Fálase

Propoñen celebrar o Día do Naturalismo Galego o 9 de marzo, día do nacemento do Padre Sarmiento. Varias entidades, entre as que figuran a Real Academia Galega de Ciencias, o Consello da Cultura Galega, Adega, a Sociedade Galega de Historia Natural, o Grupo Naturalista Hábitat, Verdegaia e a Federación Ecoloxista Galega uníronse para presentar a iniciativa. "É unha vindicación do naturalismo galego, das persoas que levan moitos anos estudando e traballando en prol do noso medio, pero tamén para dar a coñecer a obra de Martín Sarmiento", asegura o naturalista Rafael Loureiro.

"Esperamos que o 9 de marzo, como o Día do Naturalismo Galego, sirva para iniciar un proceso de coñecemento do noso medio, que encete novos e máis profundos estudos naturalistas e científicos. Con esa información, rigorosa e de calidade, ogallá logremos protexer o que aínda se conserva e restaurar o xa estragado", salientan nun comunicado.

As empresas Resonac e Ignis propoñen a compra da antiga planta de Alcoa na Coruña. As actuais instalacións de Alu Ibérica, en venda no marco do proceso concursal por liquidación, serían a sede de varios proxectos, entre eles "unha planta de hidróxeno renovable". 

Así soa Pelea, o novo de Grande Amore, unha "catarse imparable" que é o primeiro avance de II, o vindeiro disco do proxecto musical de Nuno Pico. No tema, explica o artista mariñao, saen "a relucir os demos internos que perseguen a toda unha xeración, o insoportable da situación, e a necesidade constante de rebelarse ante un sistema insostible". O tema está producido por Carlangas e o videoclip, de Xaime Miranda, foi gravado na parrillada San Pedro de Alfoz.

• HEMEROTECA | ENTREVISTA | "O que hai son cancións que están ben e cancións que non o están, non se trata de se son letras políticas ou non"

O Goberno de Navarra pecha co Estado a data para o traspaso definitivo das competencias de Tráfico o vindeiro xullo. Galicia ten aprobada dende 2007 unha lei para asumir esas competencias, que implicarían despregar a Policía galega. O PP apoiou o traspaso dúas veces, pero despois bloqueouno entre protestas de gardas civís presións da extrema dereita. O pasado novembro, ao fío do traspaso a Navarra, dixo consideralo "repugnante" a través de Miguel Tellado, vicesecretario de organización do partido e senador por Galicia.

• Do tren á policía: a Xunta redobra as esixencias ao Estado sobre competencias que renunciou a ter
• HEMEROTECA | O PP renega do "repugnante" traspaso da competencia de tráfico que apoiou dúas veces en Galicia e despois bloqueou 

Milleiros de persoas secundan as mobilizacións feministas do 8M nunha trintena de vilas e cidades galegas. Na imaxe, a manifestación da Coruña.

• AMPLIAMOS 👉O feminismo volve amosar a súa fortaleza no 8M alén das conxunturas
• Cando a metade do mundo parou o 8M: cinco anos da primeira folga feminista

O PSdeG de Samos expulsa o alcalde do seu grupo, Julio Gallego, tras evidenciar que nas vindeiras eleccións apoiará o seu fillo como candidato do PP na vila. É "de extrema gravidade", consideran o resto e edís, que manifestan o seu apoio ao seu candidato para o 28M, Antonio García Jurjo, cun "proxecto que ten como única prioridade o interese e o progreso" da veciñanza. "Temos que pechar este esperpento e apostar por unha candidatura gañadora, que coloque a política municipal de Samos lonxe do Falcon Crest familiar que está montando o PP”, manifestan nun comunicado. Nas eleccións de 2019, o PSdeG logrou a alcaldía de Samos por maioría absoluta, con 5 edís fronte a 2 do PP, 1 do BNG e 1 de CxG.

• HEMEROTECA | O PP escíndese no gran feudo da dereita na montaña de Lugo

A sentenza do Supremo que avala a prórroga de Ence contra o criterio da Audiencia Nacional sitúa como clave da decisión un informe ambiental favorable outorgado pola Xunta. O ditame, que vén de facer público o Tribunal, inclúe un voto particular da maxistrada Ángeles Huet, favorable a anular a prórroga.

• AMPLIAMOS 👉 Ence pode seguir na ría grazas á “confusa” reforma de Rajoy da Lei de Costas en 2013 e a un informe favorable da Xunta
• A ría de Pontevedra, ata 115 anos xunguida a Ence coa blindaxe do PP que agora avala o Supremo
• HEMEROTECA (2012) | O Estado abre a porta á permanencia de Ence na ría de Pontevedra

A Xunta gábase de cumprir con 24 anos de demora unha directiva europea que obrigaba a mellorar o saneamento da ría de Pontevedra en 1999. A Comisión Europea abriu en 2003 un procedemento sancionador no que en 2016 o Tribunal de Xustiza da UE constatou o incumprimento dunha directiva de 1991 que obrigaba a dotar de colectores antes do 1 de xaneiro de 1999 a asentamentos de máis de 10.000 habitantes que vertesen en zonas sensibles, como ocorría coa aglomeración Pontevedra-Marín-Poio Bueu. A conselleira de Infraestruturas, Ethel Vázquez, salientou este martes no Parlamento o peche do procedemento, o pasado 26 de xaneiro, o que segundo di supuxo evitar unha multa de 30 millóns de euros.

• HEMEROTECA | Ence opúxose a que un 6% do terreo público que ocupa en concesión sexa usado pola Xunta para ampliar a depuradora de Pontevedra

O Congreso aproba a toma en consideración da reforma da parte penal da lei de liberdade sexual promovida polo PSOE nunha tensa xornada no seo do Goberno de coalición dos socialistas con Unidas Podemos. Este inicio da tramitación saíu adiante con 231 votos a prol  (PSOE, PP, C's, PNV, PdeCAT, Foro, PRC, CC, NC).

• HEMEROTECA | "A lei de liberdade sexual nunca pretendeu castigar máis como obxectivo principal, pretende protexer mellor"
• HEMEROTECA | Rebaixas de penas por abuso e agresión reabren o debate gobernamental e xurídico sobre a lei de liberdade sexual

O arquitecto británico David Chipperfield gaña o prestixioso premio Pritzker de arquitectura. O veciño de Corrubedo impulsou en Galicia a Fundación RIA, centrada nos desafíos da zona da ría de Arousa e a través da que está a colaborar en diferentes proxectos coa Xunta e mais co Colexio Oficial de Arquitectos de Galicia (COAG), con proxectos como Cara unha axenda territorial de Galicia. No sitio web dos galardóns pódese consultar unha selección dos seus traballos desde que rematou os seus estudos na Architectural Association School of Architecture de Londres no ano 1980.