Fálase

O PP e a Xunta cargan contra o incremento de dotación dos Mossos d'Esquadra tras volver renunciar á Policía galega. O presidente da Xunta ve "especialmente sangrante" ese aumento despois de alegar "circunstancias actuais" que non concreta para bloquear no Parlamento a lei que propiciaría a despregadura do corpo policial avalado polo Estatuto, por unha lei dende 2007, e que tamén reclamara Fraga como presidente. Rueda contrasta o tratamento ao corpo policial integral catalán co que recibe do Estado a unidade da Policía Nacional adscrita á Xunta.

• Rueda esgrime as "circunstancias actuais", que non detalla, para rexeitar a policía galega que quería Fraga
• A policía galega, de "histórica" para Fraga a ligada a ETA para o actual PP
• O PP reafirma a negativa a cumprir a lei da policía galega e impide solicitar as competencias de tráfico

O BNG levará ao Parlamento a creación da Valedoría da Igualdade. A viceportavoz parlamentaria do Bloque, Olalla Rodil, explicou que funcionará "como órgano de defensa cidadá perante situacións de discriminación por razón de xénero, con funcións de investigación, asesoramento, mediación e capacidade de sancionar ás empresas que incumpran ou vulneren 'os principios elementais de igualdade". 

Galicia rexistra o mes de febreiro con menos desemprego desde 1996. Con todo, a situación é preocupante para os sindicatos porque o país mantén unha das taxas de desemprego máis altas de Europa, con 120.977 persoas no paro. Este febreiro produciuse un aumento da afiliación á Seguridade Social de 4.858 de persoas, co que o total de persoas ocupadas afiliadas sitúase en 1.071.948. [📸 Un operario de Stellantis Vigo, nunha imaxe de arquivo CC-BY-SA David Cabezón/Xunta]

Este martes de Entroido é festivo en 161 concellos galegos. En 178 concellos galegos é festiva algunha das xornadas do Entroido. Na maioría, 161, o festivo é o Martes de Entroido e en 11, o Mércores de Cinza. Tres concellos teñen como festividade o Luns de Entroido e outros tres, o luns e o martes. 

•  Máscaras e mudados: a Illa de Ons recupera 50 anos despois o seu Entroido tradicional. 
   

Empeora o estado de saúde do Papa Francisco, que esta tarde experimentou dous episodios de insuficiencia respiratoria aguda, segundo a última actualización do Vaticano. O pontífice, que leva ingresado no hospital desde o pasado 14 de febreiro, volve precisar de ventilación mecánica non invasiva e se mostra orientado e colaborativo. O seu prognóstico é reservado. Foto: CC BY-SA Juantenaphoto

Os entroidos galegos son recoñecidos Ben de Interese Cultural Inmaterial por parte da Xunta. A decisión implicará crear un arquivo con documentos relacionados cos entroidos ou un repositorio de materiais para o ensino.

• Unha ducia de capitais do Entroido galego
• Unha ducia de personaxes do Entroido

O funeral institucional pola alcaldesa de Lugo, Paula Alvarellos, será o vindeiro luns 10 de marzo na Catedral ás 12 horas. Este luns ás 17.30 horas é a cerimonia de carácter familiar.

• OBITUARIO | Paula Alvarellos, a avogada que nun só ano deixou pegada como alcaldesa de Lugo

Magnus Cort (Uno-X) gaña en Santiago e suma o seu terceiro triunfo de etapa nesta edición de O Gran Camiño. O dinamarqués superou no sprint ao galego Carlos Canal (Movistar). O canadiano Derek Gee (Israel-Premier Tech) fíxose coa vitoria na clasificación xeral, por diante do italiano Davide Piganzoli e do propio Cort.

• Unha ducia de 'sterrato' (corredoiras) para os ciclistas de O Gran Camiño

O 2 de marzo de 1856 tivo lugar o Banquete de Conxo, no que un grupo de estudantes (procedentes na súa maioría das clases acomodadas) serviron a comida a artesáns, compartindo pan e mesa cos integrantes da clase traballadora. Foi un encontro de confraternización organizado entre outros por Luís Rodríguez Seoane e no que participaron Aurelio Aguirre ou Eduardo Pondal. Os tres leron un discurso (un brinde) ao seu remate. Nos últimos anos Santiago vén acollendo no mes de maio a Festa do Banquete, que lembra aquela xuntanza na mesma carballeira.

• Os últimos carballos do Banquete de Conxo
• Banquete de Conxo: Celebrando a confraternización como símbolo
• A plantación de cen mil árbores autóctonas acompaña o carballo do Banquete de Conxo na súa carreira para ser Árbore Europea do ano

O xeneral pontevedrés Antonio Budiño Carballo -na reserva dende 2018-, que encabezou a lista de VOX pola provincia nas eleccións xerais de 2019, figura entre os asinantes do manifesto da Plataforma 2025, que busca "reivindicar o legado de Francisco Franco", nunha conmemoración do 50 cabodano do ditador alternativa á impulsada polo Goberno central, crítica coa ditadura. O manifesto ultra, que destaca que Franco "salvou a España dunha revolución socialista armada dirixida polo PSOE" ou que "propiciou a verdadeira reconciliación entre os españois", está asinado por máis de 40 militares retirados.