Fálase

O alcalde de Friol, Jose Ángel Santos (PP), carga con dureza contra a xestión do conselleiro do Medio Rural, José González (PP), que descualifica como "pandemia" para os concellos rurais do país por impulsar proxectos que ve "inviables, innecesarios e pouco eficaces". "A liña de traballo que se está a seguir supoñerá un fracaso rotundo do rural galego", defende nun artigo publicado en Campo Galego. Alberto Núñez Feijóo retrucou a estas críticas instando o rexedor friolense a realizalas polas canles internas do PP. En 2018, Santos xa pedira a dimisión do daquela conselleiro de Política Social, José Manuel Rey Varela.

Xa están no DOG as novas restricións impostas pola Xunta ante a nova vaga da COVID-19, que estarán en vigor dende a vindeira media noite. Podes consultalas sobre o mapa nesta ligazón

• A Xunta pecha 63 concellos pola nova vaga da COVID, adianta o toque de queda e restrinxe máis a hostalería
• MAPA INTERACTIVO | As restricións pola COVID-19, concello a concello

A Xunta adianta o toque de recollida pola COVID-19 ás 22:00 e confirma que toda Galicia queda baixo os niveis alto e máximo de restricións, o que implica, entre outras medidas, o peche da hostalería ás seis da tarde. Alberto Núñez Feijóo adianta que o Goberno galego "recomenda" tamén non celebrar reunións de non conviventes nos domicilios despois desa hora.

• AMPLIAMOS 👉 A Xunta pecha 63 concellos pola nova vaga da COVID, adianta o toque de queda e restrinxe máis a hostalería
• DATOS | Galicia rexistra máis de mil casos da COVID en 24 horas por primeira vez dende o comezo da pandemia

Todos os concellos galegos pasan a estar no nivel alto ou máximo de restricións, que en principio implican limitacións de mobilidade (peches perimetrais) e o peche da hostalaría ás 18 horas, con xuntanzas dun máximo de 4 persoas non convivintes, entre outras medidas. Vén de decidilo o Comité Clínico da Consellaría de Sanidade, que segue reunido. Este mércores pola mañá a Xunta detallará en rolda de prensa as novas restricións, que buscan frear a escalada de contaxios da terceira onda da pandemia.

📺VÍDEO | VINTE estrea o novo d'Os Amigos dos Músicos, 'Non pare a festa', unha canción con sabor de Entroido que esta semana vai acompañar o lanzamento do novo libro de Ramón D. Veiga e David Sierra en Xerais.

• 'Non pare a festa'. A nova canción sobre o entroido d'Os Amigos dos Músicos

Siemens-Gamesa fai oficial a súa intención de pechar a súa factoría das Somozas, o que implica o despedimento de máis de 200 persoas. Está a contalo Ferrol 360.

• AMPLIAMOS 👉 O peche de Gamesa dá outro golpe á economía e ao emprego de Ferrolterra e o norte de Galicia

A Xunta suspende o prazo de presentación de ofertas para a licitación do transporte escolar tras as protestas no Courel polo novo plan, que reducía rutas, ampliaba o tempo das viaxes e empeoraba as condicións. O alumnado foi á folga contra o proxecto, rexeitado por toda a comunidade educativa e o pleno municipal de Folgoso. 

• O Courel protesta contra o plan de transporte escolar, que teima na falta de servizos no rural: "Xa está ben"

Feijóo afirma que, "por suposto", tería sido "mellor non celebrar reunións familiares no Nadal" para evitar contaxios da COVID-19. Afirmouno nunha entrevista con Radio Galicia - Cadena SER despois de que o Goberno galego permitise saltar os peches perimetrais para encontros familiares en Noiteboa, Nadal, Noitevella, Aninovo e Reis, aínda que recomendase non facelo. Previamente, o propio Feijóo apelara a "salvar a campaña de Nadal" e dixera esperar un "reseteo" do sistema sanitario previo ás festas.

• DATOS | Os casos de COVID medran con forza na Coruña, Santiago, Ourense e Ferrol e esténdense por Galicia

O Pescados Rubén Burela FS gañou este sábado a súa terceira Supercopa de España de fútbol sala ao impoñerse 2-0 ao Poio Pescamar FSF. As xogadoras laranxas engaden este trofeo aos títulos de Liga e Copa obtidos nos últimos meses e confírmanse como un dos mellores equipos de fútbol sala do planeta

O Concello de Baltar (Ourense) volve rexistrar esta mañá a temperatura máis baixa en Galicia, con -12,4 graos, segundo informa Meteogalicia. En Verín ou Calvos de Randín tamén se baixou dos dez graos negativos. O récord da temperatura máis baixa corresponde a Xinzo de Limia, onde os termómetros baixaron ata os 19 graos baixo cero o 1 de xaneiro de 1971. Xunqueira de Espadanedo (-15,5), Viana do Bolo (-15) e Calvos de Randín (-14,4) rexistraron tamén valores moi reducidos en anos anteriores.

• Unha ducia de récords climáticos en Galicia