O ex-presidente recoñece contactos coa formación da extrema dereita con "discreción" e "respecto" para acordaren candidaturas, tentar acceder á maioría da Cámara Alta que permite remudar postos no Constitucional e confrontaren co proxecto unitario liderado por PSOE e Fronte Ampla
Alberto Núñez Feijóo, aínda como presidente da Xunta e do PPdeG, avalou hai case unha década os primeiros pactos do seu partido con Vox, que considerou "homologables a calquera goberno europeo" cando implicaron a histórica mudanza política da Junta de Andalucía. Nos anos seguintes, aínda á fronte do Goberno galego, combinou negativas a eventuais acordos del mesmo con Vox por ser "un partido que está en contra de Galicia" a xustificar alianzas do PP coa extrema dereita por múltiplas vías.
Dende o seu desembarco en Madrid para tomar o liderado do PP tras a defenestración de Pablo Casado, o ex-titular da Xunta secundou no discurso e pola vía dos feitos estes pactos coa organización que lidera Santiago Abascal. En varias comunidades autónomas e tamén para o Estado, nun escenario no que os populares asumen ás claras, como en 2023, que a única posibilidade de retornaren ao Goberno de España tras as eleccións xerais do 29N pasaría por un bipartito cos ultras se entre ambos suman maioría no Congreso.
Pero esa suma, a da Cámara Baixa para lograr investir a Feijóo, non é a única que persegue a forza que tamén sustenta o Executivo galego. Tamén procuran atar e mesmo alargar a maioría absoluta no Senado da que gozaron na lexislatura que remata e mesmo ir máis alá, ata lograr tres quintas partes da Cámara Alta que lles permitisen, por exemplo, elixiren sen contar con ninguén máis as remudas dos membros do Tribunal Constitucional con mandato caducado, elección actualmente bloqueada precisamente polo PP.
Os populares alentan o seu 'número dous', que repite encabezando a candidatura coruñesa, cun "a por eles" dirixido ao BNG e outras forzas soberanistas
Esas negociacións, presentes nos ruxerruxes e nas informacións xornalísticas dende hai tempo, confirmábaas nos últimos días Abascal e ratificábaas o propio Feijóo nunha entrevista na Cadena COPE. "Estamos falando e imos seguir falando con Vox, dende a discreción e dende o respecto", sinala o ex-presidente para xustificar ese posible pacto de listas bipartitas, quer con renuncias de Vox a concorrer nalgunhas circunscricións a cambio doutros postos, quer con outras fórmulas, nun "compromiso de non entregar o Senado ao sanchismo", en referencia ás candidaturas unitarias do PSOE a esta Cámara con Fronte Ampla e outras forzas de esquerda baixo a marca Senado de Progreso en 47 circunscricións, entre elas as catro galegas.
Atendendo ao declarado na COPE, a preferencia de Feijóo é que a formación de extrema dereita se retire dalgunhas circunscricións e que, a cambio, o PP lle entregue algunha das actas ás que ten dereito no Senado por designación dos parlamentos autonómicos, coma os tres postos que elixe o Parlamento de Galicia, coma que ocupou Feijóo de 2022 a 2023 e que actualmente se reparten entre PP (2) e BNG (1), atendendo á composición do lexislativo galego. "Hai posibilidades de chegar a puntos de encontro", celebra Feijóo sobre as súas conversas cos ultras.
O posible bipartito senatorial PP-Vox negóciase mentres os populares seguen ratificando as súas candidaturas ao Congreso. Entre elas, a cabeza de cartel pola Coruña, que volverá ocupar o agora secretario xeral do partido, Miguel Tellado. A formación confirmou o xa esperado recunque a través dunha mensaxe nas redes sociais indicando que "para alegría de BNG, Bildu, ERC e resto de partidos que aman profundamente a España, o xeneral secretario será o cabeza de lista ao Congreso dos Deputados pola provincia da Coruña".
"A por eles!", alentou a conta oficial do PP ao número dous de Feijóo. A mensaxe adopta como eloxioso para Tellado o alcume que durante os anos 90 diversos cronistas e tamén moitos detractores atribuíran a Francisco Álvarez-Cascos, secretario xeral e ministro con Aznar, a quen se atribuía dirixir a formación manu militari.
