Fálase

Xunta e universidades públicas anuncian un acordo sobre o novo deseño da selectividade. A reitora da USC, Rosa Crujeiras, coida que tras as achegas das tres institucións o sistema da PAU queda "máis robusto" e a participación universitaria segue a ser "moi activa" a través da Comisión Interuniversitaria de Galicia (CIUG) que, salienta o reitor da Coruña, Ricardo Cao, mantén "un papel central, como vén tendo e debe seguir tendo", logrando unha "orde máis acaída" que a proposta inicial do Goberno. Carmen García Mateo, reitora da UVigo, coida que a nova proposta "robustece un sistema que ten demostrado a súa solvencia durante moitos anos", con "equilibrio entre garantir que os exames están cunha custodia de altas garantías e non teñan erros". Na imaxe, xuntanza deste xoves entre a Consellería e as universidades.

• HEMEROTECA | A Xunta di agora que nada impedía revisar os exames de selectividade pero non aclara por que non llo dixo á CIUG
• HEMEROTECA | As universidades ratifican que a Xunta ignora hai dous anos o seu plan para "minimizar erros" na selectividade
• HEMEROTECA | A Xunta aproveita os erros na selectividade para acelerar o plan de control da comisión que a organiza

A Xunta abre dilixencias contra o bar de Arteixo que fai apoloxía franquista. Arteixo Futuro, entidade denunciante, anuncia que a Axencia de Turismo de Galicia determinará agora posibles sancións contra o establecemento que loce desde hai anos lemas e símbolos fascistas. Ademais, advirte de que iniciará "novas iniciativas en defensa da dignidade das vítimas da ditadura". .

• "Rojos abstenerse": denunciado o bar de Arteixo que leva anos facendo apoloxía franquista

Detido un mozo en Aguiño (Ribeira) acusado de matar a seu pai de dous disparos. O falecido tiña 47 anos e foi asistido polos servizos médicos pero faleceu en Urxencias do Hospital do Barbanza. 

Vigo inicia a montaxe das luces do Nadal. O alcalde da cidade, Abel Caballero, anuncia "máis de 12 millóns de luces LED e 500 rúas iluminadas" no acto que deu comezo á preparación da instalación de toda a ornamentación, a cinco meses das festas.

Folga na hostalaría da Coruña o día do eclipse. CIG, CCOO e UGT anuncian un paro para o vindeiro 12 de agosto en toda a provincia que afecta bares, restaurantes, hoteis, pubs e cámpings. As centrais advirten de que levan ano e medio intentando renovar o convenio colectivo e denuncian condicións de "semiescravitude" nalgúns establecementos e que a patronal só propon eliminar o complemento de baixa.

Feijóo intercambia eloxios co fujimorismo pola toma de posesión da nova presidenta do Perú, Keiko Fujimori. O ex-presidente e actual líder estatal do PP acudiu aos actos oficiais do acceso ao poder da filla e herdeira política do réxime de Alberto Fujimori, falecido en 2024 e autor de diversos delitos de corrupción e crimes contra a humanidade polos que cumpriu case dúas décadas de cadea. Tamén participou nun encontro empresarial canda ela con, entre outros, a ex-ministra e ex-presidenta do Congreso Ana Pastor, actualmente directiva nunha empresa sanitaria privada. O popular aproveitou tamén a viaxe para xuntarse con outros líderes da dereita e da extrema dereita latinoamericana, coma o chileno José Antonio Kast.[Imaxe: © David Mudarra / PP]

Santiago xa é zona de mercado residencial tensionado. O BOE publica a declaración que permite de agora en diante ao Concello compostelán aplicar medidas para frear o incremento dos prezos dos alugueiros, culminando así o proceso que a Xunta aceptou o pasado abril tras frear a primeira solicitude do goberno municipal en 2025. É a segunda destas declaracións en Galicia tras a da Coruña, vixente dende mediados de 2025. 

• AMPLIAMOS 👉 Santiago xa é zona tensionada: freo ás subas do alugueiro e gran posuidor dende 5 pisos
• HEMEROTECA | O esforzo para alugar na Coruña, Vigo, Pontevedra e Santiago, por riba do recomendado
• HEMEROTECA | O control dos alugueiros na zona tensionada da Coruña converte Vigo na cidade máis cara para vivir
• HEMEROTECA | A Xunta acepta "por fin" a declaración de zona tensionada para Santiago

Zaragoza albergará a Axencia Estatal de Saúde Pública á que aspiraba Lugo. Pedro Sánchez confirma, no seu balance do 'curso político', que a proposta aragonesa foi a gañadora dun proceso no que tamén concorrían Barcelona, Toledo, Granada, Murcia, León e Oviedo. A candidatura galega principiara co goberno municipal lucense previo á moción de censura, foi herdada polo actual gabinete municipal e recibiu diversos apoios, entre eles da Xunta e do Parlamento. Na imaxe, detalle do edificio do Pazo de Feiras e Congresos lucense, que a cidade propuña para acoller a AESAP. [CC BY-SA RodrigoRega]

Catro dos cinco edís do goberno do PSdeG en Carballeda de Avia desmárcanse da posible fusión con Ribadavia que o alcalde, o tamén socialista Luis Milla, admitiu explorar canda o seu homólogo ribadaviense, o popular César Fernández. Nun comunicado conxunto Noemí Alonso, Daniel González Javier Rodríguez e Jesús Alonso aseguran non "compartir" que "a desaparición do noso concello mediante unha fusión sexa a mellor resposta" para os "desafíos" pola perda e envellecemento da poboación e piden "explorar outras fórmulas" para "compartir servizos" ou "mellorar a xestión". "Rexeitamos este proxecto de fusión e non apoiaremos a súa aprobación", advirten.

• A posible fusión de concellos do Avia, allea ás sete que estudou a Xunta

Morre a balea varada na praia de Sabón, en Arteixo. Salvamento Marítimo, servizos de emerxencias ou o Cemma traballaron desde esta mañá para devolver ao mar un animal de entre dez e doce metros. Unha vez mar adentro, o cetáceo afundiu e expertos de Cemma cren que puido ser atopado xa sen vida a primeiras horas do día.