Fálase

Falece Maricarmen, a muller de 87 anos desafiuzada do seu fogar en Madrid, que permanecía ingresada no hospital dende que tivo que marchar á forza da súa vivenda, á que non poderá volver a pesar do acordo que finalmente aceptara a empresa dona do edificio no que residía dende hai setenta anos. O seu caso provocou un movemento social pola crise da vivenda que permanece activo en manifestacións e acampadas como a que continúa no Obradoiro en Santiago, na Porta do Sol en Madrid ou na Praça Catalunya de Barcelona. 

O nulo apoio da maioría do Congreso aos decretos de vivenda propostos polo Goberno a raíz da indignación cidadá por este desafiuzamento levaron o presidente Sánchez a adiantar as eleccións xerais ao 29N. Unha indignación que levou aos sindicatos a convocar unha folga xeral para o vindeiro 11 de novembro. [📸 Fotografía de arquivo de Maricarmen © Sindicato de Inquilinas e Inquilinos de Madrid]

CRÓNICA | "Nós preferimos ladrillo", responde Rueda á petición de Pontón e Besteiro de ir alén de construír vivendas
HEMEROTECA | Clamor cidadán polo dereito á vivenda
HEMEROTECA | Manifestacións e acampada no Obradoiro: a protesta pola vivenda non se detén
DATOS | Quen aluga pisos en Galicia? 'Rendismo popular' pero cada vez maior peso das rendas altas
HEMEROTECA | "Todas somos Maricarmen": a mecha da indignación pola vivenda volve prender nas rúas de Galicia

Ada Colau perfílase como candidata do Frente Amplio á presidencia do Goberno de España nas eleccións do 29N. A formación Más Madrid propón que a exalcaldesa de Barcelona lidere unha candidatura "coral e confederal", sendo cabeza de lista por Barcelona. Segundo esta proposta, a actual ministra de Sanidade por Sumar, Mónica García, presentaríase como líder na lista electoral de Madrid. [📸 ©Fundación Sentit Comú]

Feijóo pon en dúbida o voto por correo. O líder do PP, que presidiu esa empresa pública durante tres anos, anuncia que pedirá "medidas adicionais" á Xunta Electoral durante un acto de precampaña en Ceuta. O ex-presidente da Xunta xa alimentara as teorías da fraude no voto postal na campaña das eleccións xerais de 2023. "Non confío nos directivos de Correos", di agora. 

A folga xeral pola vivenda será o 11 de novembro, data proposta polo Sindicato de Inquilinas e aceptada por CCOO e UGT, segundo adianta El País. A CIG, sindicato maioritario en Galicia, aprobou tamén a convocatoria deste paro de 24 horas. 

• A CIG secunda a folga xeral pola vivenda e a crise de prezos
• CCOO e UGT irán á folga xeral pola crise de vivenda

Aprazada a folga médica indefinida prevista para o vindeiro 28 de outubro "ata que exista un novo goberno" no Estado "con plena capacidade para gobernar". A Unión Médica e Facultativa, que inclúe as organizacións galegas O'Mega e Simega, decide adiar o paro pero asegura que manterá as mobilizacións durante a campaña. 

Abre na Coruña o novo Espazo Cultural Manuel María para a promoción da cultura galega, impulsado pola fundación do escritor chairego. O recinto, no Orzán, acollerá concertos, cursos e diversas actividades culturais. O vindeiro 16 de outubro celebrase neste local o concerto De Manuel María a Begoña Caamaño, coa actuación de Uxía, Santi Cribeiro e Sérgio Tannus.

• Manuel María: o dereito á dignidade e á enteireza

Os sindicatos cualifican de "histórica" a xornada de folga deste pasado martes no ensino concertado e cifran no 65% o seguimento do para para exixir "melloras laborais". O profesorado da escola privada sostida con cartos públicos (convocado por FSIE, UGT, CCOO, USO, SNEP e CIG) pide a súa "homologación salarial" coa rede pública, a redución da carga lectiva ou a regulación da xubilación parcial para todo o persoal. 

• O curso empeza con folga do profesorado no ensino concertado, que pide equipararse ao do público

Alerta laranxa por chuvia esta tarde no interior da provincia da Coruña e no centro e na montaña da de Lugo. As actividades escolares no exterior están suspendidas desde as 15 horas. 

A Xunta de voceiros e voceiras da Federación Galega de Municipios e Provincias (Fegamp) condena por unanimidade a agresión sufrida polo seu presidente, o alcalde socialista de Vilagarcía, Alberto Varela, nunha rúa da súa localidade ao berro de "rojos de mierda". Nunha declaración institucional sinalan o acontecido como "feitos gravísimos e intolerables, cometidos por diverxencias de opinión política que non poden ter cabida nunha sociedade democrática". Este órgano está composto polo alcalde de Poio, Ángel Moldes (PP); a alcaldesa de Betanzos, María Barral (PSdeG) e o alcalde de San Sadurniño, Secundino García (BNG).

• O alcalde socialista de Vilagarcía, agredido na rúa ao berro de "rojos de mierda"

O Consello de Ministros volve aprobar os decretos de vivenda derrogados a pasada semana no Congreso cos votos do PP, Vox e Junts para que sexan votados na Deputación Permanente, órgano que substitúe ao pleno pola disolución das Cortes a causa da convocatoria das eleccións xerais. O segundo decreto, o das prórrogas automáticas dos alugueiros, só entraría en vigor no improbable caso de que sexa convalidado, especificou Pedro Sánchez, que detallou persoalmente as medidas tras o Consello. [© Pool Moncloa]

• Prórroga de alugueiros e freo a desafiuzamentos de persoas pobres: claves dos decretos de vivenda
• Eleccións xerais o 29N: todo á vivenda