Fálase

Donald Trump volverá á presidencia nos EUA. O candidato republicano marcha con ampla vantaxe no reconto xa coñecido (247 fronte a 214 votos no colexio que elixe a presidencia, arestora nas cifras do New York Times) fronte á demócrata Kamala Harris, que non falará na noite electoral, segundo confirma a súa campaña. Máis información e análise, este mércores en Praza.gal.

• EN ACTUALIZACIÓN 👉 Trump vence nos Estados Unidos e dá azos a internacional reaccionaria
• HEMEROTECA | Seguidores de Trump asaltan o Capitolio e interrompen a ratificación de Biden como presidente dos Estados Unidos
• HEMEROTECA | Joe Biden, elixido novo presidente dos Estados Unidos mentres Trump teima sen probas na tese da fraude

Pedro Sánchez anuncia axudas por 10.600 millóns para 78 municipios atinxidos polas riadas -todos da Comunitat Valenciana agás 2 castelán-manchegos e un andaluz- con, entre outras medidas, achegas de ata 72.000 euros para casos de incapacidade, ata 60.000 para reparacións en vivendas ou ata 10.300 para mobles ou electrodomésticos, así como axudas directas de ata 150.000 para empresas. O presidente do Goberno de España avanzou ademais, tras o Consello de Ministros, a creación dunha figura de incapacidade temporal extraordinaria para persoas asalariadas ou autónomas con danos físicos ou psicolóxicos a causa do sucedido, con cobertura do 75% do salario dende o primeiro día. Nesta ligazón, un resumo do anunciado [Imaxe: © Pool Moncloa/Borja Puig de la Bellacasa]

• Devolverlle o do Prestige á esquerda
• Quen é máis responsable na xestión dunha crise como a de València e cales son os tres niveis de emerxencia

Adeslas, Asisa e DKV deixan deserto o concurso público de Muface, a mutua a través da que accede á asistencia sanitaria o groso do persoal funcionario, en torno a 1,5 millóns de persoas en todo o Estado contando titulares e beneficiarios. As compañías esixían ao Goberno de España achegar ata un 40% máis de fondos e non o 17% que aplicou (+303 millóns de euros a respecto de 2024). Muface disponse a "iniciar os traballos para unha nova licitación" e subliña que, en virtude da lei de contratos, a "atención médica e asistencial manterase nos termos actuais" ata que haxa unha nova adxudicación. [Imaxe: CC BY-NC-SA CIG]

• En infoLibre | Un modelo en crise cada vez máis caro: a herdanza franquista de Muface que ninguén se atreve a tocar

Principia a xornada das eleccións presidenciais nos Estados Unidos coa apertura dos centros de votación nos primeiros oito estados. A demócrata Kamala Harris e o republicano Donald Trump, únicos aspirantes con opcións reais de vitoria, chegan á cita electoral con enquisas que veñen debuxando escenarios moi axustados para uns comicios con impacto global. [Imaxes divulgadas polas campañas de ambos candidatos]

• HEMEROTECA | Seguidores de Trump asaltan o Capitolio e interrompen a ratificación de Biden como presidente dos Estados Unidos
• HEMEROTECA | Joe Biden, elixido novo presidente dos Estados Unidos mentres Trump teima sen probas na tese da fraude

Pontón apela á "máxima cooperación" para atender as persoas afectadas polas riadas en Valencia e expresa a comprensión cara á "indignación da xente que reclama máis medios". "Isto non xustifica nunca a violencia e moito menos cando temos datos de que hai accións programadas por parte de grupos de extrema dereita que queren aproveitarse da dor e do sufrimento das persoas para facer a peor das políticas", resaltou este luns a portavoz nacional do BNG a preguntas dos xornalistas.

• CRÓNICA | Politizar
• Bombeiros, submarinistas e persoal de emerxencias no continxente galego de axuda a València

O PSdeG expresa a "máis firme condena ás agresións e actos vandálicos sufridos polo presidente da Comunidade de Valencia, o presidente de España e os Reis de España, claramente dirixidos por grupos de extrema dereita" e ve " inaceptable que as outras forzas políticas galegas non saísen publicamente a condenalos". "Non podemos permitir que o silencio sexa cómplice da radicalización e da intolerancia", agrega a formación que encabeza José Ramón Gómez Besteiro nun comunicado no que reiteran a "solidariedade máis sincera cos veciños e veciñas da Comunidade Valenciana afectados pola DINA". [Imaxe: © RTVE] 

• CRÓNICA | Politizar
• Bombeiros, submarinistas e persoal de emerxencias no continxente galego de axuda a València

O pleno de Santiago aproba definitivamente a ordenanza que completa as normas para frear os pisos turísticos cos votos a prol do goberno local (BNG e CA) e mais do grupo municipal do PSdeG, fronte ao "non" do PP. A ordenanza desenvolve a reforma urbanística do anterior mandato sen o 'indulto' a centos de pisos turísticos que reclamaban os seus propietarios; o apoio dos edís socialistas no trámite de aprobación inicial deu lugar a un proceso disciplinario -que aínda non concluíu- por parte da dirección local do seu partido, que ordenara votar "non".

• HEMEROTECA | A norma que completa o freo a pisos turísticos en Santiago, aprobada co PSdeG malia á orde da dirección do partido 
• HEMEROTECA | "Queremos xente vivindo na cidade histórica e sen comercio de proximidade non hai residentes"
• HEMEROTECA | Sen 'indulto' aos centos de pisos turísticos irregulares en Santiago: "É unha aposta polo interese xeral"

"Eu son Balbino, un rapaz da aldea...". A Fundación Xosé Neira Vilas celebra este domingo unha lectura pública e continuada do clásico Memorias dun neno labrego co gallo do aniversario do nacemento do autor. Será a partir das cinco da tarde na Casa do Romano, sede da fundación Neira Vilas en Gres (Vila de Cruces, Pontevedra). 

• ENTREVISTA | Iria Aldegunde: "Quería centrarme no mundo interior de Balbino"
• HEMEROTECA | Xosé Neira Vilas: a memoria dos “ninguén”

Pedro Sánchez confirma 211 vítimas mortais e pide "esquecer as diferenzas, poñer as ideoloxías e as diferenzas territoriais a un lado" para colaborar na crise provocada pola Depresión Illada en Niveis Altos (DINA), coa "inundación máis grave que viu o continente europeo no que vai de século". O presidente do Goberno de España asegurou que "non se trata de que a administración xeral do Estado suplante á autonómica" e avanzou que se duplicará desde este sábado o número de efectivos policiais ata chegar aos dez mil profesionais, así como a presenza do exército, que foi solicitada pola Generalitat e que esta fin de semana levará cinco mil militares máis ata as zonas afectadas. O Consello de Ministros aprobará o martes a declaración de zona gravemente afectada por unha emerxencia de protección civil para a Comunitat Valenciana, Andalucía e Castilla-La Mancha. [📸Ministerio de Defensa]

• As riadas máis mortais de Europa neste século superan xa as 200 vítimas en València

A memoria de Todos os Santos e Defuntos, no arquivo de Real Academia. A RAG recupera fotografías do seu arquivo que "ilustran a importancia" destas celebracións. Entre elas, esta imaxe do cemiterio coruñés de Santo Amaro un 2 e novembro "de comezos dos anos 30". "O Día de Defuntos ten raíces antigas e profundas. Na cultura galega relaciónase co Samaín celta, unha festividade que marcaba a fin do verán e o inicio do inverno", explica a RAG. "Coa chegada do cristianismo, estas tradicións fusionáronse coa festividade de Todos os Santos (1 de novembro) e o Día de Defuntos (2 de novembro), cando se honra e lembra a aqueles que faleceron, nunha mestura fascinante de tradicións pagás e cristiás". O fondo fotográfico da RAG pódese consultar no Arquivo Dixital de Galicia.

• Unha ducia de razóns para celebrar o Samaín