O Sergas convoca máis de 33.000 nenos e nenas para vacinarse contra a gripe os vindeiros venres e o sábado en 14 hospitais. A rapazada de entre seis meses e 11 anos está citada de maneira extraordinaria o venres pola tarde nos hospitais comarcais e o mesmo día e mais o sábado nos grandes complexos hospitalarios.
Traballadoras de axuda no fogar, residencias e centros de día péchanse nos Concellos de Santiago, Vigo e Lugo en demanda de "condicións dignas", no marco dunha campaña da CIG para "forzar a negociación dos convenios". A Coruña, Ferrol e Pontevedra acollerán tamén mobilizacións á tarde por parte dun persoal que leva meses protestando pola súa precariedade.
Desfeita, foliada, loia, lume, retrinco e xenocidio, candidatas a ser a Palabra do Ano 2025, na iniciativa impulsada pola Real Academia Galega e a Fundación Barrié a través do Portal das Palabras. A elixida será a que máis votos reciba a través da web ata a medianoite do domingo 21.
"Quen vos pagou o bus? Déronvos bocadillo? Tedes caixa de resistencia?", chancea o BNG no Parlamento cos populares pola súa manifestación en Madrid. O deputado nacionalista Óscar Insua dá a volta ás críticas do PPdeG a BNG e CIG por manifestarse en Galicia.
As estatuas do Mestre Mateo xa están en Santiago máis de 70 anos despois. As figuras de Abraham e Isaac foron trasladadas este luns desde o Pazo de Meirás á capital galega nun acto que "representa a loita de todo o pobo galego", segundo a alcaldesa Goretti Sanmartín. "É un día histórico", dixo. As pezas estarán expostas no Museo do Pobo Galego desde o 11 de decembro.
A CIG denuncia un novo accidente laboral nas obras do AVE en Ourense que deixa un traballador ferido. O envorcado do camión feriu o seu condutor, que foi trasladado en ambulancia ao hospital de Ourense. A CIG denuncia "falta de seguridade e exceso de xornada" e lembra que neste tramo do AVE houbo tres accidentados en quince días, un deles falecido.
SOS Sanidade Pública convoca unha nova manifestación o vindeiro xoves en Vigo para exixir a "reconstrución" da área sanitaria. Varias plataformas anunciaron a súa adhesión a unha marcha que pretenden denunciar a "deterioración" constante da sanidade pública galega.
A Xunta convoca 803 prazas de acceso libre na administración xeral na oferta pública de emprego deste ano. A OPE 2025 do Goberno galego na administración xeral é dun total de 1.103 prazas, con 300 de promoción interna e 803 de libre acceso. Destas 160 serán para persoal de limpeza e cociña, 138 de loita contra incendios, 130 para corpos administrativos, 108 para persoal coidador de escolares con necesidades especiais, 60 para persoal subalterno ou 50 para técnicos de xestión ambiental.
"Como redactar boas normas con claridade", novo curso da Xunta para o seu funcionariado. A Escola Galega de Administración Pública (EGAP) convoca un curso "para que este labor normativo se desenvolva de forma óptima".
Feijóo volve esixir a dimisión de Pedro Sánchez e a convocatoria de eleccións xerais na sétima manifestación contra o Goberno de España organizada pola dirección estatal do PP nos últimos dous anos, desta volta baixo o lema Efectivamente, mafia o democracia. Tras o encarceramento do ex-ministro Ábalos, o anterior presidente da Xunta concluíu que "o sanchismo está no cárcere e ten que saír do Goberno" despois de que a presidenta da Comunidad de Madrid e líder do PP nesa autonomía, Isabel Díaz Ayuso, augurase un "asalto" da desaparecida banda terrorista ETA en Euskadi e Navarra. A comitiva do PPdeG na protesta estivo encabezada por Alfonso Rueda, que se amosou convencido de que Feijóo "tomará sempre as decisións máis convenientes para España". [Nas imaxes, -©PP e PPdeG-, Feijóo e Rueda en dous intres da mobilización]
