Ao mediodía comezan a maior parte das manifestacións convocadas polas principais centrais sindicais nas cidades e vilas galegas. A marcha da CIG en Vigo partirá ás 12 da Dobrada. Ás 11.30 iniciarase a mobilización de CCOO e UGT na cidade olívica dende o cruzamento da Vía Norte con Urzáiz. Ás 12 comezarán as marchas na Coruña, a da CIG dende a Praza de Vigo e a de CCOO e UGT dende a Praza da Palloza.
O Celta de baloncesto ascende á máxima categoría e xogará na Liga Femenina Endesa na temporada 2023-24. As xogadoras celestes vencen o Nou Bàsquet Paterna no pavillón de Navia (Vigo) e conseguen regresar, máis dunha década despois, á máis alta competición. [Fotografía © Celta Zorka Recalvi]
O Burela gaña a Copa da Raíña por sexta vez. As xogadoras do club de fútbol sala Pescados Rubén Burela FS venceron o Club Roldán FSF con 3 goles a 2. Este é o quinto ano consecutivo que se fan co título.
PSdeG e BNG manterían todos os gobernos nas cidades e o PP gobernaría Ferrol despois das eleccións do 28M, segundo a enquisa de Sondaxe que publica este domingo La Voz de Galicia.
Comeza a Feira do Libro de Santiago de Compostela co pregón do poeta Ismael Ramos. A feira, organizada pola Federación de Librarías de Galicia, reúne a once librarías na Alameda ata o vindeiro domingo 7 de maio, con preto dun centenar de autoras e autores e máis de 50 citas culturais. A programación completa pode consultarse aquí.
O presidente da Deputación de Ourense e do PP de Ourense, José Manuel Baltar, acudirá a declarar o 9 de maio ao xulgado da Pobra de Seabra (Zamora) despois de que a Garda Civil o interceptase o pasado domingo conducindo a 215 quilómetros por hora pola autovía A-52 nun coche oficial, segundo confirma Europa Press.
A Asociación Española de Críticos Literarios galardoa a Yolanda Castaño e Brais Lamela cos premios estatais da Crítica 2022, que se entregan para obras de poesía e narrativa nas catro linguas cooficiais do Estado. O xurado destacou da novela Niguén queda (Euseino) de Brais Lamela a súa capacidade para formular interrogantes existencias e do poemario Materia (Xerais) de Yolanda Castaño a súa forza evocativa e sensorial no marco dunha visión feminina e feminista da identidade.
A Sareb ratifica que dispón de 1.285 vivendas en Galicia "que poden incorporarse ao parque público de alugueiro" se as "adquiren" as Administracións. Sitúa 896 na provincia da Coruña, 249 na de Pontevedra, 108 en Lugo e 32 en Ourense. Nun comunicado, o banco malo evidencia que Galicia é "unha das zonas con máis oferta" porque se trata de vivendas procedentes do rescate das caixas. No caso galego, dos 5.000 millóns de euros de ladrillo tóxico absorbidos no rescate de Novagalicia Banco en 2012. [Mapa: © Sareb]
Hiperxel, en concurso de acredores polo seu estado de "insolvencia". O xulgado do Mercantil número 3 de Pontevedra vén de declarar o concurso voluntario de acredores a Xeldist Congelados, matriz de HIperxel, intervida desde agora na súa administración.
Baltar négase a dimitir e reitera que conduciu a 215 por hora nun coche da Deputación por "despiste" nunha viaxe a Madrid para manter dous encontros oficiais. A preguntas do PSdeG no pleno da Deputación de Ourense, o popular tamén nega que el conducise o coche oficial da institución que foi multado en setembro de 2021 na N-120 por conducir a 157 km/h nun treito limitado a 90; alega que un informe do xefe do parque móbil indica que non hai "datos fidedignos" para "afirmar con certeza quen conducía".
