Fálase

O pleno de Ourense volve pedir a dimisión de Jácome, nesta ocasión pola elección dun home condenado por abusos sexuais para interpretar un dos Reis Magos na cabalgata. O alcalde ourensán asegurou que descoñecía os antecedentes do home, que non era obrigatorio reclamarlle o certificado de antecedentes para ter contacto con menores e resolveu que, en todo caso, na cabalgata "non pasou nada". Desta volta a petición de dimisión parte dunha moción do PP, que entregou a en 2019 alcaldía ao líder de DO, con quen formou bipartito en dúas ocasións e cuxa permanencia no posto veu propiciando durante o mandato. A moción, que ten unicamente significado político e non implicacións xurídicas, saíu adiante con 22 votos a prol dos 27 cos que conta a corporación ourensá. Na imaxe, tirada da gravación do pleno, Jácome responde á moción.

• O PP pide a dimisión de Jácome na alcaldía de Ourense tras entregarlla e propiciar que seguise no posto

CRISE DE PREZOS | O dato xeral da inflación segue a moderarse e pechou decembro en Galicia no 6,4% interanual, o que supón 1,1 puntos menos que o mes anterior, pero tamén sete décimas máis que o dato medio estatal, que descende ata o 5,7%. Os prezos da enerxía son os principais responsables dunha moderación que non se rexistra nos prezos dos alimentos: a inflación nestes produtos chega ao 16,6% interanual en Galicia, 1,2 puntos máis que en novembro, e o dato estatal sitúase no 15,9%, un crecemento de dúas décimas. 

• AMPLIAMOS 👉 A inflación xeral segue a moderarse mentres continúa disparada nos alimentos cunha alza interanual de prezos do 16%
• A crise de prezos obriga as familias galegas a recortar gastos básicos ante a dificultade para chegar a fin de mes
• O Estado suprime seis meses o IVE da alimentación básica e lanza un cheque de 200 euros para as rendas máis baixas

Detido un veciño da Mirandela (A Pobra do Caramiñal) acusado de prenderlle lume á súa casa mentres estaba no interior a súa parella, unha muller con discapacidade. Os feitos están a ser investigados como caso de violencia machista. O 112 confirma que os equipos de emerxencias desprazados ao lugar ratificaron que o incendio foi intencionado: "Observaron a manipulación de bombonas e o uso de material incendiario como o detonante dun lume con consecuencias en toda a vivenda". A muller, de 73 anos e encamada por mor da súa discapacidade, tivo que ser trasladada ao hospital da Barbanza a causa da inhalación do fume. Na imaxe, unha mobilización contra a violencia de xénero [CC-BY-NC-SA Galiza Contrainfo]

• HEMEROTECA | Alerta para toda a sociedade tras unha decena de asasinatos machistas no Estado este mes
• HEMEROTECA | Novo máximo de denuncias por violencia machista mentres a nova lei dispara os vetos das visitas de maltratadores aos fillos

O Tribunal Supremo votará o 7 de febreiro se mantén ou anula as sentenzas que declararon ilegal a prórroga para que Ence permaneza na ría de Pontevedra ata 2073, concedida en 2016 polo Goberno do PP de Mariano Rajoy en funcións. A pasteira vén de comunicar á Comisión Nacional do Mercado de Valores (CNMV) que, en senllas providencias ditadas este martes e mércores, o TS confirma que será ese día cando ditamine sobre os recursos interpostos contras as sentenzas da Audiencia Nacional que deron a razón ao Concello de Pontevedra e a Greenpeace. Inicialmente, a votación íase celebrar en outubro do ano pasado, pero o Tribunal adiouna.

• HEMEROTECA | A Audiencia Nacional ratifica noutra sentenza a anulación da prórroga de Rajoy a Ence á espera do ditame definitivo do Supremo
• HEMEROTECA | Ence comeza a achegarse ás Pontes antes de saber se terá que marchar de Pontevedra

O coruñés Cándido Conde-Pumpido, novo presidente do Tribunal Constitucional. Tras o desbloqueo da súa renovación a finais de 2022, na corte de garantías hai agora maioría do sector considerado progresista, no que se encadra o propio Conde-Pumpido, quen foi Fiscal Xeral do Estado durante os gobernos de Zapatero (2004-11) e maxistrado do Tribunal Supremo. A vicepresidencia recae en Inmaculada Montalbán, do mesmo sector. [Imaxe: © TC]

• HEMEROTECA | O Constitucional comezará 2023 renovado e con maioría progresista malia ao intento de bloqueo do PP
• HEMEROTECA | 50 anos do cambio de tranvías por buses en Vigo cun suborno e con Rajoy e Conde-Pumpido como xuíz e fiscal

A Xunta certifica que a súa sede electrónica non funcionou durante unha hora e 12 minutos na mañá deste luns, coincidindo coa presentación masiva de solicitudes de axudas para persoas autónomas. A Axencia para a Modernización Tecnolóxica de Galicia (Amtega) di que entre as 10:18 e as 11.30 horas houbo “unha incidencia técnica non planificada que provocou unha indispoñibilidade xeral” na sede electrónica que afectou a todo tipo de trámites.

• Novo colapso da sede electrónica da Xunta ante as axudas a autónomos que entregará por orde de solicitude

Un xulgado de Pontevedra declara abusivo que Orange inclúa en ficheiros de morosos a ex-clientes aos que reclama débedas tras dárense de baixa, "independentemente do motivo da oposición ao pago" e mesmo "aos que prestaba servizos de maneira defectuosa". A condena resulta de acoller parcialmente unha demanda da Fiscalía e implica "cesar de inmediato nas prácticas" e 60.000 euros de multa "por cada reiteración". Contra o ditame cabe recurso ante a Audiencia Provincial. [Imaxe: © Orange]

Seguidores do ex-presidente brasileiro Jair Bolsonaro invaden a sede do Congreso do Brasil coa intención de derrocar o presidente Lula da Silva, que celebrou este venres a primeira reunión cos ministros do seu Executivo [na imaxe © Ricardo Stuckert]. Os partidarios de Bolsonaro superaron as barreiras policiais coa súa manifestación e diríxense tamén ao palacio presidencial, reclamando unha intervención militar do país. 

• AMPLIAMOS 👉 Lula frea o asalto bolsonarista aos poderes do Brasil: "Todos eles pagarão com a força da lei"
• HEMEROTECA | Lula vence e proponse "acabar outra vez com a fome" e protexer a democracia do Brasil 
• ENTREVISTA | Wesley Guerra: "Gañe Lula ou non, haberá que ver como é o ambiente despois das eleccións, iso definirá os próximos catro anos no Brasil"

Tres asasinatos machistas na fin de semana. A delegación do Goberno contra a Violencia de Xénero avisa que dous dos casos están a ser estudados para incluír as vítimas nas estatísticas oficiais de feminicidios, son dous asasinatos cometidos en Cádiz e Ciudad Real. Pero ademais un home confesou o asasinato dunha muller en Roquetas de Mar (Almería). O ano 2023 comeza coa alerta decretada polo Goberno do Estado tras a decena de feminicidios de decembro de 2022, un ano no que os datos oficiais cuantifican 49 mulleres asasinadas polo feito de seren mulleres. 

• Alerta para toda a sociedade tras unha decena de asasinatos machistas no Estado este mes
• Novo máximo de denuncias por violencia machista mentres a nova lei dispara os vetos das visitas de maltratadores aos fillos

O derbi do baloncesto galego na liga ACB remata con 64 puntos para o Breogán, gañador do partido no Pazo dos Deportes de Lugo, fronte aos 59 puntos do Obradoiro.