Fálase

O Consello de Ministros aproba a reforma das pensións, que de 2027 a 2043 implicará calcular a xubilación a cos últimos 25 anos cotizados ou cos 27 máis favorables dos últimos 29, modelo que será o único dende 2047. A reforma, pactada entre os socios do Goberno do PSOE e UP coa Comisión Europea e cos sindicatos CC.OO. e UGT, é aprobada vía Real Decreto e emprende agora camiño ao Congreso para ser convalidada. Na imaxe, o ministro da Seguridade Social, José Luis Escrivá, e a ministra voceira, Isabel Rodríguez, tras o Consello extraordinario que aprobou a reforma [© Pool Moncloa/Borja Puig de la Bellacasa]

• A reforma das pensións que vén: cálculo de 25 ou 29 anos, suba das máis baixas e "cota de solidariedade" a soldos altos

Os murais de Lugrís situados nun baixo da Rúa Olmos da Coruña están "en mal estado de conservación, mais son recuperables", sinala o Concello, que lle reclama aos propietarios do inmoble que "actúen de xeito inmediato" para asegurar a súa protección debido á "deterioración que sofren e as condicións nas que se atopan". Técnicos municipais vivistaron hai un mes o baixo e elaboraron un informe.

• A Xunta ten seis meses para responder á petición de declarar BIC os murais de Lugrís ameazados de desaparición

O Banco Central Europeo decide aumentar os tipos de xuro en 50 puntos básicos, como esperaban os mercados, a pesar da convulsión provocada nos últimos días polo colapso de Credit Suisse e a caída do Silicon Valley Bank. O prezo do diñeiro sitúase no 3,5%. Con todo, a diferenza de anteriores intervencións, o BCE non anuncia novas subas de forma inmediata.

• Pánico na banca: o colapso de Credit Suisse crea alarma global sobre a saúde do sistema financeiro

Unha concentración de apoio ao persoal da CRTVG pide a "fin da manipulación e da represión" nos medios públicos galegos. Ante a sede da Xunta en San Caetano, a plataforma Por unha CRTVG ao servizo do pobo únese ás protestas dos profesionais nunha mobilización na que estiveron presentes representantes de BNG e PSdeG. 

🔊Fálase | Se Gary Lineker saíse na TVG

Este venres abre o prazo de solicitude de praza nas escolas infantís da Xunta. No DOG deste xoves publícanse os procedementos para os centros dependentes tanto da Axencia Galega de Servizos Sociais como do Consorcio no que tamén participan os concellos.

• HEMEROTECA | Escolas infantís de balde para menos crianzas ca nunca

O comité intercentros da CRTVG denuncia a "grave vulneración do dereito fundamental á liberdade de expresión" dunha xornalista da TVG que foi trasladada esta semana á Radio Galega "sen ningunha xustificación". Mayte Cabezas, presentadora do programa Vivir Aquí da televisión pública, que foi "suprimido" da programación, recibiu o luns a comunicación desta "mudanza forzosa" do seu posto de traballo "que se produce após ter publicado nas súas redes sociais unha crítica persoal sobre o trato dispensado ás vítimas do terrorismo por Núñez Feijóo durante o seu mandato como presidente da Xunta". 

Desde o comité consideran "da maior gravidade" que a dirección do ente público "reitere gravísimas condutas de vulneración de dereitos fundamentais de traballadoras e traballadores que non son afíns aos intereses do Partido Popular". Os representantes do persoal da Corporación esixen "o cesamento inmediato do cadro directivo da CRTVG, comezando polo director xeral, Alfonso Sánchez Izquierdo". [Na imaxe, a sede da Radio Galega en San Marcos © CRTVG]

• 🔊PODCAST | Fálase - Se Gary Lineker saíse na TVG
• Á CRTVG non lle "preocupa" a folga nin vai "mudar o rumbo" mentres o persoal convoca dous novos paros
• A CRTVG prohibe a celebración de asembleas do persoal nas súas instalacións dous días despois da folga
• O comité da CRTVG denuncia que a dirección impediu informar de que a inflación supera en Galicia a media estatal

O Sergas incorpora no seu calendario a vacina fronte ao virus respiratorio sincitial, que comezará a aplicarse a nenos e nenas a partir de outono. O presidente Rueda anunciouno tras o Consello da Xunta deste xoves “para evitar o 80% das asistencias médicas e hospitalizacións por bronquiolite ou pneumonía” provocadas por ese virus. Posteriormente a Xunta emitiu unha nota de prensa en inglés gabando que o sistema sanitario galego é o “primeiro no mundo” que a asume.

• HEMEROTECA | "O virus respiratorio sincitial é o inimigo número un dos lactantes": un estudo con participación galega analiza a afectación nos bebés

O Arde Lucus, declarado Festa de Interese Turístico Internacional. O Concello de Lugo vén de recibir a confirmación oficial da distinción para esta festa de recreación histórica, con dúas décadas de traxectoria e que celebrará a súa vindeira edición do 22 ao 25 de xuño. A alcaldesa de Lugo, Lara Méndez, comparece esta tarde ante a prensa para valorar a declaración. 

• AMPLIAMOS 👉 O Arde Lucus xa é Festa de Interese Turístico Internacional: "Exporta a imaxe máis positiva de Lugo"

Decae no Congreso a reforma da lei mordaza ao ser rexeitado en comisión o texto pactado polo PSOE, Unidas Podemos e PNV por 18 votos fronte a 19. ERC e EH-Bildu consideran "insuficientes" os cambios introducidos en aspectos como as devolucións en quente de persoas migrantes ou a regulación do material antidisturbios. Deste xeito, a controvertida lei de seguridade aprobada en solitario polo PP de Rajoy en 2015 continúa vixente sen cambios. Na imaxe, antidisturbios nunha manifestación ante o Parlamento en 2014 [CC BY-SA Praza.gal]

• HEMEROTECA | Arquivada unha sanción "grave" imposta ao abeiro da lei mordaza por tratar de "ti" a un policía
• HEMEROTECA | Un policía multa un home coa 'lei mordaza' na Coruña porque os seus fillos de 2 e 4 anos xogaban na oficina do DNI
• HEMEROTECA (2015) | Entra en vigor a 'Lei Mordaza'. Que cambia nas nosas vidas?

O Colexio Profesional de Xornalistas amosa a súa "inquedanza e preocupación" polo clima laboral na CRTVG e di que o director xeral negoulle explicacións polos "traslados forzosos" de persoal. Nun comunicado, a representación legal do periodismo galego pide á Corporación "reabra con urxencia as canles de diálogo co cadro de persoal para recuperar un clima laboral saudable".