especial" pola decisión de Lores, xa que "todo o BNG ten ollado Pontevedra para aprender como se pode gobernar para mellorar a vida das persoas, como se pode usar o goberno como instrumento de transformación en positivo". Lores é alcalde de Pontevedra dende 1999 e, de lograr revalidar a alcaldía, o de 2023 sería o seu sétimo mandato. [Imaxe: BNG]
Morren dous mariñeiros do atuneiro vigués Albacora Cuatro durante unha explosión mentres o buque era reparado nas Seychelles. As primeiras informacións apuntan a unha fuga de amoníaco como a causa do sinistro, que tamén provocou feridas a outros oito traballadores. Na imaxe, o Albacora Cuatro [©VesselFinder]
Condenado a oito anos de cárcere un home que abusou sexualmente dunha menor tras manter contacto con ela por Instagram. A Audiencia Provincial de Ourense considera probado que o acusado cometeu un delito de abuso sexual cando tiña 24 anos (en 2018) contra unha rapaza de 15 anos á que coñeceu nesta rede social e á que non se poderá achegar a máis de 200 metros durante outros oito anos.
Para o tribunal, a declaración da afectada resulta "avalada por varios elementos de carácter obxectivo, sendo o máis destacable o obtido a través da proba pericial practicada polo instituto de toxicoloxía", pois evidencia que se atopou ADN pertencente ao procesado nas mostras que se obtiveron despois da agresión.
A primeira poxa eléctrica co tope do gas en vigor, a 'excepción ibérica' autorizada pola Comisión Europea, remata cunha baixada do 22% no prezo da luz no mercado maiorista. Pódese consultar máis información nesta ligazón e nestoutra, máis datos sobre o funcionamento do mecanismo para limitar o prezo do gas e mais as compensacións ás eléctricas. [Imaxe: CC BY-SA Juantiagues].
Pontón reclama que a recuperación do viaduto derrubado na A-6 sexa supervisada por unha comisión participada polo Estado, a Xunta e as forzas políticas e pide unha investigación "transparente" sobre o acontecido. "Se esta ponte estivese conectando Madrid, Catalunya ou Euskadi a resposta sería moi diferente", coida a portavoz nacional do BNG, que insta o Ministerio de Transportes a concretar os prazos da obra en canto sexa posible. Agárdase que este martes a Delegación do Goberno de España en Galicia achegue información ao respecto na sesión da Comisión Autonómica de Tráfico, Seguridade Viaria e Mobilidade Sostible que se celebra na Coruña. Na imaxe [CC-BY-NC-SA BNG], Pontón, Néstor Rego, Olalla Rodil e outros membros do BNG na contorna do viaduto caído, este luns.
A TVG anuncia a emisión este luns (23:00) dun especial titulado O meu último verán en Sanxenxo. O rei en Galicia centrado en Juan Carlos I e nos aspectos "máis curiosos das súas múltiples visitas a Sanxenxo", así como na súa "afección ao mundo da vela", todo tras a súa controvertida última viaxe á vila do Salnés. Abordará tamén, avanza, a "orixe da súa amizade" co regatista Pedro Campos. Na nota oficial divulgada pola canle pública non se especifica se o espazo se deterá tamén nos escándalos que atinxiron ao anterior xefe do Estado nos últimos anos, aos casos de fraude fiscal ou aos fondos opacos que manexou. [Imaxe: © TVG]
O PP atribúe á anterior dirección da formación o recurso presentado no Supremo contra a sentenza que condenou o partido e o seu ex-tesoureiro, Luis Bárcenas, pola reforma da súa sede central da rúa Génova. O Partido Popular anuncia que vai retirar o recurso e o seu vicesecretario de Institucións, Esteban González Pons, afirma que tiveron coñecemento del a través dos medios de comunicación.
O PP recorre no Supremo a sentenza que o pasado 2021 condenou o partido e o seu ex-tesoureiro, Luis Bárcenas, pola reforma da súa sede central da rúa Génova de Madrid (na imaxe) con máis dun millón de euros en diñeiro negro. A formación que lidera Alberto Núñez Feijóo alega que a Audiencia Nacional incorreu en fraude de lei e alega, entre outros aspectos, que os feitos prescribiran cando comezaron a investigarse. Aquel ditame volvera dar por acreditada a existencia dunha 'caixa B' no partido. Recentemente, Feijóo confirmou que cancela a venda do edificio, que decidira Pablo Casado coa intención de distanciarse de casos de corrupción coma este.
Marcos Calveiro, novo director de edicións da Editorial Galaxia. O escritor vilagarcián principiou a súa carreira literaria no eido infantil e xuvenil, no que foi recoñecido con premios como o Ala Delta, Barco de Vapor ou Lazarillo. En 2008, a súa novela para público adulto Festina Lente recibiu o Premio da Crítica e, en 2015, gañou o IX Premio Narrativa Breve Repsol con Fontán. En 2017, o seu O xardineiro dos ingleses levou o XXIX Premio García Barros. Recentemente, Galaxia publicou o primeiro tomo da súa saga Curros & Holmes, Curros & Holmes no misterio d’o Kapital, [Imaxe: © Anxo Cabada]