A CRTVG lanza AGalega, a súa nova plataforma dixital de contidos audiovisuais cuns 1.400 títulos de acceso libre tanto vía web como mediante aplicacións de Android e Apple, xa dispoñibles para a súa descarga, e a partir do mes vindeiro tamén nas principais marcas de televisores intelixentes. O lanzamento inclúe tamén a plataforma Xabarín, con contidos infantís igualmente en formato web e aplicación
18F | O PSdeG lamenta que o PP mude o "sentidiño" polo "mediño" ante os debates electorais. "Foi José Ramón Gómez Besteiro o primeiro en lanzar unha proposta sobre debates que aínda hoxe non foi respondida polo PP", subliña o secretario de organización dos socialistas, José Manuel Lage, quen agrega que Rueda "segue agochándose con subterfuxios mentres Besteiro confirmou a súa presenza nos tres debates propostos ata a data", os da CRTVG, RTVE e a Cadena SER.
18F | Feijóo reitera a petición do PP para que Vox non se presente ás eleccións galegas. Nunha entrevista en EsRadio, o ex-presidente e actual líder dos populares mantén que poden "prexudicar a maioría do PP" e incrementar o risco dun Goberno da esquerda encabezado polo BNG. A formación de extrema dereita rexistrou candidaturas nas catro circunscricións, tal e como figura no DOG deste mércores. Na imaxe [© PP], Feijóo con Santiago Abascal o pasado setembro, na rolda de contactos previa á súa investidura falida.
O Tribunal Constitucional conclúe que o ex-deputado de Podemos Alberto Rodríguez non debeu ser privado do seu escano no Congreso. O tribunal establece que o político canario non podía ser condenado a 45 días de cadea senón só a pagar unha multa, polo que non lle sería de aplicación a inhabilitación polo mesmo tempo de prisión e non tería que deixar o seu escano.
O Diario Oficial de Galicia publica as candidaturas presentadas para o 18F, con 12 formacións repartidas en 10 listas nas provincias da Coruña e Pontevedra e 11 nas de Lugo e Ourense. As listas poden agora recibir alegacións antes de que sexan feitas oficiais. Aquí podes ler as informacións que xa publicamos coas listas dos principais partidos:
O novo reitor da Universidade da Coruña, Ricardo Cao, toma posesión do cargo nun acto acompañado polo anterior responsable, Julio Abalde, e mais o presidente da Xunta, a alcaldesa da Coruña e o conselleiro de Cultura, entre outras autoridades. Os reitores das universidades públicas de Vigo e Santiago, Manuel Reigosa e Antonio López, tamén participaron do acto no Paraninfo da Reitoría. "Toda a comunidade universitaria ten que ser escoitada", dixo Cao no seu discurso, "mais tamén ten que poñerse mans á obra para facer da UDC a mellor universidade posible", engadiu. [Fotografía CC-BY-SA David Cabezón/Xunta]
HEMEROTECA | Ricardo Cao, elixido novo reitor da UDC co 65% dos votos
O actor Viggo Mortensen súmase á campaña Aquí tamén se fala que, coordinada dende o IES Rafael Dieste da Coruña, xa se espalla por todo o país co alumnado deste centro como principal impulsor. O intérprete subliña que as linguas son "un tesouro dos pobos" e "por iso tamén falo galego". Pódese ver o vídeo na conta de Instagram da campaña.
18F | Feijóo teima en virar as eleccións galegas nun plebiscito sobre o Goberno de Pedro Sánchez. "Os galegos van ser o primeiro pobo en España de manifestarse sobre se o que acontece en España lles gusta ou non", mantivo durante un almorzo informativo en Madrid no que equiparou o financiamento autonómico coa "declaración da renda" para concluír que "aos galegos lles sae a devolver" grazas á súa xestión da débeda, que contrapuxo coa de Catalunya. [Imaxe: © PP]
O Goberno do PP de Rajoy investigou á marxe da lei a partidos independentistas cataláns e outros rivais políticos como o galego José Blanco, na altura secretario de organización do PSOE e potencial aspirante a liderar o PSdeG. Segundo unha investigación que veñen de comezar a publicar elDiario.es e La Vanguardia, a cúpula policial da época informaba periodicamente o Executivo destas operacións a través do daquela ministro do Interior, Jorge Fernández Díaz -na imaxe, da Xunta, con Feijóo e Rueda nunha visita á unidade policial adscrita á Xunta en 2013-.
O Consello da Xunta, reunido de xeito extraordinario ao límite do prazo legal, cesa sete altos cargos para que poidan ir nas listas electorais do PP. Ser candidato ou candidata é compatible con ser conselleiro ou conselleira pero non cos cargos inferiores, o que fai que agora, a poucas horas do remate do prazo para que os partidos formalicen as súas listas, saian da Xunta os delegados territoriais da Coruña, Ferrol, Lugo e Ourense así como o secretario xeral de Emigración, Antonio Rodríguez Miranda, o director xeral de Gandaría e Agricultura, José Balseiros, e o director de Turismo de Galicia, Xosé Manuel Merelles.
