Fálase

España enviará a Chipre a fragata Cristóbal Colón, con base en Ferrol, ante os ataques de Irán. A embarcación chegará o 10 de marzo á illa do Mediterráneo xunto ao portaavións francés Charles de Gaulle e outros navíos da Armada grega. A misión do buque español será ofrecer "protección e defensa aérea" e estar listo para calquera posible evacuación de persoal civil. Foto: © Ministerio de Defensa. 

• ENTREVISTA | Susana Mangana: "Europa teme enfrontarse a Trump pero non quere acompañar unha guerra que considera ilexítima"
• Os ataques de Trump a España pola guerra de Irán afondan na división política da UE
• "A posición do Goberno resúmese en 'Non á guerra'", di Sánchez, que se contrapón co "trío dos Azores"

O novo disco de The Rapants xa está dispoñible. Rapants Club é o cuarto LP da banda e xa se pode escoitar nas principais plataformas dixitais. "Variedade estilística, guitarras frenéticas, sintetizadores e retrousos pegadizos desde a primeira escoita", define o grupo. 

• 🟪🟧🟦 EN VINTE | 📺 Vinte almorzando con The Rapants
• ENTREVISTA | "O que buscamos é afrontar todo o que poida xurdir no noso día a día evadíndonos das malas vibras a través da música"

Unha masa de aire africano reduce a calidade do aire en varios puntos de Galicia, segundo advirte Meteogalicia, que aclara que esta situación manterase ata o mediodía deste xoves e "pode aumentar o nivel de partículas en superficie". A calixe afecta, especialmente, a Santiago, Vigo e zonas do sur da provincia de Lugo e do norte da de Ourense. Foto: Copernicus. 

Paula Prado descualifica a BNG e PSdeG como "estercoleiro moral cheo de corruptos, puteiros e acosadores sexuais". A secretaria xeral do PPdeG afirmouno durante un acto en Monforte no que esixiu a ambas formacións que reclamen a dimisión de José Tomé como alcalde da vila e deputado provincial tras a querela que lle interpuxo a Fiscalía por presunto acoso sexual. Tanto socialistas como nacionalistas xa pediran ao ex-presidente da Deputación de Lugo que entregue as súas actas en ambas institucións antes de que o Ministerio Público o denunciase, se ben o rexedor monfortino se vén negando a facelo

• Querela da Fiscalía contra Tomé por acoso sexual e abuso na función pública
• HEMEROTECA | Doce máis un en Lugo
• HEMEROTECA | "Asustados"

O Celta envía unha carta a Madonna na procura da camiseta do equipo que luciu no seu concerto en Vigo en 1990. "Tela ti? Se sabes onde pode estar ou queres axudarnos, por favor, contacta por mensaxe privada", prégalle o club á artista. 

A Xunta convoca o sindicato O'Mega para intentar un acordo que poña fin á folga na atención primaria que provocou a suspensión de máis de 11.000 consultas en Galicia en dous días. A xuntanza celebrarase mañá xoves, no que será o cuarto día de paro, que este mércores tivo un seguimento do 6% segundo o Sergas na quenda de mañá. 

"Pedimos unha solución diplomática e política", salienta Pedro Sánchez nunha intervención dirixida á cidadanía para informar sobre a situación creada polos ataques dos EUA e Israel a Irán, na que alerta de que "ninguén sabe nunca como comezan as guerras mundiais". “A posición do Goberno resúmese en catro palabras: ‘Non á guerra” e lembra que "non estamos sós" na defensa da paz.

• AMPLIAMOS 👉 "A posición do Goberno resúmese en 'Non á guerra'", di Sánchez, que se contrapón co "trío dos Azores"

Morre o xornalista Fernando Onega. Nacido en Pol en 1947, foi subdirector do xornal Arriba, xefe de prensa do presidente Adolfo Suárez e director de informativos da SER e a COPE. Ademais, presentou os informativos de Telecinco e Antena 3.

Trump ameaza con "cortar todo o comercio con España" ante a falta de colaboración nos ataques iniciados polo seu país contra Irán. O presidente dos Estados Unidos, que cualifica o Estado español de "aliado terrible", realizou estas declaracións no marco dun encontro co primeiro ministro alemán Friedrich Merz na Casa Branca. Merz asegurou que está tentando convencer a España para que eleve o seu gasto militar. Trump tamén cargou contra a falta de colaboración do Reino Unido.

Trinta anos das eleccións que levaron o PP de Aznar ao Goberno de España. Tal día coma hoxe de 1996 os populares lograban ser primeira forza co 38,8% dos votos, apenas un punto máis que o PSOE de Felipe González, e 156 escanos que, mediante pactos coas forzas nacionalistas Convergència i Unió (16 escanos),  PNV (6) e Coalición Canaria (4), permitiron a investidura de Aznar, quen recuncaría no 2000 xa con maioría absoluta. Dos seus mandatos persisten herdanzas en Galicia como a prórroga da concesión da AP-9 ata 2048 e a súa posterior venda ou a privatización de Ence nun goberno que fichou como alto cargo a Alberto Núñez Feijóo, primeiro para dirixir o Insalud e despois, Correos ata que foi enviado de volta á Xunta como conselleiro para remudar o defenestrado Xosé Cuíña en plena catástrofe do Prestige, no treito final do aznarismo. Feijóo celebra o trixésimo aniversario daquelas eleccións atribuíndo a Aznar un "proxecto reformista que converteu España nunha potencia". Na imaxe, Aznar no seu primeiro día como presidente do Goberno de España, en maio de 1996 [© Pool Moncloa / José María Cuadrado]

• HEMEROTECA | AP-9: non penses en Aznar
• HEMEROTECA (2023) | Esta fin de semana remataría a peaxe da AP-9 se Aznar non a prorrogase ata 2048
• HEMEROTECA (2022) | "Galicia, máis que nunca" ou o principio da fin do fraguismo e do ascenso de Feijóo
• HEMEROTECA (2021) | De Ence á AP-9: os fíos que unen as privatizacións estrela de Aznar en Galicia e as súas concesións prorrogadas