Fálase

Goretti Sanmartín e María Rozas asinan o pacto entre BNG e Compostela Aberta para gobernaren en coalición a capital galega dende mañá coa nacionalista como nova alcaldesa. Bloque e CA suman 8 edís da nova corporación (6+2) e a investidura contará co voto a prol do PSdeG (6 edís), que decidiu non entrar no Goberno. Rozas ostentará a Tenencia da Alcaldía no novo goberno, do que se coñecerán as áreas a vindeira semana. Da banda dereita, o PP conta con 11 edís e o seu cabeza de lista, Borja Verea, reclama ser o novo alcalde. [Imaxe: CC BY-NC-SA BNG]

• O BNG adianta o PSdeG en Santiago e Goretti Sanmartín pode ser a primeira alcaldesa da cidade

Jácome considera unha "excelente noticia" a retirada de Baltar e admite "reunións a alto nivel" con PP e PSdeG nos últimos días, se ben evita revelar as súas "cartas" en plena "partida de póker" sobre un eventual cambio de goberno na Deputación de Ourense. En resposta aos medios durante a presentación do programa das festas da cidade, o alcalde de Ourense en funcións e candidato á reelección atribúe a retirada de Baltar á perda da maioría absoluta na institución provincial polo medre de Democracia Ourensana: "Se non obtivésemos tres deputados, non daría un paso atrás", indica nun contexto no que un recurso en Celanova pode adiar a constitución da nova corporación provincial ata a contorna do 20 de xullo.

• A dinastía Baltar declina e inxecta na dereita galega doses de incerteza descoñecidas dende Fraga
• Baltar tamén deixará a presidencia do PP de Ourense en cuestión de meses
• Todas as opcións de Ourense: de Jácome no Concello á posible fin do baltarismo

Masivas mobilizacións na primeira xornada da folga de tres días no sector do metal na provincia de Pontevedra. As centrais sindicais CIG, CCOO e UGT trasladan que se paralizou totalmente o sector e quedaron sen actividade os estaleiros das rías de Vigo e Pontevedra. Instan a patronal a "tomar nota", abandonar as súas propostas "insultantes" e negociar un convenio colectivo que contemple unhas condicións laborais dignas. [Na imaxe, a manifestación deste xoves en Vigo CC-BY-SA CIG]

En marcha a nova estrutura do Goberno galego coas tomas de posesión do novo conselleiro do Mar e da nova conselleira de Fomento do Emprego, Alfonso Villares e Elena Rivo, e as asuncións de cargos por parte dos membros do gabinete que mudan de competencias: Diego Calvo é xa vicepresidente primeiro, Ángeles Vázquez vicepresidenta segunda e María Jesús Lorenzana, conselleira de Economía. Segundo o presidente, Alfonso Rueda, esta crise de goberno supón as "primeiras liñas" dun cambio de Goberno en España. Na imaxe [CC BY-SA David Cabezón / Xunta], Rueda despídese de Francisco Conde, ata agora vicepresidente primeiro e titular de Economía, que deixa o Goberno galego para ser cabeza de lista do PP ao Congreso por Lugo. 

• Feijóo desmantela a Xunta e descabeza o PP no Parlamento
• A crise de goberno provocada por Feijóo fai ascender a Diego Calvo e Ángeles Vázquez na Xunta de Rueda

Lara Méndez e Rubén Arroxo asinan o pacto de goberno de PSdeG e BNG no Concello de Lugo para o novo mandato con "cen obxectivos para o crecemento sostible e económico da cidade". Ambos continuarán como alcaldesa e o tenente da Alcaldía nun goberno que, avanzan, manterán un reparto de áreas semellante ao actual, con Economía, Persoal, Urbanismo, Desenvolvemento Local, Medio Ambiente e Medio Rural, Xuventude e Deportes, Servizos Sociais e Muller e Igualdade xestionados polo PSdeG e Mobilidade e Infraestruturas, Cultura e Turismo, Participación Cidadá e Educación, polo BNG.

• ENTREVISTA | Lara Méndez: "A veciñanza de Lugo primou un goberno progresista e de boas prácticas fronte á mala praxe e a crispación"
• PSdeG e BNG revalidan o goberno de Lugo malia ao ascenso do PP

A selección galega fai historia e xogará o sábado a final da Copa das Rexións da UEFA por primeira vez. O equipo galego amateur impúxose onte a Baviera (1-0) atne máis de 3.000 persoas e loitará o sábado no estadio da Lomba polo título contra Belgrado (19h). 

• Galicia busca facer historia na Copa das Rexións mentres negocia o regreso da selección sete anos despois

Luís Pérez Barral, do BNG, será o novo alcalde de Ribeira tras pechar un pacto co Partido Barbanza Independiente e o PSdeG que porá fin a máis de tres décadas de alcaldía do PP. Os populares tentaron evitar o acordo enviando ao Senado ao ata agora alcalde, Manuel Ruiz Rivas, para tentar que o PBBI lles permitise reter o goberno con outra persoa á fronte. Máis información, hoxe en Praza.gal

• AMPLIAMOS 👉 O BNG encabezará unha histórica mudanza de goberno en Ribeira tras un inédito pacto a tres
• A maioría das alcaldías da Galicia máis poboada, despexadas para a esquerda mentres Ourense e Ribeira ferven

O presidente do Parlamento anima a "tomar conciencia do potencial da nosa condición de comunidade bilingüe e actuar en consecuencia en todos os ámbitos". Miguel Ángel Santalices inaugurou este mércores a mostra A forza da palabra. Lei de Normalización Lingüística de Galicia (1983-2023), organizada pola Xunta na biblioteca do Pazo do Hórreo para conmemorar os vinte anos da norma, e salientou que "non é unha lei máis", senón que pertence ás "leis fundacionais da autonomía galega". "Poucas causas son máis nobres e máis fermosas cá defensa dunha lingua", sinalou parafraseando a Carlos Casares.

O BNG non formará parte do goberno local da Coruña. PSdeG e Bloque acordan a investidura de Inés Rey pero que o goberno sexa "en minoría socialista", segundo asegurou ao termo da reunión entre as dúas formacións o concelleiro José Manuel Lage Tuñas. Máis información, hoxe en Praza.gal. 

A conselleira lucense de Ayuso, número dous de Feijóo para as eleccións xerais. Marta Rivera de la Cruz, antiga integrante de Ciudadanos, partido co que foi deputada pola Coruña, e ex-conselleira de Cultura do goberno madrileño, ocupará o segundo posto da candidatura do PP en Madrid por tras do ex-presidente da Xunta. Rivera de la Cruz, que se significou en numerosas ocasións polas súas posturas contrarias ás medidas de normalización da lingua galega, foi escollida pola Xunta en 2013 para protagonizar un acto institucional centrado en Rosalía de Castro. Na imaxe, Marta Rivera (á esquerda), nun mitin de Ciudadanos en Vigo en 2016.

• AMPLIAMOS 👉 Feijóo mete nas listas os seus asesores e leva de 2 por Madrid a lucense Rivera de la Cruz, ex de Ciudadanos
• HEMEROTECA | Ciudadanos e o seu plan estrela para Galicia: Convertela en plató de 'Xogo de tronos'