Fálase

O BNG recorre ao Tribunal Superior de Xustiza de Galicia para coñecer o contido dos acordos ocultos entre a Xunta e Altri. "O goberno de Rueda leva dous anos ocultando os seus acordos segredos con Altri, por iso tivemos que acudir á xustiza, para poñer luz onde o PP quere que haxa opacidade", asegurou este sábado a portavoz nacional do Bloque, Ana Pontón, nunha visita a unha explotación de vacún en Sarria [na imaxe]. O TSXG admitiu a trámite o recurso contencioso-administrativo presentado polo BNG que busca facer público o Memorando de entendemento subscrito en outubro de 2021 entre a empresa portuguesa e Impulsa Galicia.

• + INFO 👉🏻 A Xunta alega que "descoñece" o contido do pacto secreto con Altri que asinou un conselleiro

A conexión de Vigo por ferrocarril segue interrompida. Adif confirma que a causa das condicións meteorolóxicas os trens con orixe e destino Vigo non prestan servizo e Renfe mantén bloqueada a venda de billetes ata o martes 10, sen medios alternativos de transporte. Tamén permanece cortada a circulación na vía de ancho convencional Ourense-Santiago, entre as estacións de Ourense e O Carballiño. [📸 Estación de Vigo-Guixar © Adif]

• A borrasca Leonardo deixa media Galicia sen tren e provoca máis de 350 incidencias

María López Sández, nova directora da revista Grial.  O nomeamento foi divulgado cadrando coa presentación do número 248 da histórica publicación que, baixo o título Comunicación e novas tecnoloxías, aborda os "profundos cambios derivados da aparición de Internet e das tecnoloxías da información e da comunicación, que transformaron a economía, a produción cultural, os fluxos comunicativos e as relacións sociais, políticas e culturais". López Sández é doutora en Teoría da Literatura e Literatura Comparada e académica da RAG, ademais de escritora. [Imaxe: © Editorial Galaxia]

• Grial en Praza.gal

As fortes chuvias provocan un derrubamento de terra en Pantón que obrigou a cortar a estrada LU-P-4103, segundo informa a Deputación de Lugo. O incidente afecta o quilómetro 12 da vía, que comunica Santo Estevo con Pantón e xa hai habilitados desvíos alternativos.

Renfe suprime polo temporal todos os servizos ferroviarios con orixe e destino en Vigo "sen posibilidade de medios alternativos". A compañía pública especifica que os traxectos atinxidos son tanto os de media e longa distancia coma os de alta velocidade e que permite cambios e anulacións sen custo:

• Vigo Guixar – Santiago
• Vigo Urzaiz – Santiago
• Vigo Guixar – Tui
• Vigo Guixar – Ourense

"Polas condicións meteorolóxicas adversas existe risco de asolagamentos e desprendementos de terras", xustifica. A Xunta ten activas para hoxe alertas laranxas por chuvia en varios concellos do interior de Pontevedra e MeteoGalicia, avisos amarelos por fortes chuvias en todos os concellos da Coruña e Pontevedra e parte de Ourense, ademais de laranxa no mar.

O persoal dos autobuses da provincia da Coruña rexeita o preacordo coa patronal por ampla maioría e retoma a folga. O "non" ao acordo obtivo 831 votos fronte a 336 apoios, 20 sufraxios en branco e 14 nulos. A folga está convocada por CIG, UGT e CCOO para demandar melloras salariais e de condicións laborais para uns 3.000 traballadores, o que segundo argumentan "permitiría a renovación xeracional do sector, que conta cun persoal cunha elevada idade media, e no que as empresas día tras día se queixan da falta de man de obra".

• Décima xornada de folga nos buses da Coruña á espera de que a mediación a free antes dos paros dos trens
• HEMEROTECA | A folga de buses na provincia da Coruña volve este luns e será indefinida desde o 2 de febreiro
• HEMEROTECA | A folga de buses volve paralizar as estacións na provincia da Coruña e ameaza con intensificarse

As candidatas a reitora da USC Rosa Crujeiras, Maite Flores, María José López Couso e Alba Nogueira participan este mércores en Lugo nun debate electoral organizado polo estudantado. O debate celebrarase no Salón de Actos da Escola Politécnica Superior de Enxeñaría a partir das 18 horas e poderase ver en directo a través de Youtube. O xoves á mesma hora terá lugar un novo debate, desta volta en Santiago, na Facultade de Ciencias Políticas.

• Comeza a carreira electoral na USC: catro candidatas para un Reitorado

As Mouras, do coruñés Wedo Goás (Edgar Goás), escollido mellor mural do mundo na categoría Expert Spotlight 2025 de Street Art Cities. O artista levou a a cabo a obra en Fene no marco da edición 2025 do festival Perla Mural Fest.

Xinzo de Limia activa o Plan Municipal de Inundacións ante a situación de emerxencia que se vive na comarca pola acumulación de choivas. Predios e estradas están asolagadas nun amplo espazo, especialmente nos termos municipais de Xinzo e Sandiás e na área que ocupaba a Lagoa de Antela ata a súa desecación artificial, como sucede de forma periódica.

• Un manifesto pide a recuperación de parte da lagoa de Antela no 67 aniversario da súa desecación
• O Estado pon a lagoa de Antela como exemplo de zona húmida para recuperar na próxima década
• "Non imos só chorar pola Lagoa de Antela, senón que temos que reivindicar con orgullo o que foi"

Evaristo, Rebeliom do Inframundo e Kumbia Queers, primeiras confirmacións do Revenidas 2026. O festival, que se celebrará en Vilaxoán do 10 ao 13 de setembro, contará tamén no seu cartel con Ilan Amores, Arrhythmia, Süne e Nadie González. Os abonos xa están á venda na web do Revenidas.