Unha ducia de novas máis lidas en Praza no ano 2023

O monopolio da morte: Competencia multa unha funeraria con 83.000 euros por impedir usar un tanatorio a competidoras

A morte é un asunto moi serio en Galicia e ademais, un importante sector económico. A finais de xaneiro publicamos que Competencia multara unha funeraria con 83.000 euros por impedir usar un tanatorio a competidoras. Foi, xunto coa súa continuación, días despois (A funeraria multada por Competencia por impedir usar un tanatorio a outras tamén foi condenada pola Audiencia de Pontevedra) a nova máis lida do ano en Praza.gal

O Sergas é condenado por demorar un ano unha operación que debía tardar 90 días e que o doente rexeitou desviar á concertada

Entre as novas máis lidas do ano figuran varias relacionadas co funcionamento do sistema sanitario en Galicia: listas de espera, mobiizacións do persoal e da cidadanía ou varias condenas contra o Sergas. Entre elas destaca esta, publicada o 7 de febreiro: O Sergas é condenado por demorar un ano unha operación que debía tardar 90 días e que o doente rexeitou desviar á concertada. E tamén estoutra: O Sergas é condenado por acoso laboral nun centro de saúde, do 15 de maio

A noticia reescrita que fixo estoupar o enésimo conflito na CRTVG

Ao igual que sucede coas mobilizacións da sanidade, dende hai anos vimos facendo un seguimento puntual das reivindicacións do persoal da CRTVG e varias destas informacións aparecen entre as cen máis lidas do ano en Praza.gal. A primeira é esta, do 11 de agosto: A noticia reescrita que fixo estoupar o enésimo conflito na CRTVG, na que relatabamos o caso dun traballador que se negou a modificar unha nova, como lle indicaran os seus superiores, apelando á cláusula de conciencia, e foi posteriormente castigado cun traslado a outro espazo.

Entre as máis lidas tamén figura a nova da cancelación da emisión de Luar por mor dunha folga na CRTVG, a primeira vez que isto sucedía en 32 anos.

Fin a 36 anos dos Baltar na Deputación de Ourense

2023 foi un ano electoral, con comicios municipais e xerais e algúns cambios importantes, entre eles a despedida de José Manuel Baltar da Presidencia da Deputación de Ourense, en xuño, poñendo fin a 36 anos de goberno da familia Baltar (pai e fillo) no ente provincial 

Miles de enfermeiras tinguen de negro as oposicións en protesta polas súas condicións laborais

Dentro das mobilizacións sanitarias, emprestamos atención destacada ás do persoal eventual de Enfermaría, moi visible o 25 de xuño nas multitudinarias oposición celebradas en Silleda, que volveron tinguir de negro 

Preguntas e respostas sobre os 16 voos en avión privado detectados entre A Coruña e Santiago en 2022

Máis conxuntural foi esta información que publicamos en marzo analizando os voos en jets privados que no ano anterior se realizaran entre os aeroportos de Alvedro e Lavacolla, froito dunha denuncia presentada por Greenpeace: Preguntas e respostas sobre os 16 voos en avión privado detectados entre A Coruña e Santiago en 2022 

6º da ESO e primeiro de nada

Entre os artigos de opinión máis lidos estivo este de Rebeca Baceiredo, 6º da ESO e primeiro de nada, publicado o pasado 10 de novembro e no que a autora reflexionaba sobre a aprendizaxe o alumnado na actualidade 

Un xulgado abre dilixencias por prevaricación contra o director de Mobilidade da Xunta pola súa xestión dos autobuses

O pasado 6 de abril publicamos que un xulgado abrira dilixencias por prevaricación contra o director de Mobilidade da Xunta pola súa xestión dos autobuses. Nos meses seguintes outras novas que deron seguimento a este tema tamén apareceron entre as máis lidas

Por exemplo, cando en outubro publicamos que O Supremo fai firme que Monbus e Alsa se repartiron o mercado ilegalmente e avala que sexan sancionadas

As mulleres usan e transmiten menos o galego que os homes polos "prexuízos" que identifican o castelán como lingua de maior prestixio

Publicamos un gran número de informacións relacionadas coa lingua galega. Entre as máis lidas figura esta análise realizada polo Consello da Cultura Galega, que nun informe destacou en novembro que As mulleres usan e transmiten menos o galego que os homes polos "prexuízos" que identifican o castelán como lingua de maior prestixio. Entre as máis lidas do ano 2023 aparece tamén estoutra, publicada aínda nos últimos días do ano 2022: O Censo sitúa por vez primeira o castelán como a lingua usada con máis frecuencia en Galicia 

"Vivimos un momento histórico por cantidade e calidade. O galego está a se converter na lingua de prestixio na música do país"

O 1 de decembro publicouse a entrevista a Noel Feáns, que en só unhas semanas se converteu nunha das pezas máis lidas do ano: "Vivimos un momento histórico por cantidade e calidade. O galego está a se converter na lingua de prestixio na música do país"

Esta fin de semana remataría a peaxe da AP-9 se Aznar non a prorrogase ata 2048

Adoitamos facer un seguimento detallado das concesións de autoestradas en Galicia, en especial da xestión da AP-9, clave nas comunicacións internas do país. Este ano, en agosto, lembramos que -de non ter sido prorrogada por Aznar no ano 2000- tería rematado xa a concesión privada desta vía de alta capacidade

O misterioso ocaso da gaivota nas costas galegas

Entre as reportaxes máis lidas neste ano atopamos a do misterioso ocaso da gaivota nas costas galegas, que no verán alertou sobre a rápida diminución dos exemplares desta especie nos últimos anos.

Os barrios ricos e envellecidos votaron PP e VOX, os pobres e novos a PSdeG, BNG e a Jácome

Neste ano electoral publicamos un gran número de análises de datos ao redor dos comicios locais e xerais. A peza máis lida foi esta, do 4 de xuño, na que afondamos no voto por barrios nas cidades galegas nas eleccións municipais: Os barrios ricos e envellecidos votaron PP e VOX, os pobres e novos a PSdeG, BNG e a Jácome

"Temos que reivindicar o dereito a estar continuamente repasando e revisando as nosas ideas"

Entre as entrevistas máis lidas do ano está a que lle fixemos a Xosé Luís Méndez Ferrín, publicada o pasado 16 de abril: "Temos que reivindicar o dereito a estar continuamente repasando e revisando as nosas ideas"

Unha ducia de curiosidades ao redor da 'Carta Xeométrica' de Fontán

E, por último, rematamos coa ducia máis lida do ano, que foi a dedicada á 'Carta Xeométrica' de Domingo Fontán o pasado mes de outubro, coincidindo co aniversario do seu pasamento.